Bigin a takimakandra na wan gobaka
1 Foe abi boen bakapisi te joe e bigin wan takimakandra nanga wan sma di ben sori belangstelling na a fosi fisiti, dan proeberi foe bow joe takimakandra go doro tapoe san joe ben taki na a okasi dati a fesi. A marki na foe jepi a sma foe warderi a waarde foe den prakseri èn den boekoe di joe ben libi gi en a fesi.
2 Teki joe ten foe sreka joesrefi foe go doe a gobaka. Teki sani ini a boekoe di joe e pristeri, di kan wiki a belangstelling. Oefen a koni foe si omeni stòf joe moesoe gebroiki èn o langa joe sa tan. Ini moro foeroe kefal wan sjatoe taki-go-taki-kon foe wan noso toe penti boen kaba, boiti te a sma e sori wan aparti belangstelling. Loekoe den thema di e kon now:
3 Sortoe situwâsi wi kan froewakti taki den sa kon na grontapoe ini a ten di e kon efoe a moesoe de a têgo tanpresi foe libisma? A takimakandra disi abi en fondamenti tapoe Psalm 67:6, 7 èn Mika 4:3, 4, so leki fa den ben froeklari èn ben agersi disi ini a Troe vrede-boekoe na bladzijde 96-100.
Joe kan bigin a takimakandra foe di joe e taki:
◼ „Di mi ben fisiti joe a lasti leisi, dan wi ben taki-go-taki-kon foe na fasi fa Gado abi na prakseri taki grontapoe sa tan foe têgo. Ma mi ben libi wan aksi gi joe, di joe ben kan go prakseri foe en: Den sortoe situwâsi sa moesoe de foe si na ala sei? Mi breiti taki mi kan kon now baka foe prati a bijbel piki sjatoe nanga joe.”
4 San wi moesoe doe foe kan njanboen foe a libi ondro a Kownoekondre foe Gado. Joe kan taki foe a thema disi foe di joe e gebroiki Johanes 4:23, so leki fa den froeklari ini a Troe vrede-boekoe na bladzijde 93.
Foe bigin joe ben sa kan taki:
◼ „Mi feni en wan prisiri sani foe taki nanga joe foe a pramisi foe Gado foe tjari wan kaba kon na ogridoe. [Aksi a sma foe go teki en Troe vrede-boekoe.] Na aksi nanga san ibriwan foe wi moesoe broko wi ede, na: San wi kan doe foe de drape foe kan abi wini foe a kenki disi? Loekoe san Jesus ben taki ini Johanes 4:23, so leki fa a skrifi ini a boekoe foe joe na bladzijde 93.”
5 Sortoe sani di sma abi fanowdoe sa de ini a paradijs grontapoe? Joe kan gebroiki Mika 4:3, 4 nanga Jesaja 65:21, 22 noso Openbaring 21:3, 4 nanga Mateus 15:30, 31. Wortoe di fiti, skrifi ini a Troe vrede-boekoe na bladzijde 100-103.
Den bigin wortoe ben sa kan de:
◼ „Di mi ben de dja a [kari a dei] di pasa, wi ben taki foe a pramisi foe Gado opo den lobiwan baka foe dede èn poti den na wan paradijs grontapoe nanga jepi foe en Manpikin. San na wan toe foe den blesi di sma sa njanboen foe den na a ten dati? A boekoe foe joe e sori nanga jepi foe bijbel san sa de wan toe foe den blesi disi.” Tapoe a fondamenti foe den wortoe di skrifi na tapoesei, dan leisi wan noso toe foe den tekst di den teki foe bijbel èn wan toe pisi foe a boekoe, kande paragraaf 16 noso 21, 22.
6 Foeroe sma ben sori belangstelling gi a Kownoekondre boskopoe di wi e preiki. Ini foeroe kefal, wi ben si nofo belangstelling foe a sei foe den sma foe kan libi den boekoe foe wi gi den. Ini tra kefal, wi ben si warderi gi a fosi bijbel takimakandra foe wi. Dati ede, tjari gobaka na ala sma di ben sori belangstelling èn proeberi foe leri den a waarheid. — Mat. 10:11; 28:19, 20; Joh. 21:17; Opb. 22:17.