Wroko nanga boen bakapisi, oso foe oso
1 Ini a ten disi a „boen njoensoe” e preiki na heri grontapoe (Mat. 24:14). Na a fosi presi disi e doe nanga jepi foe a oso-foe-oso preikiwroko. — Tori. 20:20, 21.
2 A pristeri foe wi moesoe wani taki wan sani troetroe gi den sma di wi e miti. Man, oema nanga jongoe sma e difrenti ini den sani di e hari den prakseri. We, a ben sa de boen foe sreka difrenti sortoe bijbel tori, di so leki a froewakti de, sa hari a belangstelling foe den sma ini a kontren foe wi.
3 Meki boen gebroiki foe den poeblikâsi: A Libi foe têgo-boekoe e taki foe foeroe difrenti tori di e hari sma prakseri alape. Den eksempel, di joe kan si tapoe prenki noso di joe kan leisi, de jepisani di abi boen bakapisi. A boekoe e naki sma ati, èn a e jepi sma foe si taki a de fanowdoe foe den teki bosroiti, ija, foe kenki a bribi foe den, a fasi fa den e tjari densrefi, a fasi fa den de èn a fasi fa den e libi. Efoe wi sabi dorodoro san skrifi ini a Libi foe têgo-boekoe, dan nanga boen bakapisi wi sa man taki nanga sma foe foeroe sani. Disi sa jepi wi foe si omeni belangstelling na ososma abi.
4 Foe abi boen bakapisi ini a preikiwroko, wi moesoe sori opregti belangstelling gi na ososma (Fil. 2:4). Doe moeiti foe taki foe wan Kownoekondre thema di abi foe doe nanga a sma srefi èn den fanowdoe foe en. Proeberi foe kon froestan fa a sma e denki, foe di joe e poti aksi di fiti. Arki heri boen na den piki foe en. Den piki foe en kan jepi joe foe kon sabi sortoe tori e hari en prakseri. Wi wani jepi sma foe si a waarde foe a Kownoekondre boskopoe èn sori den fa den kan leri moro foe dati. Wan trowpaar ben taki dati den ben teki wan bijbelstudie bika a brada di ben naki na den doro ben sori opregti belangstelling ini a sma di den de.
5 Ini gebied pe wi wroko foeroetron: Foe kweki a fasi foe abi boen bakapisi, de spesroetoe prenspari ini gebied pe wi e wroko foeroetron. Wan diniwroko di abi boen bakapisi e jepi wi foe wi gebied kon moro bigi (wSR 88 15/7 blz. 6-10). Na presi foe wi doe leki noiti ete wi ben naki na a oso dati, wi kan taki foe a fasi fa na ososma ben handri na fesi èn gebroiki en foe na boen foe wi. Wi kan sori go tapoe na fosi fisiti foe wi èn teki dati leki fondamenti foe taki moro fara foe san ben taki a leisi dati. Den pristeri di den ben gi leki idea ini den fosi uitgave foe Wi Kownoekondre Dienst èn ini a Taki-go-taki-kon-boekoe, kan kenki pikinso so taki den e fiti den fanowdoe foe a kontren.
6 Na wan pasensifasi Jehovah e hori a doro opo, foe moro sma kan feni wini foe den Kownoekondre blesi. A diniwroko foe Jesus ben abi boen bakapisi, foe a lobi di a ben abi gi sma (Mark. 6:34). Wi e doe ala san wi man foe waka baka na eksempel foe en? (1 Pet. 2:21). Meki wi no hori wisrefi foe no abi wan dorodoro prati nanga boen bakapisi na a oso-foe-oso preikiwroko. — 2 Tim. 4:5.