Kobroyki den okasi fu gi kotoygi
1 Na Beybri e gi wi na deki-ati: „Efu yu . . . e nyan ofu e dringi ofu e du wan tra sani, du ala sani fu Gado kisi glori” (1 Kor. 10:31). Den mun di e kon e gi wi okasi fu du dati na wantu fasi?
2 A yari disi furu sma sa go nanga fakansi. Ma nowan fu unu, awasi sortu ten fu a yari, musu misi fu du a preykiwroko nanga a wroko fu gi leri. Suku fu dati-ede fu preyki gi tra sma te yu de nanga fakansi ofu e fisiti wan kongres ofu te yu abi skorofakansi. Fa wi kan du disi?
TE YU DE NANGA FAKANSI
3 Yu e denki fu fisiti famiriman? Moro furu fu unu e feni en wan switi sani fu tranga den famiri banti. Efu den famiriman fu yu no de na ini waarheid, dan kande yu kan prati a kownukondre boskopu nanga den. Furu brada nanga sisa ben feni bun bakapisi fu di den ben wakti nanga pasensi tapu a yoysti pisiten fu preyki gi den famiriman fu den. Na a fasi dati wantu sma leri sabi a waarheid. — Luku Na Waktitoren fu 15 februari 1990, blz. 25-27.
4 Efu yu e denki fu nyan yu fakansi na wan tra kontren, dan fu san-ede yu no ben sa seti sani fu fisiti den konmakandra drape èn go ini a preykiwroko nanga a gemeente fu a birti dati? Wi abi „lobi gi a heri grupu fu brada nanga sisa, èn fu wroko makandra nanga den ini a preykiwroko e gi wi na okasi fu nyanbun fu na ondrofeni fu den ini a waarheid, ala di wi e kon leri sabi den moro bun (1 Petr. 2:17). Efu na ini den fakansi fu wi, wi e fisiti den konmakandra èn e teki prati na a preykiwroko, dan wi sa abi winimarki èn nyanbun trutru fu kowru-ati, makandra nanga wi brada nanga sisa. — Mat. 11:28, 29.
TE YU E FISITI A KONGRES
5 Preyki gi tra sma te yu e fisiti a distriktkongres. Te wi weri a lapelkarta dan a kan wiki na angri fu tra sma fu kon sabi sani èn a kan opo na pasi fu wi fu taki nanga den fu a waarheid. Suku okasi fu preyki te yu musu lay oli gi yu wagi, te yu e go nyan na ini wan rèstorant ofu te yu e meki kobroyki fu den bus. A gi fu okasi preyki na ini den situwâsi disi e gi furutron bun bakapisi. Sorgu fu dati-ede fu abi na yu, yu beybri nanga lektuur di fiti èn de srekasreka fu preyki.
MORO FURU AKTIVITEIT LEKI OSOFAMIRI
6 Fu di furu fu wi no abi fu go na skoro ini den fakansi mun di e kon ofu abi fri fu wi grontapuwroko, dan fu san-ede meki wi no e gi moro ten na a preykiwroko fu di wi e teki a yepipionier wroko? Yu kan meki yu velddienst kon moro bun èn kan ’bradi’ yu lobi fu di yu e wroko makandra nanga trawan. Fu san-ede yu no ben sa wroko makandra nanga someni memre fu na gemeente leki yu kan? (2 Kor. 6:11-13) Heri osofamiri ben kobroyki a fakansi fu de makandra ini a yepipionier wroko. Dati tranga den bribi èn a meki den osofamiri banti èn so srefi den matifasi nanga Yehovah kon moro tranga. Disi e gi a gemeente deki-ati tu èn a bakapisi kan de taki trawan e kisi wan pusu fu du moro.
7 Ini na fakansi ala ten wi abi furu fu du. Fu di bun furu sani kan teki wi ten, meki nanga frustan wi musu hori wi srefi na wan bun gwenti fu libi, so taki wi kan kobroyki wi ten na a moro bun fasi. Te wi e poti yeye afersi na a fosi presi dan wi sa meki ’unu leti skèyn gi sma’. Te den e si den tumusi bun wroko fu wi, dan kande a kan buweygi son wan fu gi Yehovah glori èn ala dati e kon fu di wi kobroyki ibri okasi fu prati a waarheid nanga tra sma. — Mat. 5:16.