Wi ben moesoe de leriman, no soso preikiman
1 Sma taki dati „Jehovah Kotoigi troetroe doro na heri grontapoe nanga a kotoigiwroko foe den”. Fa disi ben man pasa? No nanga a makti noso krakti foe libisma, ma nanga a jeje foe Gado di e wroko na tapoe den foetoeboi foe en ala di den e gebroiki difrenti sani foe doe a komando di den kisi foe preiki èn foe gi sma leri.—Sak. 4:6; Tori. 1:8.
2 Den poeblikâsi na boen wrokosani foe doe a preikiwroko foe wi. Na ini den jari di pasa, Jehovah Kotoigi druk èn prati kefalek foeroe boekoe, pikin boekoe, brochure, tijdschrift nanga traktaat, foe jepi meki a Kownoekondre boen njoensoe bekènti. Den raport na ini a Jaarboek 1997 e sori taki a meki di wi ben meki poeblikâsi ben doro heimarki. Te nanga now, 91 miljoen eksemplaar foe a Nieuwe-Wereldvertaling ben druk. Na ini wán jari a nomroe foe Waktitoren nanga Ontwaakt tijdschrift di ben druk na ini Amerkankondre ben kren nanga 7,1 procent. Na ini Doisrikondre, a meki di den ben meki tijdschrift, ben kren nanga 35 procent. Moro leki a di foe dri pisi foe den tijdschrift di ben meki drape ben de gi a veld na ini Rosiatongo.
3 Foe san ede so foeroe poeblikâsi de fanowdoe? Na heri grontapoe, kefalek foeroe sma ben doe wan sani na tapoe a deki-ati di wi ben kisi foe gi kotoigi na ala presi pe sma de foe feni. Te moro foeroe foe wi e meki a kotoigiwroko foe wi kon moro bigi—na poebliki presi, na tapoe strati, na ini bisnis kontren—dan moro foeroe poeblikâsi e prati gi sma di e sori pikinso belangstelling. Foeroe foe den sma disi wanwantron, noso noiti, ben abi na okasi foe jere a Kownoekondre boskopoe bifo. Foe man sorgoe gi a fanowdoe disi, den gemeente abi difrenti poeblikâsi di den kan gebroiki na ini ala pisi foe a diniwroko.
4 San na a marki foe wi te wi e prati poeblikâsi? A marki foe wi no de wawan foe prati poeblikâsi. A komando foe meki disipel abi toe sei—preiki èn gi leri. Fosi, wi abi a grani foe preiki a boen njoensoe foe a Kownoekondre, foe meki sma froestan taki a de a wan-enkri howpoe gi a libisma famiri (Mat. 10:7; 24:14). Den poeblikâsi foe wi di abi den gron na tapoe bijbel na boen wrokosani di, foe wan langa pisi ten kaba, e sori taki den boen foe wiki a belangstelling èn foe gi tra sma sabi foe a Kownoekondre.
5 A di foe toe, efoe wi wani meki disipel, wi moesoe leri den sma ala den sani di Jesus ben komanderi (Mat. 11:1; 28:19, 20). So srefi, den poeblikâsi e plèi wan prenspari ròl na ini a poti di wi e poti a waarheid na ini na ati foe den studenti èn foe jepi den foe tron disipel.
6 Den sma di e teki poeblikâsi kan de ’jereman foe a wortoe’, ma wi no kan froewakti taki den sa tron doeman te no wan sma e jepi den (Jak. 1:22-25). Pikinso sma nomo sa tron disipel efoe wan sma no jepi den (Tori. 8:30, 31). Den abi wan leriman fanowdoe di e jepi den foe overtoigi den foe a waarheid di de foe feni ini den Boekoe foe bijbel (Tori. 17:2, 3). A marki foe wi na foe jepi den foe gro te leki den gi densrefi abra na Gado èn e teki dopoe èn foe oefen den foe bekwaam nofo foe gi tra sma leri.—2 Tim. 2:2.
7 A moro bigi fanowdoe di de, na foe abi moro leriman: Te wi e preiki, wi e meki a boen njoensoe bekènti na poebliki. Ma foe gi sma leri, wani taki dati wi moesoe leri wan sma na wan fasi di e meki a sma go na fesi. A preiki di wi e preiki e meki sma sabi a Kownoekondre boskopoe, ma a leri di wi e leri sma e jepi den foe teki a boen njoensoe èn foe doe sani na tapoe dati (Luk. 8:15). Wan sma di e gi leri, e doe moro leki foe meki wan sani bekènti; a e tjari sani kon na krin, a e taki-go-taki-kon nanga boen boeweisi, a e gi boeweisi, èn a e overtoigi sma.
8 Moro foeroe foe wi moesoe de leriman, no soso preikiman (Hebr. 5:12a). A prati di wi e prati poeblikâsi de wan prenspari pisi foe a wroko foe wi, ma foe doro a di foe toe marki foe wi diniwroko te foe kaba, e anga foe san wi e doe leki leriman. Ala di wi kan prisiri te wi man prati poeblikâsi, tokoe efoe wi wani doe wi diniwroko dorodoro, wi no moesoe si a prati di wi e prati poeblikâsi leki a lasti marki foe wi (2 Tim. 4:5). A prati di wi e prati poeblikâsi de wan boen wrokosani di e opo a doro gi okasi foe leri tra sma a waarheid.
9 Meki gobaka foe bigin bijbelstudie: Soleki fa a sori, dan wi alamala prati wan lo boekoe, brochure, nanga tijdschrift, èn nanga dati wi abi wan lijst nanga gobaka. Wi moesoe poti wan fasti ten foe go baka foe wiki a belangstelling. A moro prenspari marki foe wi te wi e go baka, a no soso foe prati moro poeblikâsi, ma foe gi den sma deki-ati foe leisi èn foe abi wini foe den sani di den abi kaba. O foeroe wisrefi ben o man go na fesi na jejefasi efoe wan sma no ben kon ibritron baka na wi foe jepi wi foe kisi soifri sabi?—Johanes 17:3.
10 Go baka na ala belangstelling nanga a marki na prakseri foe bigin bijbelstudie na ini a brochure San Gado e aksi foe wi?, noso na ini a boekoe Sabi di e tjari joe go na têgo libi. Den toe poeblikâsi disi e gi a Kownoekondre boskopoe na wan fasi di de makriki foe froestan. A San Gado e aksi-brochure abi wan finifini studie cursus di e taki foe den fondamenti leri foe bijbel. A Sabi-boekoe e meki wan sma man leri tra sma a waarheid moro finifini, ma tokoe na wan makriki, krin èn sjatoe fasi.
11 A leriprograma di meki makriki, soleki fa dati tjari kon na krin na ini na inlegvel foe Wi Kownoekondre Dienst foe juni 1996, e meki en makriki gi a leriman foe gi leri èn gi a studenti foe teki leri. Hori wan kopi foe na inlegvel dati so taki joe kan teki en wantewante foe loekoe den fasi fa joe kan gi leri èn den teknik di sori taki den e wroko boen. Wan toe foe den rai di a e gi abi foe doe nanga a fasi fa wi kan sori opregti persoonlijk belangstelling gi a studenti, ofoeroe materiaal wi moesoe studeri na ini wan studie, fa foe doe nanga den aksi di no abi foe doe nanga a tori di oenoe e studeri, fa a leriman nanga a studenti kan sreka densrefi na fesi gi a studie, èn fa foe tjari a studenti go na a organisâsi foe Jehovah. Te wi e gebroiki den rai disi, dan moro foeroe foe wi, so srefi den moro njoen sma, sa man hori bijbelstudie di e go na fesi.
12 Njoensoe foe boen bakapisi na ini a veld: A San Gado e aksi-brochure nanga a Sabi-boekoe sori taki den de warti jepisani foe meki sma kon tron disipel moro esi. Baka di wan brada na ini Bolifia ben kisi a San Gado e aksi-brochure, a ben gebroiki en wantewante foe bigin wan bijbelstudie nanga wan man. Fo moen na baka, na a distriktkongres, a studenti disi ben de wán foe den kolokoe sma di ben o teki dopoe!
13 Foeroe sma e kisi a firi foe gi den libi abra na Jehovah, baka te den kaba studeri a Sabi-boekoe. Na ini wán gemeente na ini Angola, a nomroe bijbelstudie di den preikiman ben abi, ben gro foe 190 te go miti 260 sma èn a nomroe sma di ben fisiti den konmakandra, ben kon toe tron moro foeroe, foe 180 te go miti 360 sma na ini fo moen nomo baka di den ben bigin gebroiki a Sabi-boekoe na ini a kontren dati. Sjatoe baka dati, a ben de fanowdoe foe opo ete wan tra gemeente.
14 Baka di wan brada ben bigin en fosi bijbelstudie na ini a Sabi-boekoe, a ben taki dati foe hori wan bijbelstudie de „makriki efoe a sma di e hori a bijbelstudie ben poti den aksi nomo, leisi wan toe tekst di fiti, èn e sorgoe taki a studenti e froestan a tori”. Ala di ala ten a ben prakseri taki soso kefalek bekwaam preikiman ben kan hori bijbelstudie di e go na fesi èn taki noiti ensrefi ben kan doe en, a ben kon froestan taki a ben man, èn a ben e taki: „Efoe mi man, dan ala sma man toe.”
15 Na te wi e hori bijbelstudie leki wan pisi foe a diniwroko foe wi, dan wi e doro a marki foe meki disipel. Den sma di kweki a koni foe teki prati na ini a pisi disi foe a diniwroko, feni taki a e gi troetroe satisfaksi èn e gi foeroe pai. Meki a de so, taki foe wi toe den kan taki dati wi „e preiki a kownoekondre foe Gado . . . èn e leri sma den sani di abi foe doe nanga Masra Jesus Krestes, nanga a moro bigi fri foe taki”.—Tori. 28:31.