Kownoekondre zaalbow na ini Amerkankondre nanga Bakrakondre

¹ Te wi e loekoe a veld na heri grontapoe, dan a e gi wi wan switi firi te wi e si a bigi gro di na organisâsi foe Jehovah na grontapoe e ondrofeni. A jari di pasa, na ini Amerkankondre wawan, 246 njoen gemeente ben opo, ala di, ala nanga ala, ete 3288 gemeente ben opo na heri grontapoe. Foe di sani e gro so, a no de foe froewondroe taki moro Kownoekondre zaal de fanowdoe.

² Foeroe brada nanga sisa e sori wan kefalek aparti faja gi Jehovah en organisâsi èn den e horibaka gi en, foe di foe densrefi den e gi den ten nanga den goedoe foe den na Kownoekondre zaalbow. Den 75 Regionaal bowkomte di e wroko na heri Amerkankondre, e sorgoe gi den sani di den so wan 140 gemeente abi fanowdoe, ala di ibri wan foe den komte e doe dati na ini a kontren di den kisi leki toewijzing. Ibri jari den e bow pikinmoro 200 njoen Kownoekondre zaal èn ete 200 den e meki kon boen baka. Den dri Regionaal bowkomte di e wroko na ini Bakrakondre e sorgoe gi den sani di den so wan 140 gemeente abi fanowdoe, ala di ibri wan foe den komte e doe dati na ini a kontren di den kisi leki toewijzing: ibri jari den e bow pikinmoro siksi njoen Kownoekondre zaal èn ete siksi den e meki kon njoen baka. Den regionaal komte abi a frantiwortoe foe hori ai na tapoe den wroko disi, èn wi e warderi a tranga wroko foe den. A heri seti foe Kownoekondre zaalbow e doe foe di sma abi a kresten jeje foe gi èn foe òfer densrefi​—a de kontrari a jeje di someni sma na ini grontapoe e sori.​—2 Tim. 3:2, 4.

³ Foe di a Genootschap wani jepi foe meki den bow den Kownoekondre zaal na wán sortoe fasi, meki den gi den regionaal bowkomte wan pakèt foe bow-tekening gi Kownoekondre zaal di de akroederi den markitiki foe Amerkankondre, na tapoe CAD (Computer Aided Design/Drafting [bow-tekening di meki na tapoe computer]). Disi jepi taki moro mendri ten nanga moni foe den friwani wrokoman de fanowdoe. A jepi toe foe abi wan boen administrâsi foe a Kownoekondre zaal fonsoe foe a Genootschap. Now den owroeman e gebroiki den sortoe bow-tekening disi di de kaba. Baka di den kisi a njoen pakèt disi nanga bow-tekening, wán Regionaal bowkomte ben taki: „Wi ben breiti srefisrefi èn a ben span srefisrefi foe kisi a pakèt disi nanga bow-tekening. . . . Brada di abi ondrofeni foe meki bow-tekening èn foe bow, bereken taki wi kan wini 50 te go miti 60 procent foe a ten, te wi e gebroiki den njoen bow-tekening disi. Te wi e gebroiki a pakèt disi, dan dati sa jepi wi toe foe abi moro Kownoekondre zaal di meki na a srefi fasi.” Te gemeente e wroko makandra foe horibaka gi a meki di wi wani meki den Kownoekondre zaalbow na wán sortoe fasi, dan wi kan froewakti taki a lai sa kon moro lekti srefisrefi gi den foeroe architect, bowman, nanga aannemer di foe den srefi e gi a jepi foe den.

⁴ Friwani wrokoman e horibaka gi wan toemoesi boen wroko: A Genootschap de grantangi srefisrefi gi den foeroe friwani wrokoman di e jepi den Kownoekondre zaalbow. A e gi troetroe prisiri foe si fa doesoendoesoen friwani wrokoman na heri grontapoe e gi densrefi na ala sortoe fasi na a Kownoekondre zaalbow. A programa disi man waka boen, bika den friwani wrokoman abi a wani, den lobi foe gi sani, èn den abi a jeje foe wroko makandra, èn den e òfer ten di den ben kan gebroiki boen nanga den gemeente noso den osofamiri foe den (Ps. 110:3; Kol. 3:23). A lobi-ati fasi disi fa den e handri, meki taki den e froedini foe wi prèise, warderi, èn horibaka gi den dorodoro.​—Rom. 12:10; Hebr. 13:1.

⁵ Den brada aksi ala den sma di de bekwaam foe jepi den Regionaal bowkomte na tapoe fasti ten, foe vul wan formulier gi friwani wrokoman gi a bow foe Kownoekondre zaal (S-82). A gemeente e seni den formulier disi go na a regionaal komte, foe sori efoe a wrokoman doro den markitiki èn o ten wan wrokoman sa man doe a wroko. Efoe a status foe wan friwani wrokoman kenki, soleki te a froisi, noso te a poti na wroko leki dinari ini a diniwroko noso leki owroeman, dan njoen formulier moesoe vul wantewante èn a gemeente sekretarsi moesoe seni disi go moro fara. Te wan friwani wrokoman no e doro den markitiki moro, dan den owroeman moesoe taigi a regionaal komte wantewante na ini wan brifi. Te moro formulier de fanowdoe, dan den kan aksi disi na tapoe na alamoen Boekoe bisteri-formulier. A kring-opziener abi belangstelling toe gi den sma disi di gi densrefi nanga friwani foe doe a pisi disi foe santa diniwroko. Foe dati ede, ibri tron te a e fisiti a gemeente, a e loekoe den kopi foe den formulier di a gemeente e hori, nanga aksi na tapoe den formulier gi friwani wrokoman gi a bow foe Kownoekondre zaal.

⁶ Hori den bow kostoe lagi: Regionaal bowkomte kisi a rai foe orga wan inkoop-afdeling na ondro a tiri foe wan bekwaam owroeman. Den brada di e wroko na a afdeling disi e doe tranga moeiti foe feni boen prijs foe di den e teki difrenti wenkriprijs gersi makandra èn den e soekoe foe feni moro lagi prijs. Na so wan fasi, wan bosroiti kan teki foe si na soema den kan bai den sani disi èn sortoe materiaal moesoe bai. Son tron, te den e wroko na wan Kownoekondre zaal, bekwaam brada foe a gemeente dati e kisi a kari foe jepi na a afdeling disi.

⁷ Foe sorgoe taki den moni sa gebroiki na a moro ekonomia fasi, a Regionaal bowkomte moesoe feni ala den kostoe di e pai nanga a bowfonsoe boen fosi. Te wan njoen Kownoekondre zaal e bow noso te den e meki en kon njoen baka èn den e gebroiki friwani wrokoman foe den gemeente, boiti den wan foe a gemeente di sa hori konmakandra ini a zaal, dan a regionaal komte o tiri a wroko.

⁸ Den brada moesoe aksi foe ibriwan sma di den teki foe teken wan kontrakti foe doe wan wroko na wan Kownoekondre zaal, taki den sma disi moesoe abi wan verzekering di sa dèk den kostoe te wan wrokoman kisi mankeri èn den moesoe abi wan risikow-verzekering toe di e sori taki a gemeente de toe na ondro den sani di verzekering e dèk. Wan froeklari moesoe meki pe skrifi taki a gemeente mag hori den goedoe foe den sma disi efoe den no man pai den paiman.

⁹ Jepi tra bijkantoro nanga den sani di den abi fanowdoe: Son tron tra bijkantoro abi jepi fanowdoe foe den regionaal komte foe Amerkankondre noso foe tra kondre. Foeroe tron a jepi dati de fanowdoe na baka wan rampoe, te sani moesoe meki kon boen baka, noso foe skoro wan Regionaal bowkomte foe a kontren. A de wan troetroe boeweisi foe lobi, te frantiwortoe brada foe a kondre disi de klariklari foe rèis nanga den eigi kostoe foe go jepi na wan tra kondre. Te a Genootschap feni wan aanvraag foe wan bijkantoro boen, dan den teki wan regionaal komte, di kande na ini a pisi ten dati no abi so wan druk schema gi a bow foe Kownoekondre zaal na ini a kontren foe en, dan den kan gebroiki den na so wan fasi. Disi e meki taki sani e seti na wan orga fasi.

¹⁰ Foe di ala ten moro nanga moro Kownoekondre zaal de fanowdoe na ini tra kondre, meki a de prenspari foe gebroiki a moni di wi abi, so boen leki wi kan. Na ini a brifi foe 15 juni 1995 di ben seni go na ala gemeente na ini Amerkankondre, den ben kisi a deki-ati foe gebroiki so pikinso moni leki a kan te den e bow njoen Kownoekondre zaal èn te den e repareer den wan di de kaba. Den gemeente handri boen tapoe a brifi disi. So boen, soleki fa a ben meki bekènti na ini Wi Kownoekondre Dienst foe maart 1997, dan wan pisi foe a moni foe a Kownoekondre zaalbow fonsoe foe a Genootschap e gebroiki now foe leni moni gi gemeente na ini kondre pe moro Kownoekondre zaal de tranga fanowdoe, ma pe jepi no de nofo èn hebi problema de na ekonomia sei. Na ini Bakrakondre den abi a grani foe horibaka gi na Owstoe-Europa fonsoe.

¹¹ A Jaarboek 1997 ben poti krakti na tapoe taki moro Kownoekondre zaal de fanowdoe na son kondre. Foe eksempre, a e taki foe Oekraini pe 47 Kownoekondre zaalbow te leki now èn ete 56 trawan e bow ete. A nowtoe na ini den sortoe kondre dati de krin foe si srefisrefi. A verslag e froeteri: „Moro foeroe Kownoekondre zaal de fanowdoe na ini Rosiakondre. A nomroe foe Kotoigi e gro esi-esi drape, ma so wan 85 procent foe den gemeente di de na ondro a Rosia bijkantoro no abi fasti konmakandra presi. Na ini Zimbabwe, pe so wan 800 gemeente de, a ben de fanowdoe taki foeroe foe den moesoe kon makandra na opo presi. Disi ben tapoe wan toe foe den sma di kisi belangstelling no so langa ete, foe go na den konmakandra.” Den sortoe situwâsi disi de foe feni na ini tra kondre na ini Owstoe-Europa, Afrika nanga Latino-Amerika.

¹² Ala di a lobi foe moro foeroe libisma kon kowroe na ini den lasti dei disi, tokoe Gado en pipel e tan boeweisi taki den lobi makandra, wan lobi di pasa abra den skotoe di sma e poti foe ras nanga kontren ede (Mat. 24:12). Neleki wi hemel Tata, meki wi go doro foe sori a lobi disi, foe de klariklari foe horibaka gi a Kownoekondre zaalbow na Sranan. Te wi e doe dati, dan a sa tjari bigi blesi foe Jehovah èn en boen-ati kon gi wi.​—Mal. 3:10; Hebr. 6:10.