Na ròl foe joe ini na bow gi na ten di e kon
1 Ini na ten disi kresten e tan gi den srefi gi wan jeje bowprograma di Jesus ben bigin so wan 1960 jari pasa kaba di a ben bigin tjari disipel kon na wán (Mat. 4:17; 7:24, 25, 28; Joh. 7:46). Jehovah blesi na wroko disi pasa marki (Odo 10:22). Ala di wi e go doro nanga na meki bekenti foe Gado kownoekondre, wi e bow so srefi foe sorgoe gi na gro ini na ten di e kon. — Preik. 11:6.
2 No wawan taki foeroe owroe Kownoekondre-konmakandrapresi moesoe kon meki njoen baka, ma ekstra konmakandra presi de fanowdoe toe pe njoen gemeente di opo kan kon makandra. Na jari di pasa na nomroe foe gemeente na ini Sranan gro nanga toe. Sondro moni nanga friwani wrokoman dan den bow projekt disi no kan kaba nanga boen bakapisi. Na positief fasi di fiti prèise nanga san den brada nanga sisa e sorgoe gi den fanowdoe sani disi, e kisi pai pasa marki. — Ps. 41:1; Odo 19:17; Preik. 11:1; Luk. 14:13, 14.
FOEROE SMA GI JEPI NA WAN LOBI FASI
3 Wi e sori wi lobi gi „na heri gemeenschap foe brada” foedi wi e gi bijdrage (1 Petr. 2:17). Den bijdrage di wi bijkantoro kisi sorgoe foe den sani gi difrenti konmakandra presi. Ma na fanowdoe e kon moro nanga moro bigi o moro a tjari kon na inisei wroko e go moro esi. Foe dati-ede Jehovah sa tan blesi na seti disi èn den owroeman moesoe de seiker foe den srefi taki den bijdragenbus gi na zaalbouw de foe sabi krinkrin èn taki ibri sma moesoe kan doro na en. Den bijdrage di den e kisi e kobroiki, makandra nanga na moni foe pai san ben leni, foe bow njoen kownoekondrezaal.
4 Na Genootschap nanga ala gemeente di e njanboen foe na seti, e tjari den dipi warderi gi den foeroe aparti sma nanga osofamiri di doronomo e gi wan bijdrage na a zaalbouw foe na Genootschap. Son gemeente teki resolutie na wan lobi fasi foe jepi trawan ala moen nanga moni.
5 Joe de bekwaam ini wan wroko di abi foe doe nanga na bow? Efoe dati de so èn joe man foe asisteri na a bow foe kownoekondrezaal, dan joe kan meki disi bekenti na den owroeman foe na gemeente èn na kringopziener. Na ini a heri kondre bekwaam friwani wrokoman de fanowdoe. Boiti foe dati dan na ondro tiri foe na bowkomte gi na heri kondre di na Genootschap poti, tra brada di bekwaam na jeje fasi e kisi skoro foe doe na fanowdoe wroko sotaki moro gemeente kan kisi jepi nanga den bow projekt foe den.
NA RÒL FOE NA BOWKOMTE GI NA HERI KONDRE
6 Na Bowkomte gi na heri kondre na ini wi kondre e gi jepi ini ala pisiten foe meki plan èn bow. Den brada di e sidon na ini a komte disi na owroeman nanga ondrofeni, èn den kan gi warti rai ini na tori foe bow foe eenvoudig èn moi kownoekondrezaal so srefi toe ini na kibri foe ten nanga moni. Foe na ondrofeni di den abi meki den kan jepi owroeman foe den gemeente djaso foe bosroiti efoe a ben sa de moro betre foe kenki wan kownoekondrezaal di ben de kaba ofoe foe bigin wan njoenbow, èn den kan jepi den foe bifo den go bai wan, foe bosroiti efoe na presi di den e proeberi foe kisi fiti nofo gi na njoenbow. Den kan jepi den owroeman toe foe loekoe finifini den kostoe foe na bow èn na waarde foe na kownoekondrezaal di de èn di kande moesoe seri.
7 A de wan froestan sani foe taki nanga na bowkomte gi na heri kondre langa ten bifo na bai foe wan gron. Na komte disi kisi na wroko foe asisteri na a bow foe kownoekondrezaal na ini Sranan kondre, èn den kan gi jepi nanga a bai foe gron. Den kisi lin di den kan kobroiki foe jepi brada foe kibri den srefi gi moeilekhèit di den kan miti te den ben sa bai gron. Ibri kringopziener abi na nen nanga na adres èn na telefoon nomroe foe na fesiman foe na komte èn kan gi na bodoi disi na den owroeman foe na gemeente efoe dati de fanowdoe.
8 Nanga jepi foe den lin di na Genootschap gi, na bowkomte gi na heri kondre e doe wan warti dienst gi gemeente foe dja te den e jepi den nanga a kenki foe wan oso èn njoenbow-projekt. Te den e bow, friwani wrokoman e poti a wroko, soso foe na ten di den abi den troetroe fanowdoe na tapoe a bowpresi, sotaki den no abi foe misi konmakandra ofoe velddienst aktiviteit foe na gemeente foe den. Wán memre foe na bowkomte ben taki: „Foe di doronomo wi e proeberi foe kobroiki den lin foe na Genootschap, dan dati jepi wi foe meki den fasi foe doe na bow kon moro eenvoudig èn kon moro esi.”
9 Na fasi foe wroko èn bekwaamfasi di den leri na den bow projekt disi ben abi boen bakapisi toe na wroko foe na boen foe na kongreshal. [Èn na ini den Verenigde Staten na so wan fasi brada nanga sisa srefi ben kan kisi asisteri na a bow agen foe sani na baka wan natuur ranpoe, soleki na orkaan Hugo èn na gronseki na ini a nordsei foe Californië in 1989. So srefi na ini a kondre dati den ben aksi wan nomroe friwani sma foe kon wroko wan pisiten na Bethel èn sonwan foe den e jepi nanga na wroko di e doe now fajafaja na ini Patterson (New York).] Trawan moksi den srefi nanga a Internationaal friwani bowgroepoe-programa èn e jepi nanga na bow foe bijkantoro na a heri grontapoe.
10 Alamala kan sori na froktoe foe switifasi foedi den e wroko makandra nanga den wan di e loekoe na bow aktiviteit. Den friwani workoman kan wroko nanga den foedi den e hori den srefi na den mofo di meki nanga den edeman foe na afdeling foe den, èn den wan di no e jepi troetroe na a bow, ma di tokoe de drape, kan gi jepi foedi den e gi jesi na ala den sani di den e sori den fisitiman na a bow presi, soleki den veiligheid seti. Na a fasi disi a fanowdoe wroko ’e doe dorodoro’ èn „nanga prisiri èn no nanga soktoe” (Tori. 14:26; Hebr. 13:17). Na bowkomte gi na heri kondre ben kan skrifi: „A wrokomakandra a mindri den gemeente ini na tori foe na kongreshal de wan aparti sani. . . . Den brada nanga sisa alamala e sori jeje lepifasi. A de wan prisiri foe wroko nanga den. Disi de wan projekt foe no frigiti noiti.”
PAI DEN KOWNOEKONDREZAAL BOW PROJEKT
11 Seti ini moni di kande de fanowdoe moesoe meki wantron na a bigin (Luk. 14:18-30). Den owroeman moesoe bosroiti efoe na gemeente kan pai den kostoe di abi foe doe nanga na projekt foedi den e ondrosoekoe foe bepaal (1) omeni den kan gi wantewante leki bijdrage foe tapoe den kostoe di abi foe doe nanga a bai foe na gron èn na bow, (2) omeni den kan leni foe na gemeente èn o langa den sa abi na moni foe kobroiki, èn (3) omeni den preikiman na sei den normaal kostoe foe meki sani, e prakseri foe gi leki bijdrage foe pai na moni baka efoe den ben leni en.
12 Baka dati den owroeman foe na gemeente di wani na horibaka na monisei foe na Bowfondsoe foe na Genootschap, moesoe taki nanga na kringopziener foe na projekt di den abi na prakseri èn den moni di de fanowdoe, èn en sa jepi den foedi a e meki na Genootschap kon sabi den fanowdoe foe den èn den finifini tori foe na projekt. Baka di na kringopziener seni den bodoi go na a Genootschap, dan na brifi e seni go langalanga na a gemeente di abi foe doe nanga a tori. Jepi na monisei e gi foe so fara na moni de foe kisi èn na fanowdoe de foe dati.
KIBRI WAN FAJA JEJE
13 Na a bow foe wan njoen kownoekondrezaal dan de fajafaja, abi faja foe doe sani èn wan positief jeje e jepi foe na projekt waka boen. Wi moesoe tan sori na srefi jeje efoe wi wani tjari foeroe sma moro kon sabi na waarheid èn e gi den deki-ati foe kon makandra nanga wi na ini a kownoekondrezaal. Foe so wan faja foe doe sani, sma e si wan krin sori foe warderi nanga leki bakapisi taki na fisiti foe den konmakandra e kren na wan fasi di joe kan si nanga ai èn na gemeente e gro na tapoe ibri kontren.
14 Ala di wi e go doro foe bradi na diniwroko foe wi èn span wi srefi krakti ini na wroko di didon na wi fesi, dan na blesi foe Jehovah sondro degedege sa tan wan pisi foe wi (Luk. 13:24). Wi no sabi omeni gro èn kon moro foeroe e wakti wi na ini a ten di e kon. Ma wi moesoe de klariklari foe gi ibri froedoe foe anbegiman di o kon na ini na ten di de na wi fesi wan switikon. Dati e aksi taki wi sreka wi srefi now. Foe dati-ede wi e begi foe na doronomo blesi èn tiri foe Jehovah. Meki a de sotaki wi alamala wroko makandra nanga Jehovah ini na bow gi na ten di e kon — na skin fasi, materieel fasi èn jeje fasi. Seiker a sa blesi wi te wi e sorgoe na wan joisti fasi gi den wan di na ini a lasti pisi disi foe den lasti dei e lon kon esi-esi na ini en kownoekondre-organisâsi. — Jes. 60:8, 10, 11, 22.