Go na fesi ini na diniwroko
1 Wan owroe odo di abi foe doe nanga go na fesi e taki: „Begin pe joe de, ma no tan pe joe de.” Fa a odo disi fiti gi go na fesi ini na diniwroko! Di joe ben bigin ini a diniwroko, kande joe ben man foe doe wan sjatoe pristeri nomo foe na Kownoekondre boskopoe. Ma efoe sensi na ten dati wantoe jari pasa kaba èn joe no pasa na pisi dati na ini a gro foe joe (fase), ma joe ben tan pe joe ben de, san joe kan doe dan?
2 Na fosi stap na foe aksi Jehovah na koni di de fanowdoe foe de wan bekwaam leriman (Odo 15:14; Jak. 1:5). Na di foe toe stap na foe handri akroederi na begi foe joe. Poti ten aparti foe leisi den pristeri di tanapoe na ini a Taki-go-taki-kon boekoe (Bakratongo). Soekoe foe feni wan di joe e firi taki joe kan gebroiki en nanga boen bakapisi, èn leisi na pristeri foeroe leisi baka te taki joe abi en krin na ini joe froestan. Na di foe dri stap na foe go makandra nanga den brada foe joe na ini a velddienst so taki joe kan doe na pristeri di joe ben sreka.
MATI FOE JEPI JOE
3 Kande joe e taki: ’A moro makriki foe taki dati leki foe doe dati.’ Dati de troe, ma foe dati-ede joe abi so srefi mati di kan jepi joe. Efoe joe jongoe, taki dan nanga joe papa nanga mama ofoe nanga preikiman di abi ondrofeni èn di de dinari di abi boen bakapisi. Aksi den foe gi joe rai fa foe taki nanga sma na den doro. Den sa gi joe kande na rai foe oefen makandra, so taki joe kan proberi na pristeri foe joe. Den kan prei na pisi foe na oso sma èn e tjari genstaki kon a fesi di wi gwenti foe jere na den doro. Nanga jepi foe oefen joe kan leri foe taki na wan bekwaam fasi nanga sma.
4 Joe abi tra mati ete di kan jepi joe. Wan toe pionier de di leri taktik foe preiki nanga jepi foe ondrofeni, èn foe a fisiti di den ben fisiti na pionierskoro. Na boekoestudie fesiman ofoe na dienstopziener abi kande na okasi foe wroko nanga joe doro foe doro èn foe sori joe moro fara fa foe taki èn fa foe taki-go-taki-kon nanga sma.
GO BAKA NA DENWAN DI SORI BELANGSTELLING
5 Wi abi na belangstelling foe gi sma di e teki na lektuur foe wi, moro jeje jepi. Dati wani taki taki wi moesoe go baka foe kweki moro belangstelling. Bifo joe o meki na go baka, prakseri dan foe san joe ben taki na a fosi fisiti, so taki joe kan taki moro dipi èn nanga boen bakapisi foe na tori di ben hari na belangstelling foe den. Hori na prakseri so srefi taki ala di wi e prani èn e gi watra, Jehovah e meki a gro. Aksi foe kisi na tiri foe en bifo joe o meki na go baka (1 Kor. 3:6; 2 Kor. 9:10). Te wi e leri trawan, dan wi srefi e go na fesi.
6 Na tra prenspari stap na foe bigin èn hori wan bijbelstudie. Efoe joe no ben doro na pisi dati na ini a gro foe na diniwroko foe joe, dan tan go na Jehovah ini begi èn aksi en foe jepi joe foe feni wan sma di gersi wan skapoe èn foe gi en njanjan. Joe sa feni kande taki a sa jepi joe foe loekoe fa wan leriman di abi boen bakapisi e hori wan bijbelstudie èn foe waka dan na baka den fasi foe gi leri foe en. Stoeka so srefi den bodoi di abi foe doe nanga gi leri so leki tanapoe na ini Na Waktitoren foe 1 november 1984, bladzijde 8-18 (Bakratongo). Foe di joe e sreka joe srefi na a fasi dati, joe sa de klariklari foe hori wan bijbelstudie te den begi foe joe kisi wan piki.
POTI MARKI ÈN DORO DEN
Foe doro marki so leki foe gi leri nanga moro boen bakapisi, meki go baka èn hori studie, e teki ten. Joe ben sa kan poti wan tra marki gi joe srefi, di foe na jepi- ofoe gewoonpionierwroko? Te joe e go doro foe go na fesi na ini a diniwroko, joe kan de wan fonten foe gi deki-ati na trawan. Joe kan ondrofeni foeroe blesi foe Jehovah te joe no e tan pe joe de, ma doronomo e go na fesi.