Pristeri a boen njoensoe — Nanga njoen sma
1 Fa a de wan kefarlek bigi wini dati a mindri wi prékiman foe na boen njoensoe de di abi ondrofeni! Den de wan troetroe wini ini a gemeente foedi no wawan den e gebroiki den bekwaamheid foe den, ma ooktoe a sabi nanga ondrofeni foe den foe jepi den foeroe njoen sma di e lon kon na Jehovah organisatie na ini a ten disi. Den e teki na fermane na ati di komoto foe santa jeje: „Gebroiki na presenti, so fara ibriwan sma ben kisi dati, foe dini makandra nanga dati”. — 1 Petr. 4:10.
2 Sma di tai densrefi na a organisatie èn di den e feni boen, èn den sma di dopoe pas, e ferdini foe prijse den foe a tranga wroko foe den ini na velddienst. Tokoe kande den abi soso ini wan ofoe toe pisi foe na prékiwroko ondrofeni, soleki na prati foe tijdschrift èn a gi foe okasi préki. Foe meki na go na fesi foe den kon na krin, dan den njoen sma disi moesoe abi wan prati na someni pisi foe na velddienst èn meki na doeltreffendheid foe den leki prékiman foe na boen njoensoe kon moro bigi. Njoen sma sa kisi jepi foe tron bekwaam kownoekondre bedinari foedi den e wroko makandra nanga den sma di kisi moro ondrofeni. — Prék. 4:9, 10.
POTI JOESREFI FOE DEN GEBROIKI JOE
3 Joe kan poti joesrefi foe jepi trawan na ini na diniwroko? Njoen sma no wawan moe leri fa den kan pristeri na tijdschrift, ma ooktoe fa den kan gebroiki na bijbel ini na oso-foe-oso-wroko. Den moe leri fa den moe bigin takmakandra nanga ososma èn hori dati go doro. Wan sma di no abi ondrofeni, kan frede pikinso foe tjari go-baka èn lei bijbelstudie. Ma den di wani, kan leri fa den kan doe na njoen frantwortoe disi efoe den kisi na fanowdoe jepi nanga dek’ati.
FA JOE KAN GI JEPI?
4 Wan fasi tapoe san joe kan gi jepi, de foe miti nanga prékiman di no abi someni ondrofeni èn foe taki nanga den foe den takmakandra ini Wi Kownoekondredienst. Teki te joe e gebroiki na Tak-go-tak-kon-boekoe inleiding di fiti èn oefen fa joe kan go na tapoe genstaki foe koti wan takmakandra. Na ini den sortoe oefen periode disi joe kan studeri na gebroiki foe tekst èn meki den si fa joe kan doe den pristeri foe boekoe. Joe kan taki fa joe kan tapoe nanga wan fosi fisiti èn kan poti wan fundamenti foe wan go-baka, ofoe joe kan meki den si fa wan bijbelstudie kan opo. Sowan sreka sa jepi na njoen prékiman foe abi fertrow ini en bekwaamfasi foe taki nanga sma foe a Wortoe foe Gado.
5 Meki wan boen mofo foe go na ini a velddienst. Na njoen sma kande sa wani go èn loekoe nomo fa wantoe doro e doe. Dan a kan proeberi san a ben sreka na ini na oefenperiode. Taki te wi e wroko makandra fa joe kan meki joe takmakandra kon moro boen èn fa joe kan doe na tapoe den sani leki mi-no-ke-fasi èn gens. Gi dek’ati èn gi a trawan jesi. Sori na njoen sma boenboen dati a de a wroko foe Jehovah èn dati a sa blesi wi opregti moeiti.
WROKO OOKTOE NANGA JONGOE SMA
6 Jongoe sma sa wroko nanga moro prisiri na a diniwroko te den abi wan boen takmakandra di den sreka a fesi. Wan boen jongoe pikin kan kisi dek’ati foe doe wan eenvoudig pristeri. Efoe dati kan, dan den kan kisi na okasi foe lési wan bijbeltekst gi na ososma. Jepi ibriwan foe den foe go a fesi ini akroederi nanga na libimarki èn bekwaamheid foe den. Papa nanga mama èn trawan ini na gemeente kan gi na fanowdoe jepi nanga dek’ati sodati èn den boen jongoe prékiman èn den sma di e gro kon lepi, kan kon koni ’ini na wroko nanga na wortoe foe waarheid tapoe wan joisti fasi’. — 2 Tim. 2:15.
7 Den sma di e lei bijbelstudie, sa wani foe tjari den studenti go ini na velddienst so esi leki den doro den marki. Owroeman, dinari na ini na diniwroko, pionier nanga papa nanga mama moesoe poti densrefi a tapoe foe pristeri jepi na den sma di bigin paspas nanga na prékiwroko. Joe sa man poti joesrefi foe jepi njoen sma? Teki na ini disi fesi, bika foedi wi ’e tjari komakandra ini wanfasi èn e gi san de fanowdoe, meki na gro foe na skin e go a fesi’. — Ef. 4:16.