Tjari studenti go na a organisâsi di de na baka a nen foe wi
1 „A de wan boskopoe di e taki na ini moro leki 200 tongo. A de wan boskopoe di de foe jere na ini moro leki 210 kondre. A de wan boskopoe di e tjari go persoonlijk awansi pe sma de foe feni. A de wan pisi foe a moro bigi preikiwroko di grontapoe oiti sabi, wan boskopoe di e tjari miljoenmiljoen sma foe ala sei foe grontapoe kon na wán. Jehovah Kotoigi orga densrefi foe klari a wroko disi gi moro leki wàn hondro jari kaba!”
2 Na so a video Jehovah’s Getuigen—De organisatie achter de naam e bigin froeteri. A e go doro foe piki den aksi: Soema den Jehovah Kotoigi de troetroe? Fa a wroko foe den orga? Fa a wroko e tiri? Fa a e kisi moni? A e poti dipi na ini den sma di e loekoe en, a troetori taki „Jehovah Kotoigi na heri grontapoe kisi leri leki wan organisâsi, foe jepi den kompe foe den foe kisi froetrow na ini bijbel”, èn a e gi den deki-ati foe meki densrefi si na organisâsi di de na baka a nen foe wi. Baka di wan oema di ben e studeri ben si a video disi, a ben bigin krei foe prisiri èn foe warderi ede, èn a ben taki: „Fa wan sma no kan si taki disi na a organisâsi foe a troe Gado, Jehovah?”—Teki gersi 1 Korentesma 14:24, 25.
3 Wan tra oema ben studeri bijbel langa ten kaba, ala di a ben e stòp èn ben e bigin baka, ma a no ben man erken taki a Dri-wánfasi na wan falsi leri. Ne en nanga en masra ben kisi a video foe wi foe si. A video ben naki den ati kefalek èn den ben loekoe en toe tron a srefi neti dati. Na a tra leisi di den ben moesoe studeri, a wefi ben taki dati a wani tron wan Kotoigi. A ben taki dati a ben poti ala prakseri na tapoe a bribi di a ben bribi na ini a Dri-wánfasi èn taki a no ben loekoe na a organisâsi foe wi èn na den sma na ini. Nanga jepi foe a video a ben kon froestan taki a ben feni a troe organisâsi foe Gado. A ben wani bigin preiki oso-foe-oso wantewante. Baka di den ben tjari kon na krin gi en san ben de den prenspari sani di a moesoe doe bifo a kan tron wan preikiman di no dopoe, a ben taki: „Kon meki wi doe dati wantewante.” A ben poeroe en nen na en kerki, ben bigin nanga a velddienst wroko, èn a ben kon tron wan sma di sabi heri boen fa foe sori taki a Dri-wánfasi de falsi.
4 A sori krinkrin taki bijbel studenti e gro moro boen na jejefasi èn e gro kon lepi moro esi te den kon sabi na organisâsi foe Jehovah èn te den abi demakandra nanga en. A de prenspari foe si taki, baka di den 3000 sma ben teki dopoe na a Pinksterfesa, „den ben tan gi densrefi na a leri foe den apostel èn foe abi demakandra” (Tori. 2:42, foetoewortoe). A de prenspari taki wi e jepi den studenti foe doe a srefi sani na ini a ten disi. Fa wi kan jepi den?
5 Tjari a frantiwortoe: Ibri sma di e meki disipel moesoe froestan taki a de en frantiwortoe foe tjari a bijbel studenti kon na a organisâsi foe Gado (1 Tim. 4:16). Ibri ten te joe e studeri, joe moesoe si leki wan jepi foe doro a prisiri dei te a njoen sma sa simboliseer a gi di a gi ensrefi abra na Jehovah, nanga jepi foe dopoe na ini watra. Wàn foe den aksi di den sa poti gi en na a ten foe a dopoe ceremonia, na: „Oenoe e froestan taki a gi di oenoe e gi oensrefi abra na Jehovah èn a dopoe foe oenoe, e meki oenoe kon tron wan foe den Kotoigi foe Jehovah makandra nanga na organisâsi foe en di a e tiri nanga en santa jeje?” Foe dati ede, a de prenspari taki a e froestan taki a no kan dini Gado sondro foe abi aktief demakandra nanga a troe kresten gemeente.—Mat. 24:45-47; Joh. 6:68; 2 Kor. 5:20.
6 Tan leri a studenti sani foe a gemeente pe joe de èn foe na internationaal organisâsi di de na baka den Jehovah Kotoigi. Doe disi na ibri bijbelstudie lès, èn bigin na a fosi lès. Na a bigin kaba, joe moesoe kari a studenti kon na den konmakandra, èn tan gi en wan kari.—Openb. 22:17.
7 Gebroiki den wrokosani di gi: Den moro boen poeblikâsi foe wi, foe gebroiki den gi oso-bijbelstudie, na a brochure San Gado e aksi foe wi? èn a boekoe Sabi di e tjari joe go na têgo libi. Den ala toe e sori krin taki a de fanowdoe foe abi demakandra nanga a gemeente. A kaba foe lès 5 na ini a San Gado e aksi-brochure e taki: „Joe moesoe tan leri sabi Jehovah èn gi jesi na den sani di a e aksi foe joe. Te joe e go na den konmakandra na a Kownoekondre zaal foe Jehovah Kotoigi na ini joe birti, dan disi sa jepi joe foe doe dati.” Ibritron baka a Sabi-boekoe e gi a studenti a deki-ati foe abi demakandra na den konmakandra. Kapitel 5, paragraaf 22, e gi a kari disi: „Jehovah Kotoigi . . . na wan switi fasi e gi joe tranga foe teki prati nanga den na ini na anbegi di den e anbegi Gado ’nanga jeje èn nanga waarheid’ (Joh. 4:24)”. Kapitel 12, paragraaf 16, e taki: „Te joe e go doro nanga a studie disi èn e meki a tron joe gwenti foe go na den konmakandra foe den Kotoigi foe Jehovah, dan joe bribi sa kon moro tranga srefi.” Kapitel 16, paragraaf 20, e taki: „Meki a tron a gwenti foe joe foe go na den konmakandra foe Jehovah Kotoigi.” A e taki moro fara: „Disi sa jepi joe foe froestan a sabi foe Gado èn baka dati a sa jepi joe foe gebroiki a sabi foe Gado na ini joe libi èn a sa tjari kolokoe kon gi joe. Foe de wan pisi foe a kresten bradafasi na heri grontapoe sa jepi joe foe tan krosibei na Jehovah.” Kapitel 17 e taki finifini fa wan sma kan feni troe seikerfasi na mindri a pipel foe Gado. Te wi e studeri nanga tra sma, a de wi frantiwortoe foe poti krakti na tapoe den pisi disi foe a lès.
8 A brochure Jehovah’s Getuigen—Wereldwijd verenigd in het doen van Gods wil na wan toemoesi boen wrokosani di meki foe meki sma kon sabi a wan-enkri organisâsi di wi man si èn di Jehovah e gebroiki na ini a ten disi foe doe a wani foe en. A finifini bodoi di de na ini èn di abi foe doe nanga a diniwroko foe wi, nanga wi konmakandra, èn nanga wi organisâsi, sa gi a sma di e leisi en a deki-ati foe abi demakandra nanga wi foe anbegi Gado. Te wan bijbelstudie seti kaba, wi e rikomanderi joe foe gi a studenti wan eksemplaar foe a brochure disi foe leisi en gi ensrefi. A no de fanowdoe foe studeri a brochure nanga en, soleki fa wi ben doe dati fosi.
9 Den video di a Genootschap meki, na toemoesi boen wrokosani foe tjari studenti kon na a organisâsi di de na baka a nen foe wi. A ben sa boen efoe den ben kan loekoe ala den video: (1) The New World Society in Action, a film foe 1954 di ben sori a soepelfasi, a soifrifasi, èn a jeje foe lobi nanga san Jehovah en organisâsi e wroko; (2) Verenigd door Goddelijk onderwijs, di e taki finifini foe a switi wánfasi di ben de foe si na den internationaal kongres foe wi na Owstoe Europa, Zuid-Amerika, Afrika, nanga Asia; (3) Tot de einden der aarde, di ben poti krakti na tapoe a di foe feifitenti frijari foe a Waktitoren Bijbelskoro Gilead èn e sori a bakapisi di den zendeling ben abi na tapoe a preikiwroko na heri grontapoe (4) Jehovah’s Witnesses Stand Firm Against Nazi Assault, di e froeteri a span tori foe a deki-ati foe den Kotoigi èn a wini di den ben wini ala di den ben kisi ogri-ati froefolgoe foe Hitler; èn, a no de foe taki, (5) Jehovah’s Getuigen—De organisatie achter de naam.
10 Poti marki gi den konmakandra di den kan doro safrisafri: Wi moesoe tjari kon na krin gi den studenti taki a de fanowdoe foe abi a persoonlijk lès di wi e kisi na a oso-bijbelstudie èn so srefi den takimakandra leki wan klas, di e gi na den gemeente konmakandra (Joh. 6:45). Na a srefi fasi leki fa wan njoen sma e gro kon froestan den Boekoe foe bijbel, na so toe a moesoe gro kon froestan na organisâsi. Foe man doe dati, wan tra sani no man go na ini a presi foe a fisiti di wi moesoe fisiti den konmakandra (Hebr. 10:23-25). Bigin kari a sma kon wantewante na den gemeente konmakandra. Wan toe njoen sma di abi belangstelling e bigin fisiti den konmakandra srefi bifo den abi wan doronomo oso-bijbelstudie. A no de foe taki, dati wisrefi wani gi a joisti eksempre foe di wi e fisiti den konmakandra doronomo.—Luk. 6:40; Fil. 3:17.
11 Froeteri nofo sani foe den konmakandra èn fa den konmakandra e hori, so taki a studenti kan firi ensrefi boen te a e fisiti en fosi konmakandra. Foe di son sma no e firi densrefi switi te den e go na njoen presi gi a fosi leisi, a kan doe boen foe go nanga a studenti na a Kownoekondre zaal te a e fisiti en fosi konmakandra. A sa firi ensrefi moro fri efoe joe de nanga en te a e miti nanga den memre foe a gemeente. Ma moro prenspari, de wan sma di e ontfanga joe fisitiman boen, meki den firi taki wi e prisiri foe de nanga den, èn meki den firi boen.—Mat. 7:12; Fil. 2:1-4.
12 Gi a studenti deki-ati foe fisiti wan spesroetoe dei-konmakandra, kring-konmakandra, noso wan distriktkongres a tra leisi. Kande joe kan teki en na ini den sani di joe e sreka foe sani gi vervoer.
13 Poti dipi warderi na ini en: Georganiseerd om onze bediening te volbrengen (Orga foe doe wi diniwroko), bladzijde 94, e froeklari: „Efoe a de foe si na ini den takimakandra di joe abi nanga sma di abi belangstelling, taki joe abi dipi warderi gi Jehovah en organisâsi, dan a sa de moro makriki gi den foe gro na ini warderi èn a sa boeweigi den foe gro moro boen foe kon sabi Jehovah.” Taki ala ten na wan positief fasi, noiti na wan negatief fasi, foe joe gemeente (Ps. 84:10; 133:1, 3b). Te joe e begi na tapoe a bijbelstudie, taki foe a gemeente èn foe a de di a de fanowdoe taki a studenti abi demakandra doronomo nanga a gemeente.—Ef. 1:15-17.
14 Wi wani seiker taki den njoen sma e kisi dipi warderi gi a switi demakandra èn gi a seikerfasi na jejefasi di de foe feni na mindri a pipel foe Gado (1 Tim. 3:15; 1 Petr. 2:17; 5:9). Leki Jehovah Kotoigi, meki wi doe ala san wi man foe tjari studenti foe a Wortoe foe Gado, go na a organisâsi di de na baka a nen foe wi.
[Prenspari pisi na tapoe bladzijde 3]
Studenti e gro moro esi na jejefasi te densrefi e si na organisâsi
[Prenspari pisi na tapoe bladzijde 4]
No draidrai foe gi den studenti wan kari foe fisiti den konmakandra