Tan meki froktu nanga horidoro
1 Di na apostru Paulus, a no kisi 30 yari baka a dede nanga opobaka fu Yeises Krestes, ben skrifi a gemeente na ini Kolose, a ben kan taki taki a waarheid fu a bun nyunsu ben meki froktu èn ben gro na ini a heri grontapu (Kol. 1:5, 6). Na ini a ten disi den Yehovah Kotoigi na wan fasi di moro bigi doro letterlijk „den moro farawe presi fu grontapu” nanga a bun nyunsu fu a Kownukondre (Tori. 1:8; Yoh. 14:12). Ini na heri dienstyari 1989, wan gro ben de fu 5,6 procent ini a gemiddelde nomru fu Kownukondre preikiman na a heri grontapu, èn wi ben doro wan nyun heimarki fu 3.787.188 preikiman na ini 212 kondre.
2 Kondre pe lanti no wani fu wi preiki Gado kownukondre èn fu pe na Genootschap no kisi ala den bericht, ben skrifi srefi fu wan moro bigi gro ete fu 7,6 procent! Ala di so meni problema de na ini den kondre disi, toku den preikiman e tan „meki froktu nanga horidoro” (Luk. 8:15). Na son presi a kwinsi kon moro mendri, ma na ini tra kondre den muilek situwâsi e tan so sondro fu kenki.
3 Na ini Kondre pe wi abi moro bigi fri fu go doro fu preiki a kownukondre, wi e miti nanga tra problema. Wi e miti furu sma di no e poti prakseri ofu di de nanga mi-no-kefasi, spesrutu dape pe den abi en bun na monisei. Den diniman fu Yehovah musu de na ai fu no teki so wan fasi fu du abra. Wi no wani taki gudu, prisiri, ontspanning nanga tra sani di e puru sma prakseri, fu na boskopu pori den teyokrasiya wroko fu wi. Noso wi ben sa kon de nanga mi-no-kefasi èn misi fu de sabisabi fu a fanowdu fu tan meki froktu nanga horidoro. — Luk. 21:34-36.
HORIDORO NANGA MUITI DE FANOWDU
4 Horidoro de wan fanowdu sani efu wi abi now fu du nanga gens teige a bun nyunsu ofu e nyanbun fu wan bepaalde fri fu du wi kresten frantiwortu. Na ini son kondre den brada nanga sisa fu wi wroko tintin yari na ondro muilek omstandigheid. A hori di den horidoro na ondro so wan gens tyari den kon ini wan toestand di Gado e feni bun èn now den e koti furu blesi (Rom. 5:3-5; Gal. 6:9). Awasi sortu problema o miti wi tu, wi wani tan horidoro. A Kownukondre musu preiki èn wi alamala musu tan sori wi soifri-retifasi. Te wi e horidoro fu wi sei, dan wi sa frulusu wi sili, ofu yu kan taki, wi libi. — Mark. 13:10; Luk. 21:19.
5 Wi kan sori taki wi no e si yeye sani leki sani di e kon fu den srefi fu di wi e du tranga muiti na ini a diniwroko fu Yehovah èn no e kon weri fu du a preikiwroko. Na ini son kondre pe a feni fu wagi moro muilek, pe sma e mankeri den fanowdu sani fu a libi èn pe ekonomia problema de, a preiki fu bun nyunsu no e go na baka. Na ini wantu fu den sortu kondre disi den gemeente preikiman e de doronomo gemiddeld 14 te go miti 17 yuru na ini wan mun ini a preikiwroko. Drape a grupu fu pionier e gro so srefi doronomo — gi den wan a wi mindri di abi furu gudu na skinfasi, reide de fu go denki bun. Wi kan bradi a prati di wi abi doronomo na a moro prenspari wroko di abi fu du nanga a preiki fu a kownukondre èn a meki fu disipri?
WI KAN DU MORO?
6 Fu gi moro ten na a preikiwroko, kan meki a de fanowdu fu tyari pikinpikin kenki kon na ini wi schema. Efu sonde wi go wan yuru na ini a preikiwroko, dan wi ben sa kan meki a ten dati kon kande moro langa fu di wi e tyari gobaka ete wan yuru ofu e hori wan beibristudi? Ofu efu wi e hori wan beibristudi, wi ben sa kan du, ete wan yuru oso-fu-oso wroko ofu wantu gobaka (dan bifo a studi). Satra, baka te wi teki prati tu yuru na a tijdschriftwroko, dan kande wi ben sa kan du den tijdschriftenroute di wi ben opo ofu go na wantu gobaka. Den wan di e libi na ini a kontren fu foto, e feni en kande bun fu gi pikinso ten na a stratiwroko. Na den fasi disi èn tra fasi wi ben kan meki a prati fu wi na a preikiwroko kon moro furu. Den bun bakapisi sa gro so srefi ini akruderi nanga dati.
7 Efu na ini a preikiwroko moro ten e gi na a tyari fu gobaka, dan degedege no de taki dati sa abi leki bakapisi taki wi sa hori moro beibristudi. Baka wan pisiten disi wani taki taki moro sma e kon ini a waarheid èn sa go yepi wi fu klari a kownukondre preikiwroko. — Mat. 28:19, 20.
BEGI DE FANOWDU
8 Efu wi wani tan meki froktu nanga horidoro, dan wi musu suku a blesi fu Yehovah èn frutrow tapu a tiri fu en yeye. Wi musu meki a diniwroko fu wi tron wan afersi fu begi na Yehovah. Te wi e begi Yehovah fu den wroko fu wi na ini a preikiwroko, dan disi e memre wi taki wi de konpewrokoman fu en (1 Kor. 3:9). Nanga a yepi fu Yehovah wi kan horidoro na ini wi diniwroko, awasi wi no e si wantewante winimarki tu. Na ini son kontren gro ben kon pas baka furu yari fu kotrow horidoro fu a sei fu den Kownukondre preikiman. Nanga a tamara na prakseri a de alaten fanowdu fu suku a tiri nanga yepi fu Gado fu no kon weri, ma fu klari wi diniwroko dorodoro (2 Tim. 4:5). A wroko di de fu preiki a Kownukondre èn meki disipri, alaten e meki furu froktu ete.
9 Yeises ben poti krakti tapu a fanowdu fu begi alaten (Luk. 18:1). Paulus ben frumane: „Begi sondro fu stóp” (1 Tes. 5:17). Tranga fanowdu reide de gi wi fu horidoro now ini begi. A sorgu gi a ipi di e gro ala yari e go makandra nanga furu frantiwortu. Wi wani yepi trawan fu meki froktu nanga horidoro. Prakseri musu poti na den difrenti fanowdu fu den aparti preikiman èn na di fu a heri organisâsi. Fu di wi e frustan taki bijdrage de fanowdu fu horibaka gi a wroko èn fu meki a kan taki wi tan tyari buku kon a doro di abi den gron tapu a beibri, meki wi wani begi taki Yehovah tan gi den sma di e frede Gado a tranga fu sori bun-ati na a fasi disi. — 2 Kor. 9:8-11.
10 Omoro pisi fu a veld di de na a heri grontapu e opo den srefi, fu meki teyokrasiya gro kan feni presi na wan bigi fasi leki oiti wanten na fesi, omoro a beibri rai na ini Kolose sma 4:2 e wani taki moro: „Hori doro ini begi, tan na ai na ini dati nanga tangibegi.” Wi musu begi gi den brada fu wi na a heri grontapu taki den kan tan meki froktu fu di den e yepi tra sma di yu kan teki gersi nanga skapu èn di den feni na ini den kontren pe a gi fu kotoigi ben de moro muilek na ini a ten di psa.
SORI TANGI
11 O fa wi de nanga tangi gi den yeye seti di psamarki, di wi e nyanbun so furu fu den! Wi wani taki Yehovah tangi fu disi èn begi so srefi taki en blesi mag tan tapu a wroko fu a kotrow srafu èn en Tiri Skin. Wi e warderi na wan spesrutu fasi den muiti di den e du nanga sakafasi èn sondro fu weri fu na bun fu yu èn gi den sma di yu kan teki gersi nanga skapu na a heri grontapu.
12 Wan tumusi bigi nomru fu buku prati na ini a sai fu Kownukondre siri (Mat. 13:3-8, 18-23). Toku den sma ini a veld, e aksi doronomo fu beibri nanga beibri lektuur. A bericht fu heri grontapu e sori taki furu sani du na a suku èn natiwroko nanga yepi fu gobaka nanga osobeibristudi. Ala di wi e go doro fu du wi prati na ini den prenspari pisi disi fu wi diniwroko, wi e taigi Yehovah tangi taki nanga yepi fu en doronomo blesi a e sorgu gi a gro. Iya, wi e begi fu a blesi dati. — 1 Kor. 3:6, 7.
TRA FANOWDU SANI
13 Fu di kresten de na ini a grontapu èn toku no de wan pisi fu en, meki den sa tan kisi tesi nanga frufolgu, èn den disi sa kon srefi morofuru na ini den lasti dei. Sonwan e ondrofeni now frufolgu ofu tra problema. Trawan musu go doro fu du den kresten wroko fu den na ini kondre pe hebi orloku de. Den brada nanga sisa fu wi abi fu du nanga ranpu so leki gronseki, bigi drai winti nanga orkân. Te den sani disi e psa, dan wi musu begi gi den brada nanga sisa fu wi di de na ini den sortu kontren dati (Teki gersi Tori fu den Apostru 12:5; 2 Korente sma 1:11). Son tron a e de fanowdu fu go na lantiman di abi wan hei posisi, ofu skrifi den fu a tapu di lanti tapu wi wroko, a frufolgu fu den brada fu wi ofu tra afersi di abi krakti tapu den belang fu a Kownukondre. Na ondro den sortu omstandigheid disi wi e du san wi srefi kan èn e begi gi den sma disi taki den kan sori bunfasi gi den konpe diniman fu wi. — 1 Tim. 2:1, 2.
14 Ini a gadolowsu grontapu fu Satan furu druk e oefen tapu osofamiri (2 Kor. 4:4). Trowpatna kan miti seryusu problema. Den musu kisi a deki-ati fu begi fu a tiri fu Gado èn wi kan begi gi den tu (1 Kor. 7:5; 1 Petr. 3:7). Osofamiri-edeman musu frustan taki Yehovah sa arki den opregti begi fu den fu kisi tiri na a du di den e du a wroko fu den leki edeman (Krutum. 13:8; Fil. 4:6, 7). Owruwan sobun leki yonguwan e miti hebi tesi. Disi kan de na skoro, na a grontapu wroko, efu wi de na rèis, ofu na ini tra omstandigheid. Begi e yepi wi fu kakafutu gi a yeye fu a gadolowsu grontapu disi èn fu tan meki froktu, ala di wi e go doro fu du san bun na ini den ai fu Yehovah. — Mat. 6:13; Ef. 6:13-18; 1 Yoh. 3:22.
15 Yehovah na a bigi Yereman fu begi (Ps. 65:2). Alaten wi musu poti den broko-ede fu wi na en fesi (Ps. 55:22). Wi abi okasi fu sori wi broko-ede fu di wi e begi gi ala Kownukondre afersi èn fu na tanbun fu den brada nanga sisa fu wi, awasi pe den de tu. Te wi e sidon e luku a wroko fu den wan di e teki fesi na ini a gemeente èn den wan di abi na tiri fu a programa di e bradi en srefi go na a heri grontapu, te wi abi fu du nanga sma di siki na yeyefasi, ofu te wi e suku wan lusu gi pikin ofu bigi problema, den sani disi de afersi di wi alamala musu fruteri Yehovah ini begi (1 Tes. 5:25; Yak. 5:14-16). Iya, wi musu poti wi broko-ede na fesi Yehovah, nanga ala frutrow taki awasi san wi e aksi tu na ini akruderi nanga en wani, a sa yere wi (1 Petr. 5:7; 1 Yoh. 5:14). Meki wi de fayafaya ini a wroko gi a Kownukondre èn luku go alaten na Yehovah fu yepi wi fu tan meki froktu nanga horidoro.