Na gemeente boekoestudi
1 Na gemeente boekoestudi e sorgoe gi wan toemsi prenspari fanowdoe foe a jeje go-a-fesi foe wi. Wi alamala moe abi foeroe warderi gi disi. Efoe wan toe sma e misi a komakandra disi geregeld, dan a problema ben sa kan de na ini disi, dati den e feni na gemeente boekoestudi no so prenspari leki den tra komakandra? A kan tja wini gi wi alamala te wi meki a loekoe foe wi na tapoe a gemeenteboekoestudi kon boen baka.
A ROL FOE NA STUDI-LEIDER
2 Na studi-leider moe de wan studenti foe na Wortoe foe Gado di no e meki spotoe. Gewoonlek a de wan foe den herder ofoe foe taki en trafasi owroe man. Foe doro na marki di a abi na prakseri, a moe sreka ensrefi boen a fesi èn go loekoe finifini fa a materiaal kan meki na jeje gro foe den sma di de drape go na fesi. A moe arki finifini na den kommentaar èn abi belangstelling gi ibri sma di de ondro en sorgoe. Ooktoe a moe de nanga switifasi èn koni èn gi dek’ati na ala sma foe teki prati, sondro foe meki wan sma kisi sjen.
3 Wan boen leriman sa wani de séker dati den edeprakseri kisi krakti. A moe go loekoe boen soema ai teki te ala wiki a e sori wan brada foe de lésiman èn te ai aksi aparti sma foe lési sroto tekst. — Tit. 1:9; Fil. 1:19.
DEN SMA DI DE DRAPE
4 A de prenspari dati ala sma di de drape sreka ensrefi na fesi. Kande na ini a ten foe a studi nofo ten no de foe lési ala tekst di tanapoe ma di den no skrifi den uit. Ma efoe joe loekoe den na fesi, kande joe abi na okasi foe gi kommentaar na tapoe. Ofoe joe kan oefen joesrefi na ini a taki foe moeilek wortoe ofoe nen, na ini den tekst di skrifi. Wi alamala e kisi dek’ati foe gi kommentaar èn foe feti a baka foe doe disi nanga wi égi wortoe. Disi sa jepi wi foe taki moro boen efoe wi e prati bijbel waarheid ini a dienst nanga trawan.
5 Tapoe a gemeente boekoestudi wan sfeer moe de di e meki a teki foe sabi go na fesi. Papa nanga mama moesoe doe moeiti soboen foe dwengi den pikin so dati den no stoor na komakandra. Wi e warderi en efoe brada nanga sisa opo den oso gi na studi èn e proeberi foe sorgoe gi wan krin komakandra-presi di abi boen faja èn winti. Foe di den troetroe e sori taki den lobi foe teki sma na oso, den e sori dati trawan e firi taki den de welkom (Odo 3:9). A no de foe taki dati den sma di e fisiti na studi moe abi wan respeki di fiti gi na oso foe wan tra sma èn foe sori warderi foe di den no e gebroiki tapoe wan fowtoefasi den sani di seti èn no gi densrefi pasi di no fiti foe doe sani. Net so leki a tapoe den tra gemeente komakandra na so wi krosi, na fasi fa wi e sorgoe wisrefi èn a fasi fa wi e tjari wisrefi moe kotoigi foe na wartifasi di tai nanga wi anbegi foe Jehovah. — Loekoe bladzijde 65 foe na Orga diniwroko-boekoe.
6 Na gemeente boekoestudi e sorgoe ooktoe na ini wan warti leri gi na velddienst. Wi kan poti prakseri na tapoe, velddienstpunt di den e taki foe en na ini a ten foe a studi. Te wi e gi kommentaar dan wi kan kisi jepi foe wini sjensjenfasi èn sabi moro boen na bijbel. Wan positief loekoe tapoe den gemeente boekoestudi-seti sa meki na warderi foe wi gi na fasi fa Jehovah o sorgoe gi en ipi séker kon moro bigi.