Du diniwroko nanga wan ati di no prati
1 David ben gi wan tumusi bun eksenpre ini a dini fu Yehovah nanga wan ati di no prati. En tiri ben abi wan krakti tapu na heri nâsi Israèl di ben go dipi. So srefi tu den ben tyari friwani presenti gi na bow fu Yehovah tenpri nanga wan ati di no prati. Bakaten David ben begi ofu disi ben sa kan de na lostu fu den „te ten di no abi marki”. — 1 Kronieken 29:9, 18
2 Fu san-ede now, neleki ini na owru Israèl, a de so prenspari fu dini Yehovah nanga wan ati di no prati? Fu taki en eenvoudig, Yehovah e gi den wan di e dini en nanga wan ati di no prati grani. Na ziener Hanani ben taygi kownu Asa: „Fu taki fu na sey fu Yehovah, en ay e go lontu na heri grontapu fu sori en krakti gi den wan di ati no prati gi en” — 2 Kronieken 16:9.
HORI BAKA GI NA KOWNUKONDREWROKO
3 Ini a ten disi wi kan du diniwroko nanga wan ati di no prati fu di wi e hori baka gi na Kownukondre preykiwroko di e du na a heri grontapu (Mat. 24:14). A de prenspari fu hori baka na monisey gi na wroko disi, ma fu ete moro bigi wârde de na kobroyki fu wi krakti, ten, bekwaamfasi èn a taki di wi man fu taki fu panya na bun nyunsu go na trawan (2 Kor. 9:7). Yu e ondrofeni na prisiri di e kon fu na du fu dienst ini a bigi wroko fu Yehovah nanga wan ati di no prati?
4 Wi e kisi deki-ati fu gi wan opregti kari ini augustus na reti-ati sma te wi e taki fu na Fonten fu tru vrede nanga seykerfasi èn e gi wan fu den brochure fu wi buku pristeri. Omoro ogri e psa na a heri grontapu, omoro libisma e broko den ede fu na tru vrede nanga seykerfasi di de na wi fesi fu kon. Wi abi na okasi fu sori taki wi ati no prati gi Yehovah, fu di wi abi wan dorodoro prati na a velddienst èn e tyari safri-ati sma na a tru Fonten fu vrede.
YU BEN SA KAN PIONIER HERI ESI?
5 Yu kan gi moro ten na a velddienst? Augustus kan de wan tumusi bun mun gi yu fu meki yu activiteit ini na velddienst kon moro bigi, fu meki te fu kba yu srefi kon bekwaam gi na pionierwroko.
6 Now di a de dreyten, furu sma e bradi na velddienst wroko fu den, nanga na ini prakseri fu tron gewoon pionier na a bigin fu na nyun dienstyari ini september ofu oktober. Yu ben prakseri fu dati? Yu ben sa fiti yu schema so taki yu kan de wan gewoon pionier? Yu ben sa de klariklari fu meki yu fasi fu libi kon moro eenvoudig efu dati de fanowdu fu abi moro ten gi Yehovah diniwroko? (Mat. 6:22) Efu trutru nanga prisiri yu wani dati èn a pionierwroko de krosibey fu yu kan teki en, dan go begi Yehovah èn aksi en en yepi nanga tiri (Odo 16:3). Taki nanga den owruman fu den plan fu yu gi na gewoon pionierwroko. Efu yu si taki den omstandigheden fu yu e gi pasi fu tron gewoon pionier, sorgu dan fu gi na aksi fu yu no moro mendri leki 30 dey bifosi yu wani bigin.
7 Meki a de so taki wi alamala yonguwan nanga owruwan, sori taki wi e dini Yehovah nanga wan ati di no prati. Noyti wi musu meki wi ati kon prati (Mark. 12:30). Na hori di wi e hori baka fayafaya gi na Kownukondre preykiwroko sa yepi wi fu kibri wan ati di no prati gi Yehovah.