Tyari beibri stukaman go na Yehovah organisâsi
1 Beibri stukaman musu kon sabi na organisâsi fu na ’wán ipi’ di Yeises ben taki fu en na ini Yohanes 10:16. Den musu frustan taki a de tumusi prenspari gi a frulusu fu den fu kon de wán nanga Yehovah organisâsi (Openb. 7:9, 10, 15). Fu dati-ede meki wi musu bigin tyari den beibri stukaman fu wi go na a organisâsi so esi leki a beibristudi opo.
2 Yepi yu beibri stukaman fu kon sabi den furu pisi fu Yehovah grontapu organisâsi. Fu di wi e waka na baka na fosi yarihondro patron, meki ala sma fu Yehovah pipri de wan pisi fu den gemeente di abi owruman, dinari ini na diniwroko nanga preikiman. Na ini a ten disi den memre fu na gemeente e prisiri fu fisiti feifi konmakandra ini wan wiki. Na bepaalde ten na ini a yari bigi konmakandra nanga kongres seti, èn den disi e gi ekstra leri èn so tu okasi fu abi demakandra nanga konpe kotoigi fu tra kontren. So srefi yu abi pionier, zendeling nanga opziener di e rèis, èn yu abi wan Tiri Skin tu di e tyari na wroko na a heri grontapu. Fa yu ben sa kan meki den beibri stukaman kon sabi den difrenti pisi fu Yehovah organisâsi? Fa yu kan yepi den fu si taki na organisâsi strukturu abi en rutu ini a beibri?
KOBROIKI NA TYARI KON NA WÁN NA A HERI GRONTAPU-BROCHURE
3 Na Den tyari kon na wân na a heri grontapu-brochure abi finifini tori fu Yehovah organisâsi. Nanga disi yu kan meki beibri stukaman kon sabi na organisâsi na wan progressief fasi èn yepi den fu kisi warderi gi na fasi fa a e wroko. Wan bun fasi fu bigin de fu taki san e psa na ini na Kownukondre-konmakandrapresi. Disi sa gi na stukaman tranga fu fisiti gemeente konmakandra. Taki nanga en fu den tori na tapu bladzijde 14 nanga 15 bifo yu kari en fu na fositron kon na a publiki taki. Poti en prakseri na tapu den prenki. Fruteri pe na Kownukondre-konmakandrapresi fu a presi pe a e libi de èn fa a tan. Kande yu kan meki a si srefi wan fowtow fu na Kownukondre-konmakandrapresi pe yu e go.
4 Taki nanga yu beibri stukaman fu bladzijde 20 nanga 21 te na fisiti fu na kringopziener meki bekenti gi na gemeente. Kobroiki den aksi ondrosei fu bladzijde 21 fu tyari den edepenti kon krin na fesi. Taki nanga en fu den beibri bakagron fu fa sani seti disiten gi wi fu di yu e kobroiki na fosi paragraaf tapu bladzijde 20. Den tori disi sa meki a fisiti fu a stukaman fu yu na a Kownukondre-konmakandrapresi de wan sani di wani taki wan sani gi en.
5 Taki na a srefi fasi fu san tanapu na tapu bladzijde 19, bifo a distriktkongres, kringkonmakandra ofu spesrutu deikonmakandra fu yu o hori. Poti en prakseri na tapu san e kon luku ini wan bigi kongres, èn sori tapu na internationaal fasi di de fu si ini na fowtow na tapu bladzijde 18. Te yu e gi kommentaar tapu a prenki pe wan nyun buku e gi fri, dan yu kan sreka en gi wan takimakandra moro fara fu bladzijde 24 nanga 25. Taki fu penti na tapu bladzijde 22 nanga 23 fu tyari kon a krin san a wortu pionier wani taki.
FITI NA STÓF NA SAN DE FANOWDU
6 Soleki yu kan si, a no de fanowdu fu bigin na a bigin fu na Den tyari kon na wán na a heri grontapu-brochure. Taki na presi fu dati, te na okasi èn na fanowdu e sori en srefi, fu spesrutu penti fu na brochure di sa yepi na stukaman fu warderi Yehovah organisâsi èn di sa gi en deki-ati fu moksi en srefi na a gemeente fu a presi pe a de.
7 Efu yu e taki nanga overtoigi te yu e luku den tori disi, dan dati sa poti wan stanpu di e tan na tapu yu stukaman. De faya ini yeye (Tori. 18:25). Ondrosuku èn si so srefi taki yu, leki a sma „di e leri wan trawan”, e gi wan bun eksenpre ini a sori fu warderi gi Yehovah organisâsi (Rom. 2:21). Na a fasi disi kande yu kan yepi trawan fu kon de wan pisi fu na wán ipi di Yeises e tyari go na têgo libi.