„Meki wi go na a oso foe Jehovah”
1 David ben piki nanga faja tapoe a kari: „Meki wi go na a oso foe Jehovah.” (Ps. 122:1) Na „oso” foe Jehovah foe san a tempel ben de wan prenki, ben de a konmakandra presi foe den sma di ben angri foe anbegi a troe Gado. A ben de wan santa presi foe seikerfasi èn vrede. Ini a ten disi a kresten gemeente na heri grontapoe na a „oso” foe Gado, wan „pilaar nanga horibaka foe na waarheid” (1 Tim. 3:15). Ala den seti foe kan kisi froeloesoe de foe kisi nanga jepi foe a kanaal disi. Foe dati ede „ala nâsi moesoe lon go na a kanaal disi”, efoe den wani njanboen foe den blesi di pramisi ondro Gado Kownoekondre tiri.—Jes. 2:2.
2 Na „oso” disi e teri moro leki 69.000 gemeente ini 229 kondre. Den doro foe den Kownoekondrezaal na heri grontapoe tanapoe opo èn moro leki fo miljoen faja wrokoman e tjari a kari: „Kon! . . . Meki ibriwan sma di wani, teki a watra foe libi foe soso” (Openb. 22:17). Foeroe sma ben jere a boskopoe disi èn ben piki nanga warderi. A ben naki trawan ati, ma den no kon ete na a oso foe Jehovah foe soekoe demakandra nanga a kresten gemeente. Den sortoe sma disi abi wan „jeje nowtoe” di kan kon lekti nanga jepi foe sani di seti èn di de foe feni ini a gemeente wawan (Mat. 5:3). Wi e libi ini kefarlek ten, pe a kaba foe a seti disi e kon esi. Wan mi no ke fasi noso wan fasi foe tweifri kan abi leki bakapisi draidrai di de wan kefar. A de tranga fanowdoe taki sma e doe moeiti foe „kon krosibei na Gado” foe di den e kon moro krosibei foe en organisâsi (Jak. 4:8). Fa wi kan jepi den?
3 Poti a belangstelling foe sma go tapoe na organisâsi: Foe a fosi kontakti nanga sma di abi belangstelling, wi moesoe poti den prakseri go tapoe na organisâsi. Ala di wisrefi kande man foe soekoe bijbeltekst èn man foe froeklari fondamenti leri, wi no de a fonten foe a sabi disi. Ala sani di wi leri komoto foe na organisâsi, nanga tiri foe a srafoe-groepoe di e gi „njanjan na a reti ten” (Mat. 24:45-47). Na a bigin kaba den njoen sma moesoe sabi taki a troe anbegi wani taki moro leki wi wawan noso srefi a gemeente pe wi de; wi abi wan theokrasia genootschap, na heri grontapoe, di orga èn e wroko ondro a tiri foe Jehovah.
4 A tiri di wi e kisi, abi en bigin na Jehovah, di pramisi foe tiri wi èn leri wi (Ps. 32:8; Jes. 54:13). A leri disi e prati ini a fosi presi nanga jepi foe den lektuur foe wi. Efoe wi man jepi den sma di abi belangstelling foe kisi moro bigi warderi gi den lektuur èn foe erken den leki a fonten foe leri di e kibri sma libi, dan moro esi den sa abi a firi foe leisi a boskopoe di ben tanapoe na ini èn fiti en na ini den libi na presi foe trowe en esi-esi. Wi moesoe pristeri èn gebroiki a lektuur disi ala ten na so wan fasi, taki wi e bow respeki gi en na sma. Disi e leri njoen sma foe warderi na organisâsi èn foe froetrow tapoe den sani di na organisâsi seti.
5 Meki den sma di abi belangstelling sabi taki ini a birti foe den wan centraal konmakandra presi de pe doronomo leri e gi. Gi den na adres foe a Kownoekondrezaal nanga den ten foe den konmakandra. Froeklari san na den difrenti na mindri den konmakandra foe wi nanga den kerki konmakandra di den kande ben e fisiti fositen. Ibriwan sma wi e bari wan switi kon; den no e piki moni noso e aksi sma aparti foe gi moni. Ala di dinari, di ben poti, e tiri den programa, tokoe ibriwan sma abi na okasi foe teki prati foe di den e gi piki èn abi wan prati na den pisi foe a programa. Osofamiri wi e bari wan switi kon; pikin abi prati na den bijbel takimakandra foe wi. Den dinari foe wi no e weri spesroetoe krosi noso djakti. A Kownoekondrezaal meki moi èn a no abi kandra noso popki. Moro foeroe foe den sma di e fisiti den konmakandra na sma di e libi ini a birti.
6 Poti a belangstelling foe den bijbelstudie go safrisafri tapoe na organisâsi: A moro prenspari marki foe wan bijbelstudie na foe leri a waarheid foe Gado Wortoe. A moesoe bow so srefi warderi na a studenti gi Jehovah organisâsi èn meki a sabi o toemoesi prenspari fanowdoe a de foe de wan pisi foe en. A bigi wroko di Jesus nanga den disipel foe en ben e doe ini a fosi jarihondro, ben e hari opregti sma èn ben tjari den kon na wan foe doe wroko ondro wan centraal tiri skin. Ini den libimakandra pe sma ben e doe boen tapoe a wroko disi, den ben opo gemeente foe gi leri nanga rai doronomo. Sma di ben kon tai nanga den gemeente disi, ben kon krakti na jeje fasi èn ben kisi jepi foe horidoro ini ten foe tesi (Hebr. 10:24, 25; 1 Petr. 5:8-10). Ini wi ten a de a prakseri foe Gado „foe tjari ala sani kon na wan baka ini a Krestes” (Ef. 1:9, 10). Leki bakapisi wi abi wan „gemeenschap foe brada” na heri grontapoe.—1 Petr. 2:17.
7 Ini na alawiki bijbelstudie wi moesoe abi so srefi rai di sa jepi den studenti foe warderi na organisâsi èn feni wini ini den seti foe den kisi froeloesoe. Teki ala wiki wan toe miniti foe froeteri wan sani noso foe tjari sani kon a krin foe na organisâsi èn a fasi fa a e wroko. Ini A Waktitoren foe 15 maart 1985 (bakratongo), joe kan feni moi penti foe takimakandra. Den brochure Jehovah Kotoigi ini a di foe twenti jarihondro nanga Jehovah Kotoigi—E doe Gado wani na heri grontapoe ini wánfasi e taki foe den moro prenspari sani foe na organisâsi èn e tjari kon a krin fa wi kan abi wini foe dati. Efoe joe ben man foe sreka sani foe den bijbelstudenti kan si a video Jehovah Kotoigi—Na organisâsi baka a nen, dan densrefi ben sa kan si san na organisâsi e doe. Njoensoe nanga ondrofenitori di piki poeroe foe a Jariboekoe kan meki den si a boen bakapisi foe a wroko ini tra kondre èn koeltoeroe. Oenoe kan gebroiki tra boekoe toe. Te ten e pasa dan foetoe foe foetoe joe kan froeklari den sani so leki foe san ede wi e go oso-foe-oso, a marki foe wi konmakandra, fa wi doe kon na a moni foe doe a wroko èn o bigi den aktiviteit foe wi de na heri grontapoe.
8 Leri foe sabi tra Kotoigi, kan wroko positief tapoe njoen sma èn gi den wan moro bradi loekoe tapoe a gemeente. Foe dati ede, kari ten na ten tra preikiman foe de nanga joe na a studie. Wan sma ini a gemeente nanga a srefi sortoe bakagron noso wan sma di abi belangstelling gi densrefi sortoe sani, kande kan meki a studenti si sani moro bradi èn na wan tra fasi. Kande wan owroeman kan go nanga joe soso foe kan leri sabi a sma. Sreka sani meki a kringopziener noso en oema fisiti a sma, kan sori wan troetroe blesi. Efoe Kotoigi e libi krosibei ini a birti, joe kan meki den kon sabi a bijbelstudenti èn kande gi en moro foeroe deki-ati foe fisiti den gemeente konmakandra.
9 Gi njoen wan deki-ati foe fisiti den konmakandra: Njoenwan moesoe froestan o prenspari a de foe fisiti den konmakandra. Proeberi foe wiki den belangstelling. Meki den si foe sortoe artikel den sa taki na a Waktitoren-studie. Kari den titel foe poebliki taki di den sa hori. Froeteri edepenti foe a materiaal di den sa taki foe en tapoe a Theokrasia Diniwroko Skoro èn a Gemeente boekoestudie. Froeteri fa joesrefi e prakseri foe den sani di joe e leri tapoe den konmakandra disi èn foe san ede joe e firi a fanowdoe foe de drape. Efoe joe man, pristeri den foe go teki den. Wan telefon kari bifo a konmakandra kan de wan aparti deki-ati gi den foe kon.
10 Efoe wan bijbelstudie e kon na wan konmakandra, sorgoe taki joe gi en wan switi kon. Meki a leri sabi trawan èn so srefi den owroeman. Efoe a kon na a poebliki taki, meki a leri sabi a takiman. Tjari en lontoe ini a Kownoekondrezaal. Froeteri en san na a marki foe a lektuur nanga tijdschrift tafra, den bijdrageboksoe, a bibliotheek (a presi pe joe man go leni boekoe) nanga a jaritekst. Meki a sabi taki a zaal no de wan oso foe anbegi wawan ma so srefi wan presi foe orga a preikiwroko ini a birti.
11 Froeklari fa den konmakandra foe wi e hori. Meki a studenti si den poeblikâsi di wi e gebroiki. Sori en taki bijbel de a moro prenspari leri boekoe foe wi. Ibriwan sma kan abi prati, srefi den pikin. Froeteri den taki na Jehovah Kotoigi meki ala den pokoe nanga singi di de ini wi singi boekoe, foe wi kan gebroiki den na wi anbegi. Poti en prakseri tapoe den difrenti ini bakagron foe den sma di e fisiti den konmakandra. Taki positief foe na jeje foe switifasi èn a lobi foe teki sma na oso. A switifasi nanga a opregti belangstelling disi kan de wan foe den moro tranga sani di sa meki a studenti kon ete wan leisi.
12 Foe san ede kande sonwan no faja foe doe en: Foeroetron a de so taki, awinsi san joe e doe, son sma e tweifri foe kon moro krosibei foe na organisâsi. No gi abra toemoesi esi. Proeberi foe poti joesrefi ini den presi. So leki a sori, den no ben firi troetroe wan fanowdoe foe go na konmakandra, boiti na spesroetoe okasi. Kande memre foe den famiri noso krosibei mati e dwingi den. Kande den frede foe den birti sma di e taki ala sortoe sani foe broko den saka. Èn a kan toe taki difrenti sani, di kan poeroe den prakseri, e wroko foe di den abi ala sortoe sociaal nanga recreatie wroko di den e doe. Den e si den sani disi leki kefarlek bigi skotoe di den no man pasa; joe moesoe jepi den foe si sani na a joisti fasi èn foe „go loekoe san na den moro prenspari sani”.—Fil. 1:10.
13 Gi den reide ini bijbel foe horidoro. Poti krakti na tapoe taki wi alamala abi a deki-ati nanga a bow di den e bow wi na jeje fasi tranga fanowdoe, di wi e kisi foe di wi abi demakandra (Rom. 1:11, 12) Jesus ben tjari kon a krin taki gens foe famiriman no de wan regtfardiki reide foe wi no faja foe doe en (Mat. 10:34-39). Paulus ben gi wi a deki-ati foe wi no firi sjen foe meki sma sabi na poebliki taki wi na wan disipel foe Jesus (2 Tim. 1:8, 12-14). Den sani di joe wani doe gi joesrefi èn sani di kan poeroe joe prakseri joe moesoe man basi, noso den sa tron wan trapoe (Luk. 21:34-36). Den sma di de warti foe a blesi foe Jehovah, moesoe wroko nanga den heri sili, noiti nanga wan ati di prati (Kol. 3:23, 24). Leri foe abi warderi gi den sortoe bijbel gronprakseri disi, kan opo a pasi gi den foe go na fesi na jeje fasi.
14 Den doro tanapoe opo: Jehovah en oso foe troe anbegi hei pasa ala trawan. Ini 229 kondre na heri grontapoe a kari de foe jere: „Kon, . . . meki wi go na a bergi foe Jehovah, . . . èn en sa leri wi foe en pasi, èn wi sa waka ini den foetoe pasi foe en” (Jes. 2:3). Wan positief piki foe den njoenwan kan kibri den libi. Poti den belangstelling tapoe na organisâsi foe Jehovah, na wan foe den moro boen fasi fa wi kan jepi den.