Joe moesoe man foe tjari kenki kon ini joe diniwroko
1 Sma e taki, dati doe sani na difrenti fasi na a spesrei foe libi. Foeroetron, den difrenti fasi fa joe o taki wan tori kan meki a moro moi. Disi na wan sani di no de moro mendri troe ini wi diniwroko. Efoe wi no loekoe boen, wi doro-foe-doro pristeri makriki kan kon tron leki wan lolo di e drai. Foe e taki alatron baka den srefi inleiding agen èn agen kan kon froeferi gi wi èn so srefi gi den ososma. Foe dati ede, joe moesoe man foe tjari kenki kon ini joe diniwroko. Ma fa joe kan doe disi?
2 Na presi foe taki wan sani leki, ’Morgoe. Wi e fisiti den birtisma foe wi nanga boen njoensoe foe a Kownoekondre’, foe san ede joe no e prakseri foe fasi foe kenki den bigin wortoe foe joe? A Taki-go-taki-kon-boekoe e gi oenoe boen foeroe bodoi ini a tori foe inleiding. Na tapoe bladzijde 9-15, inleiding tanapoe di abi foe doe nanga 18 difrenti tori. Èn moro foeroe foe den tori abi toe, dri noso moro inleiding di kande joe ben sa wani gebroiki.
3 Efoe joe e gebroiki a brochure „Gado e broko-ede troetroe nanga wi?”, na inleiding disi foe a pisi „Libi/Kolokoe” na tapoe bladzijde 13 sa kan de wan jepi:
◼ „Wi e taki nanga sma di e broko den ede troetroe nanga a fasi fa a libi tan ini a ten disi. Foeroe sma e aksi densrefi efoe a kan, taki wan sma abi wan troetroe kolokoe libi? A brochure disi e gi wi wan penti di e gi deki-ati èn di e meki sma go denki.” Opo a brochure na bladzijde 25, èn leisi wan noso toe prenspari penti foe paragraaf 15 nanga 16.
4 Son Kownoekondre preikiman — jongoewan nanga njoenwan spesroetoe, ma moro owroewan srefi toe — ben kon si taki den kan doe wan moi pristeri na den doro te den e meki gebroiki foe den traktaat.
Wan jongoe preikiman ben sa kan gebroiki a traktaat „Njanboen foe na osofamiri libi” èn kan taki:
◼ „Mi abi wan sjatoe boskopoe gi joe foe na fasi fa Gado kan tjari famiri kon na wan ini kolokoe. Mi sa feni en boen foe gi joe a traktaat di abi a titel Njanboen foe na osofamiri libi.” A moro owroe preikiman di e wroko makandra nanga a jongoe sma kan teki a bosroiti baka dati foe go doro foe tjari moro prakseri nanga kommentaar kon na fesi, san e didon na a fasi fa na ososma e piki.
5 Efoe na ososma e sori belangstelling, a moro owroe preikiman kan taki:
◼ „A bijbel e gi bodoi ini a tori foe a joisti ròl foe a trowmasra, a wefi nanga den pikin ini a famiri seti. Foe di Gado na a Sma di seti na osofamiri na bigin, joe no e agri taki en de ini a moro boen posisi foe froeteri wi fa na osofamiri moesoe drai? Mi ben sa feni en wan prisiri sani foe jere joe meine tapoe na opregti rai foe bijbel gi osofamiri memre.” Dan leisi Efeisesma 5:22, 23, 28-31.
6 Efoe joe e pristeri Na Openbaring-boekoe, foe san ede joe no e poti krakti tapoe a positief loekoe tapoe a ten di e kon, foe san sani skrifi na Openbaring 21:3, 4? Leisi dan paragraaf 7 na tapoe bladzijde 303 foe a boekoe (Bakratongo). Aksi na ososma efoe a de wan troetroe sani foe sma bribi taki Gado sa meki den pramisi disi kon troe. Wan sjatoe takimakandra foe bijbel profeititaki di kon troe kaba, moesoe meki na ososma en bribi, taki Gado abi a makti foe blesi a libisma famiri, kon moro tranga.
7 Ala Kownoekondre preikiman wani abi prati ini a meki go na fesi foe theokrasia afersi, foe prani den siri foe waarheid pe a man èn kweki a belangstelling di ben sori. Te wi doe wi pisi, dan nanga prisiri wi kan libi ala gro di o pasa ini a ten di e kon ini Jehovah anoe. Wi abi a moro boen njoensoe foe prati nanga den birti foe wi. Efoe alaten wi de srekasreka, dan wi moesoe kan tjari kenki kon ini a pristeri di wi e pristeri a Kownoekondre boskopoe èn a gebroiki di wi e gebroiki wi froestan te wi e pristeri boekoe.