Prani nanga gi watra — den stap foe a meki foe disipel
1 „Mi prani, Apollos gi watra, ma Gado ben tan e meki a gro” (1 Kor. 3:6). So boen na apostel Paulus ben meki wi kon si dri fondamenti stap di abi foe doe nanga a meki foe disipel foe Krestes. Den toe fosi stap prani nanga gi watra, wani taki wan grani nanga so srefi wan frantiwortoe gi dienstknekti foe Gado di gi densrefi abra èn teki dopoe.
2 Disi e meki en fanowdoe foe wi preiki — na poebliki èn oso-foe-oso, na okasi èn na tra fasi. A abi na ini toe, foe leri sma foe ondrow ala sani, di Jesus komanderi, na wan fasi di e meki den e go na fesi (Mat. 28:19, 20). Na stap disi di den kari leki lasti, kan doe soso efoe wi e tjari gobaka na den sma di sori belangstelling, abi bijbel takimakandra nanga den èn hori wan bijbelstudie na den. Joe e sori taki joe de wan getrow kompewrokoman di e wroko makandra nanga Jehovah foe di joe e prani waarheidsiri èn moro fara e gi den a fanowdoe watra èn sorgoe? — 1 Kor. 3:9.
FROESTAN SAN DEN MAN ÈN SAN DEN ABI FANOWDOE
3 Ini Sranankondre ini a dienstjari 1990 wi ben prati moro leki 52.347 boekoe nanga brochure èn moro leki 405.000 tijdschrift! So toe 4.600 arkiman ben de na a Memrefesa, san ben pasa na gemiddelde nomroe foe den 1496 preikiman foe a jari dati krinkrin. A prati foe boekoe de wan prenspari pisi foe wi wroko ini a tori foe prani. Den waarheidsiri di wi e sai na a fasi disi, e gi wi toemoesi moi okasi foe a meki foe njoen disipel, ma a e boeweigi wi leki Gado kompe wrokoman foe meki gobaka na sma èn foe tan poesoe den foe den hori den belangstelling gi bijbel tori? Gemeentepreikiman na ini Sranankondre abi gemiddeld now 0,8 bijbelstudie. Wi abi na overtoigi taki na gemiddelde disi kan kon moro betre efoe ala preikiman sa froestan moro na frantiwortoe di densrefi abi foe go moro fara leki a fosi stap foe soso a prani foe a waarheidsiri èn ben sa feti na baka foe hori bijbelstudie di e go na fesi. Ala di a de so taki sonwan foe ala sortoe hendri ede no man hori wan ofoe moro bijbelstudie, a de boen dati ibri preikiman loekoe en eigi situwâsi baka.
4 A de moi foe si san den doe na ini son kontren. Joe abi gemeente nanga kontren pe joe abi foeroe froktoe èn di e gi raport pe wan preikiman abi gemiddeld wan te toe bijbelstudie. Na gro ini njoen disipel de a srefi leki a nomroe foe bijbelstudie di e hori. Disi e kon a krin na ini a Jariboekoe 1991 te wi agersi a gemiddelde nomroe foe preikiman na ini difrenti kondre nanga a nomroe foe bijbelstudie di den e hori.
5 Lobi gi sma di e doe boen tapoe a Kownoekondreboskopoe di wi e preiki, moesoe boeweigi wi foe wani hori wan bijbelstudie. Wi moesoe prati na lobi broko-ede, di Jehovah abi gi sma, na wan opregti fasi èn wi moesoe froestan taki a froeloesoe foe den abi foe doe nanga jeje gro (1 Petr. 2:2). So leki fa letterlijk prani abi watra fanowdoe foe gro, na so den sma di e sori wan bigin foe belangstelling gi na Kownoekondreboskopoe, no sa abi a gwenti foe bigin foe fisiti den konmakandra boiti efoe doronomo sma e gi den tiri, nanga jepi foe wan oso-bijbelstudie, foe go na Gado organisâsi.
6 Gi jesi foe wi sei e kon toe ini a prenki. Jesus ben taki dati den sma di tanapoe na a sei foe a waarheid e arki na sten foe en (Joh. 18:37). A ben komanderi den disipel foe en foe preiki èn gi leri, èn a ben gi den wrokosani foe kan doe a wroko dati. Nanga en toemoesi moi eksempel leki leriman, nanga dipi broko-ede di a abi gi sma, Jesus ben gi a patron di wi kan waka na en baka te wi e jepi trawan (Luk. 6:40; Joh. 13:13; 14:12). Na moeiti di wi e doe kan de wan bijdrage foe tjari froeloesoe kon gi wi so boen leki gi den sma di wi e gi leri. — 1 Tim. 4:16.
JEPI SANI FOE OPO BIJBELSTUDIE
7 Wan bekwaam wrokoman e soekoe den joisti wrokosani di a e piki foe a maksin di a abi foe e klari en wroko dorodoro. Leki sma di e gi leri wi abi wan kefarlek bigi nomroe foe poeblikâsi, pe joe abi na ondro brochure nanga traktaat, di de foe jepi wi foe doro sma ati di abi difrenti bakapisi nanga fasi foe si sani.
8 Son preikiman ben abi boen bakapisi nanga a gebroiki foe traktaat nanga brochure foe bigin wan bijbel takimakandra. A traktaat Libi na ini wan njoen grontapoe foe vrede e taki foe ofoe e kari foe eksempel, moro leki toetenti difrenti tekst foe tjari na moi howpoe disi kon a krin. Den tekst disi e gebroiki foe e bow difrenti bijbeltakimakandra di e gi deki-ati. Den brochure foe wi kan meki sma kon de bekènti nanga den fondamenti bijbel waarheid, na wan fasi di e naki den ati èn de makriki, èn gi den deki-ati foe go ondroesoekoe moro fara.
9 Joe sabi wan sma di kisi pikinso leri nomo ofoe di no man foe si boen? Joe proeberi foe gebroiki na brochure Njanboen foe têgo foe a libi na grontapoe! foe bigin wan takimakandra foe na bijbel nanga so wan sma, na wan fasi di e meki a go na fesi? Ete wan moi wrokosani na a „Loekoe!”-brochure foe san den bigin paragraaf e tjari a ososma tapoe koni fasi so fara, taki a wani sabi moro foe Gado pramisi foe a tamara. Èn a boekoe Joe kan libi foe têgo ini wan paradijs na grontapoe, di ben kon a doro ini 1982, ben boen srefisrefi foe jepi wan bigi nomroe foe den moro leki 1.700.000 sma di dopoe sensi a ten dati.
HANDRI NANGA FRANTIWORTOE NANGA SMA DI ABI BELANGSTELLING
10 Kande joe feni en wan boen sani foe loekoe a tapoe joe preikiman berichtkarta omeni boekoe, brochure nanga tijdschrift joe ben prati ini den 12 moen di pasa. A prati disi foe boekoe, de foe wan spesroetoe marki ede? Ofoe joe ben go moro fara leki soso a prani? Omeni foe den sma di ben sori nofo belangstelling foe teki wan toe foe wi boekoe, joe ben go fisiti baka wantewante? Joe ben go baka foe si efoe a siri di joe ben prani ben gro? Joe doe na tra stap, dati wani taki, a gi foe watra di de fanowdoe foe gi watra, èn joe ben begi Jehovah moro fara foe meki a gro? — Teki gersi Tori foe den Apostel 16:14 nanga 2 Tesalonika sma 3:1.
11 Kande joe no e tjari gobaka ofoe joe no e hori bijbelstudie foe di joe no e firi taki joe boen nofo. Leki fa a sori disi e kon moro foeroe foe a fasi fa joe e si sani leki foe di joe no abi a koni fasi dati nofo. Jehovah no ben seni en dienstknekti foe wroko sondro foe a gi den fosi, boen wrokosani èn meki den koni foe man doe dati. Nanga jepi foe en Santa Wortoe nanga organisâsi a e sreka wi foe „ibri boen wroko” (2 Tim. 3:16, 17; 2 Kor. 3:5, 6). Nanga jepi foe santa jeje, den bladzijde di druk nanga den markitiki di e gi nanga mofo nanga demonstrâsi di e gi na tapoe a podium, foe no taki ete foe libilibi eksempel foe den dienstknekti, di gi densrefi ini a dini foe Gado èn di abi na koni foe doe a wroko, di de klariklari foe jepi wi, a e gi wi san wi abi fanowdoe. Wi no abi moro hei leri foe a grontapoe fanowdoe foe hori wan bijbelstudie. Wi moesoe piki boen foe dati-ede tapoe a moro hei jeje leri di wi e kisi nanga jepi foe Jehovah organisâsi. — Teki gersi Tori foe den Apostel 4:13.
12 Wisrefi moesoe doe san den e gi wi nanga jepi foe Wi Kownoekondredienst, na theokrasia diniwrokoskoro, dienstkonmakandra nanga tra sani foe gi leri. Na apostel Paulus ben taigi den Hebrew kresten krin taki: „Ija, bikasi ala di, te joe loekoe en boen, joe ben moesoe de leriman nanga a ten na prakseri, joe abi wan sma fanowdoe agen di e leri joe foe na bigin baka den fosi sani foe den santa taki foe Gado” (Hebr. 5:12). Foe wan sma di e doe wan wroko difrenti jari kaba, sma kan froewakti taki a sabi fa foe wroko na wan koni fasi nanga den wrokosani. Te wi e sori opregti belangstelling èn fajafaja e doe moeiti, dan wi go na fesi ini a hori foe bijbel takimakandra sa de krin foe si. — Odo 12:24; 22:29.
13 Go baka èn taki moro fara foe bijbel tori nanga den sma di e sori belangstelling gi na Kownoekondreboskopoe, e kostoe wan sani ini a fasi foe ten nanga moeiti. Ma wi moesoe froestan taki a de di wi de ini waarheid, taki dati na wan sani di e sori Jehovah lobi nanga en no-froedini boenfasi. Disi ben kon a krin foe di wan sma ben gebroiki foeroe joeroe foe leri wi na waarheid na wan pasensi fasi. Na so lobi moesoe dwingi wi foe bai na fanowdoe ten èn gebroiki dati na a moro prenspari wroko disi foe a meki foe disipel. — 2 Kor. 5:14, 15; Ef. 5:15, 16.
14 Foeroe gemeente ben waka na baka a rai foe a Genootschap foe sreka sani foe neti preikiwroko. Den froekoe neti joeroe gwenti foe de wan boen ten foe tjari gobaka na den sma di ben sori belangstelling. Wan oso-foe-oso raport nanga soifri bodoi foe sma gi soema den ben preiki, de warti srefisrefi foe tjari gobaka di abi boen bakapisi èn foe bigin bijbel takimakandra. No troesoe den raport disi gowe na ini wan boekoe ofoe wan bijbel, foe frigiti den bakaten. Te wantoe wiki na baka, a kon so taki joe de na ini a birti, ne fosi joe e prakseri foe tjari wan gobaka, dan a tjans de taki a sma e kisi fisiti foe den wrokoman foe Satan, di e abi prisiri foe hari poeroe san kan de joe ben sai ini na ati foe a sma (Luk. 8:12). Joe sa meki den taktik foe Satan misi, foe di joe e go esi baka? Efoe joe sabi san na joe frantiwortoe èn abi warderi gi na grani di joe abi, joe sa go esi baka efoe disi man pikinso nomo. — 1 Kor. 9:16, 23.
FA FOE OPO WAN BIJBELSTUDIE
15 Foe opo wan bijbelstudie, a no de fanowdoe foe waka wan ofoe tra moeilek èn dangra pasi. Son sma e teki kande a pristeri di joe e pristeri den, foe hori wan oso-bijbelstudie na den, wantewante. Ma foeroe preikiman feni en moro boen foe no taki foe studie ma foe tjari na bijbel takimakandra go gewoon na a sei dati.
16 San joe abi fanowdoe na lobi gi libisma nanga wan opregti angri foe jepi den. Boen sreka de prenspari toe. Disi moesoe abi na ini a loekoe baka foe den penti di joe ben skrifi kande foe san joe ben taki kaba nanga a sma, so srefi a teki foe a fasi di joe o gebroiki foe go doro nanga a bijbeltakimakandra. Hori den ede lin foe san joe ben skrifi na prakseri. Joe wani teki wan toe tekst moro di e go foe a tori di joe ben taki kaba nanga en? Noso joe ben sa kan opo na traktaat noso a boekoe di a sma abi èn doe wan toe foe den fosi paragraaf nanga en? Joe kan teki wan tori gi san a ben sori belangstelling. Teki ini a bigin soso 10 te 15 miniti foe doe disi. Pikinso pikinso joe kan meki a ten kon moro langa, dati e anga foe a belanstelling di a sma e sori. Wan boen kroetoe foe joe sei moesoe jepi joe foe man foe si fa joe moesoe handri, èn o langa joe moesoe tan.
17 Ini a pisiten foe den jari di pasa toemoesi boen rai pasa marki ben gi foe jepi joe foe doe progressief stap foe meki disipel. Na ini den uitgave foe Wi Kownoekondredienst foe november nanga december 1990, dan leki wan pisi foe wan serie, boen artikel ben tanapoe di ben abi a nen: „Miti ati nanga jepi foe boen bijbelstudie” nanga „Tjari bijbelstudie go na Jehovah organisâsi”. Te joe e opo na Index pikinso ondro na edewortoe ”Bijbelstudie” den e sori joe go na ete moro boen bodoi.
18 Foe kisi wan idea fa joe moesoe hori wan bijbelstudie, joe moesoe loekoe boen san den e doe na a gemeente boekoestudie. A no de foe taki dati na wan bijbelstudie a no de fanowdoe foe takimakandra foe na ipi foe materiaal di joe ben gi a sma na fesi taki joe ben sa behandel. Joe moesoe fiti na foeroe foe a materiaal di joe sa behandel na den mogelijkheid nanga den fanowdoe foe na studenti. Boiti dati na dienstopziener nanga tra preikiman nanga ondrofeni noso pionier sa feni en wan toemoesi prisiri sani foe go nanga joe èn gi joe praktis rai foe a fasi fa joe kan hori boen bijbelstudie.
19 Te wi e froestan taki Jehovah e prei a moro prenspari ròl ini den moeiti di wi e doe foe jepi sma, dan wi no sa begi wawan foe feni wan sma nanga soema wi kan studeri, ma so srefi efoe sma di wi feni èn di abi belangstelling kan go na fesi. Wi moesoe abi na srefi fasi foe doe nanga fasi foe si sani leki di foe na apostel Paulus di a ben preiki gi kownoe Agripa: „Na fesi foe Gado mi ben sa wani tjari na winsi kon a krin taki awansi ini sjatoe ten ofoe ini langa ten no soso joe, ma so srefi ala sma di e jere mi tide, ben sa tron so leki mi” (Tori. 26:29). Paulus ben wani taki den arkiman foe en ben moesoe tron troe disipel foe Krestes, efoe gi disi now wan sjatoe ten ofoe wan moro langa pisiten foe persoonlijk jepi ben de fanowdoe.
20 A hori foe bijbelstudie e gi wi na okasi foe „preiki finifini foe a boen njoensoe foe na no-froedini-boenfasi foe Gado” (Tori. 20:24). Boen foeroe sma sa drai poeroe kande ete foe a doengroe go na a leti èn foe na makti foe Satan go na Gado (Tori. 26:18). Joe, leki aparti dienstknekti di gi joesrefi abra èn teki dopoe, moesoe doe joe pisi foe di joe e prani waarheidsiri èn gi na baka disi a fanowdoe watra nanga jepi foe bijbel takimakandra nanga doronomo oso-bijbelstudie. So boen joe kan abi bigi prisiri te joe e si taki sma e tron disipel èn den e moksi densrefi nanga joe ini a jepi foe trawan baka foe den tron disipel foe Jesus Krestes.