Sreka joe pristeri foe maart
1 Ini maart wi o wroko nanga ala boekoe foe 192 bladzijde di tjari kon a doro ini 1983 noso fosi dati, noso a boekoe Troe vrede nanga seikerfasi — Fa joe kan feni dati? (Ware vrede en zekerheid — Hoe kunt u die vinden?) Iniwan foe den moi boekoe disi kan gebroiki gi a pristeri foe a boen njoensoe na difrenti fasi. Sondro degedege joe sa feni en praktis foe leri èn gebroiki wan noso alamala, foe den pristeri di den gi èn di e kon now.
2 Grontapoe — a têgo tanpresi foe libisma: Efoe joe wani foe bigin takimakandra nanga sma di e broko ede nanga grontapoe èn en kontren, proeberi a thema „Grontapoe sa tan foe têgo leki tanpresi foe libisma.” A tori disi de makriki nofo foe wiki a belangstelling foe sma di lobi na osofamiri libi, sma di lobi a natuur èn sma di lobi sabi sani foe a waarde nanga kefar gi a kontren pe sma e tan. A tekst di joe kan gebroiki na Psalm 104:5. Den e froeklari a thema èn a tekst ini a Troe vrede-boekoe, bladzijde 35, 36, paragraaf 5-7.
3 Baka di joe kari joe nen, joe kan taki:
◼ „Mi e tjari wan sjatoe fisiti foe taki foe a tori di foeroe foe wi e broko wi ede nanga disi. Grontapoe na a tanpresi foe wi èn sondro degedege joe toe e broko joe ede nanga a fasi fa sma e pori en. Sabiman èn sma di e poti prakseri na a kontren pe sma e tan, e warskow taki efoe den e tan doti grontapoe, a sa tron wan presi pe sma no man libi na en tapoe. Joe e si wan loesoe gi a problema? [Wakti pikinso foe meki na ososma taki wan sani efoe a wani dati.] Mi wani sori joe sjatoe san bijbel e taki na Psalm 104:5 foe a tamara foe grontapoe.” Leisi a tekst èn sori san skrifi ini paragraaf 5-7 tapoe bladzijde 35, 36 foe a Troe vrede-boekoe.
4 Den sa poeroe ogridoe: Foe wiki na belangstelling foe sma di e broko ede nanga ogridoe èn orlokoe, dan joe sa wani taki kande nanga den foe a thema „Ogridoe sa poeroe, so taki den di lobi Gado kan njanboen foe têgo foe libi èn vrede.” Psalm 37:9-11 e sori a penti disi èn den e froeklari en ini a Troe vrede-boekoe, bladzijde 86, 87, paragraaf 1-3.
5 Baka di joe kari joe nen leki fa a gwenti de, dan joe ben kan taki:
◼ „Joe denki wan ten sa kon taki wi no sa abi foe feti moro nanga ogridoe? [Gi na ososma pasi foe piki.] Bijbel e sori dja ini Psalm 37:9-11 tapoe wan loesoe di sa tan foe ala ten.” Leisi a tekst èn go na bladzijde 86, 87 ini a Troe vrede-boekoe foe leisi pisi di joe ben teki poeroe a mindri paragraaf 1-3.
6 A howpoe foe na opobaka: Foe di wantron ibriwan sma lasi wan lobiwan ini dede, a kan gi trowstoe foe bigin a takimakandra nanga a tori: „Kownoekondre tiri di sa gi libi baka na den dede lobiwan na ondro paradijs situwâsi.” Joe kan gebroiki Johanes 5:28, 29 èn sori san skrifi foe a tori èn a tekst di wi kan feni ini a Troe vrede-boekoe, bladzijde 102, paragraaf 20.
7 Joe ben sa kan bigin a takimakandra foe joe nanga a di foe dri inleiding na bladzijde 14 foe a „Taki-go-taki-kon”-boekoe èn dan joe kan taki:
◼ „Ten na ten moro foeroe foe wi e denki foe lobiwan di wi lasi ini dede. Ma joe e denki taki wi sa si den baka? [Gi na ososma na okasi foe taki san a e denki.] Gi foeroe sma di wi e taki nanga den, a e kon leki wan onfroewakti sani foe leri san Gado Wortoe ben pramisi èn taki a froewakti disi sa kon troe leti dja na grontapoe. Loekoe a pramisi foe bijbel na . . . ” Gebroiki Johanes 5:28, 29 èn moksi dati nanga san skrifi ini paragraaf 20 na bladzijde 102 foe a Troe vrede-boekoe.
8 Sreka èn gebroiki a moen disi wan noso ala den pristeri. A no moesoe de wan moeilek sani foe feni sani di den teki skrifi èn di fiti, nanga agersitori ini wan foe den boekoe di joe e gebroiki. Efoe sma e sori pikinso belangstelling, pristeri den dan wan traktaat di abi foe doe nanga a tori dati.