Yu abi na pioniersgeest?
1 San na a „pioniersgeest”? Wi ben kan taki dati a de wan positief yeyefasi gi na gebod fu preiki èn meki disipel, fu gi yusrefi krinkrin fu sori lobi èn brok’ede gi sma, fu offer yusrefi, fu feni prisiri ini a waka soifri na baka na meester èn fu kisi satisfaksi fu yeye sani èn no fu skin sani.
2 Na heri pipel fu Yehovah e sori na yeye disi seiker na ini a ten disi. Srefi awansi bita ferfolgu nanga tra rampu de toku den e go doro èn nanga prisiri fu meki na bun nyunsu fu Gado kownukondre bekenti. Na prisiri di e kon fu na faya preiki fu na bun nyunsu spesrutu de fu si èn de fu firi te wi e de tapu distriktkongres èn tra bigi komakandra fu Gado pipel. Na geest di e sori na den okasi disi, e gi wi moro bigi faya, efu wi de now preikiman ofu pionier.
3 Ma toku ete, fudi wi e libi dipi na ini a ten fu na kaba, dan na brok’ede èn na druk fu na libi fu aladei kan aksi wan sani, èn kande meki na faya fu wi èn na enthousiasme fu wi gi yeye afersi kon kowru. Ibriwan fu wi ben sa kan aksi ensrefi: ’Mi abi na pioniersgeest? Mi e gi pasi dati na seti fu sani disi e fufuru en fu mi? Mi e sori faya gi na waarheid, e angri fu ferteri tra sma fu Gado kownukondre? Mi e meki na pioniersgeest ini na gemeente go a fesi èn mi e gi tranga na tra sma fu gi densrefi moro fudi den e meki na du fu a wani fu Gado teki den krinkrin abra? Fa mi kan du fu wini wan negatief ofu mi-no-ke fasi?’
FA FU KWEKI NA PIONIERSGEEST
4 Na pioniersgeest de morofuru wan toestand fu na ati, èn wi mu kweki disi. Fudi wi e gi na ati nyanyan nanga den sani di wi e leisi, èn na san wi e arki, meki studeri na bijbel nanga wisrefi (persoonleke studi) e prei wan prenspari rol na ini a kweki fu na pioniersgeest. Paulus ben vermane Timotéus: „Go denki dipi fu den sani disi, sodati na go na fesi fu yu de krin fu si na ala sma. . . . Tan na den sani disi, bika te yu e du disi, yu sa yepi yusrefi èn den di arki na yu fu kisi ferlusu” (1 Tim. 4:15, 16). A de fu dat’ede fanowdu dati wi e go denki dipi fu yeye afersi fu meki den sungu go ini wi ati, na sdonpresi fu den buweigi fu wi ati. Te wi e du disi dan wi sa kweki wan angri fu du a wani fu Gado. Na warderi fu wi gi yeye afersi kon moro dipi èn wi sa suku na fasi fu meki wi diniwroko kon moro bigi.
5 Den sani di wi e taki fu den kan broko wi brada saka ofu bow den (Ef. 4:29). Te wi e ferteri fu velddienst ondrofenitori ofu punt di wi ben nyanbun fu den tapu komakandra èn di wi ben studeri nanga wisrefi, dan wi e poti prakseri di de positief èn e gi dek’ati. Wi e suku na sei fu disi na okasi fu gi okasi-preiki te wi abi na wi aladei bezigheid na mogelekheid fu taki nanga sma? Te wi e du dati, dan wi e go na ini den futumarki fu wi eksempre, Yesus. — Yohannes 4:7.
6 Na kweki fu lobi fu wi naaste e yepi wi fu kweki na pioniersgeest (Matt. 22:39). Yesus ben sori na sortu fu lobi disi di a ben de na grontapu. A ben abi sari fu den sma èn a ben wani du ala sani san a ben kan fu yepi den, aladi disi ben tyari bigi persoonlek offer nanga en (Matt. 9:36; Rom. 5:6). Efu wi sori wan fasi leki di fu Kristus, dan sari sa buweigi wi èn du ala sani san wi kan fu yepi wi naaste na ini yeye fasi, srefi efu wantu fu den e trowe wi. — Teki gersi na nga Mattéus 23:37.
NA POSITIEF FASI FA SANI E WROKO
7 Furu blesi nanga winimarki de di e kon fu a sori fu na pioniersgeest na ini wi libi. Te wi e meki wi activiteit na ini a diniwroko safrisafri kon moro bigi, dan wi e kon de moro bun leriman, èn disi kan gi wi furu prisiri. Te safrisafri na pioniersgeest e gro na ini a gemeente, dan na waran èn yeye fasi fu den brada èn sisa sa gro. Fu na bun krakti di na pioniersdienst ben abi tapu na gemeente, meki wan owruman ben taki: „Fa disi de wan difrenti! Na heri tempo fu a gemeente kenki. Wan firi de fu du moro na ini Yehovah dienst.” — Luku na Wachttoren fu 15 september 1985, blz. 26 par. 1.
8 Teki, aladi na dienstyari 1989 e kon moro krosbei, a bosroiti fu yepi fu kweki na pioniersgeest na ini na gemeente. Suku na fasi fu meki yu diniwroko kon moro furu. Meki plan a fesi fu te a de mogelek nomo fu de ini na yepi-pioniersdienst, ofu feti na baka fu kisi na gewone pioniersdienst. Ala sma na ini a gemeente, efu den de now pionier ofu preikiman, kan abi na pioniersgeest.