Tan doe theokrasia wroko ini a fakansi
1 Fakansiten e gi okasi foe teki prati na difrenti sani. Moro foeroe foe wi wani meki boen gebroiki foe a moi weer, foe doe wan tra sani èn foe rostoe. Ma wi moesoe kibri wisrefi foe no meki sani broeja den theokrasia sani di wi gwenti foe doe. — Fil. 3:16.
2 Fajafaja wi e froewakti a distriktkongres ibri fakansi. Joe ben meki boen plan foe fisiti a kongres, foe sreka sani gi transport nanga gi tanpresi te a de fanowdoe? Joe ben prakseri foe wan sma toe ini joe gemeente di kande abi persoonlijk jepi fanowdoe? So wan moi fasi foe sori switifasi ben kan tjari blesi gi oenoe ala toe.
3 Efoe joe sa abi ten, so leki na a ten foe a skorofakansi, joe ben prakseri dan foe doe moeiti foe abi wan moro bigi prati ini a diniwroko? Foeroe sma ben feni taki disi na wan boen ten foe gi den nen leki jepipionier. Nofotron disi ben opo na okasi gi moro bigi dienstgrani. Osofamiri kan ondrofeni troetroe prisiri te den e wroko makandra heri dei na ini a diniwroko. Awansi fa a de, joe kan gi moro ten leki di joe e gebroiki kaba ini a diniwroko? Nanga moi weer èn nanga moro fri ten ini a fakansi, moro sma moesoe man kisi wini foe a teki di den e teki prati ini a gi foe kotoigi na neti.
4 Fa a de nanga a jepi di wi kan jepi wan gemeente di abi jepi fanowdoe foe wroko a kontren foe den? Kande tra sma de ini joe gemeente di ben sa wani foe dini makandra nanga joe gi wán noso toe wiki pe a fanowdoe de moro bigi. Efoe a groepoe foe joe pikin, dan kande preikiman ini wan gemeente di de ini joe birti ben sa wani foe go nanga joe. Efoe joe no man go na wan fara presi, dan kande a kringopziener man rikomanderi wan krosibei gemeente di ben sa warderi a jepi foe joe.
5 Joe e meki plan foe gowe nanga fakansi? Efoe a de so, joe e meki plan dan foe fisiti den konmakandra pe joe sa go? Fa a de nanga a wroko di joe kan wroko ini a velddienst nanga den brada drape? Foe doe disi toe ini joe fakansi kan abi foeroe winimarki gi joe nanga gi trawan (Rom. 1:11, 12). Joe kan gi okasi kotoigi toe te joe e rèis? Sorgoe taki joe teki joe bijbel nanga joe, nanga nofo poeblikâsi. Gebroiki pikinso foe joe fri ten foe de tapoe schema nanga a leisi di joe e leisi èn nanga joe bijbelstudie. Prakseri taki, ala di wanwan leisi wi abi fakansi fanowdoe foe den grontapoe wroko, tokoe wi no wani teki fri foe a dini di wi e dini Jehovah.
6 Den owroeman moesoe de na ai foe meki den wroko foe a gemeente tan orga boen. Efoe iniwan owroeman noso dinari ini a diniwroko no e go de, dan sani moesoe seti meki trawan sorgoe gi den frantiwortoe foe den. Te joe e meki a fesiman opziener sabi biten sortoe dei den brada disi no e go de, dan dati sa jepi en foe sorgoe taki a e tjari den joisti kenki kon.
7 Ija, fakansiten kan de wan ten pe joe abi toemoesi foeroe foe doe. Ma sani di e poeroe joe prakseri kan broeja a boen gwenti di joe abi foe doe Kownoekondre wroko, na wan makriki fasi. Gebroiki den okasi di joe abi ini a fakansi so boen leki a kan. Ondrosoekoe san na den moro prenspari jeje afersi gi joe di boen, èn hori joesrefi na den. — Fil. 1:10.