Tan de actief na ini den moen di e kon
1 Foeroe boen sani di wi e njan boen foe den, abi foe doe nanga a son di Jehovah ben gi oenoe (Jakobus 1:17). Wi teki a faste bosroiti foe gebroiki a skijn foe a son disi foe prijse en? A no de foe taki dati wi moe tan poti na a fosi presi den theokratis activiteit foe wi na ini alaten foe a jari. Wi sa hori disi séker na ini prakseri efoe wi e meki plan gi den activiteit foe wi di e kon.
TEKI ALA OKASI
2 Foeroe foe wi ben kisi ondrofeni di ben tranga wi bribi, foedi na ini na ten foe fakansi dan den tan de actief na ini a prékiwroko. Brada nanga sisa di ben teki fesi foe taki nanga tra sma foe na boen njoensoe, ben kisi blèsi srefsrefi foedi na ini restaurant ofoe na a ten di den ben e reis ben bigin taki nanga tra sma tapoe wan tactvol fasi na a okasi dati. Wan brada di a ben e reis ben biginwan, takmakandra nanga wan jongoeman di ben sdon e lési wan boekoe di ben e go foe politiek èn a ben man foe wiki na belangstelling gi na Kownoekondrehowpoe. Na jongoeman ben doe moeiti foe kisi boekoe foe na genootschap èn na ini wantoe moen a ben kisi tranga foe libi en kerki èn a ben doe serjoesoe moeiti foe leri tra sma san a ben leri.
3 Foe kan kisi den moro boen bakapisi, dan joe moe sreka joesrefi boenboen. Sorgoe dati joe abi na bijbel èn wantoe boekoe na joe. Meki plan foe fisiti den komakandra èn foe wroko na ini na velddienst nanga na gemeente di joe e fisiti. Proberi na ini den moen di e kon foe poti wantoe foe den rai disi ini joe libi.
4 Den „vréde foe Gado”-distrikt-kongres sa de toemsi boen okasi foe, préki na a ten te joe e reis. Nofotron na gridi foe sabi sani foe tra sma e bigi foedi wi e weri lapel-karta sodati wi e kisi na okasi foe bigin wan takmakandra.
OKASI FOE DOE PIONIERWROKO
5 Na ini a ten foe den skorofakansi dan jongoe prékiman di gi den libi abra èn di e doro den marki kan go na ini na jepipionierdienst. Ini son geval na heri osofamiri kan njan boen foe a grani disi, sodati moro bigi prisiri nanga wanfasi sa kon na ini na osofamiri. A e kon moro nanga moro dati difrenti memre foe wan osofamiri e poti leki marki foe abi wan prati na a jepipionierwroko na a ten foe fakansi.
6 Moro fara prékiman de di e meki plan foe bigin tapoe 1 september 1986 nanga a gewone pionierwroko. Efoe na ini den moen di e kon joe kan bigin joe dienst leki jepipionier, dan joe sa man foe bow wan nomroe foe gobaka adres èn foe opo bijbelstudie. Disi sa gi joe wan boen fundamenti foe bigin na ini november nanga na gewone pionierdienst. Awinsi joe no de ini na okasi foe teki na gewone pionierdienst tapoe joe te joe loekoe na a disiten omstandigheid foe joe, tokoe joe kan feti na baka foe psa moro ten leki fa joe gwenti na ini na velddienst. Joe kan seti kande sani foe go nanga pionier na ini na dienst, gi den dek’ati èn foe teki prati na ini a prisiri foe den.
7 Foeroe sani de di kan hari wi prakseri poeroe èn di kan wroko na wan takroefasi na tapoe na prékiwroko. Ma den sma di e gebroiki den ferstan sa poti den joisti sani na fesi èn meki den Kownoekondre afersi kon tapoe na fosi presi. Te wi de alaten druk bézig nanga a prékiwroko, dan wi e sori dati wi e ferstan boenboen na tranga fanowdoe foe den laste dé disi.