Jepi bijbelstudenti foe sreka densrefi gi a studie foe den
1 Bijbelstudenti di ibri wiki e sreka densrefi gi a studie foe den, e sori wan troetroe belangstelling gi a studie èn nofotron den e go moro esi na fesi na jeje fasi leki den wan di no e sreka densrefi. Sontron wan studenti no e sreka ensrefi kande foe di a no sabi fa. A kan de fanowdoe foe leri en fa foe sreka ensrefi. Fa wi kan doe disi?
2 Teki foe sensi a fosi bigin pikinso ten foe de seiker taki a studenti e froestan taki a sreka di a e sreka ensrefi abi foe doe nanga persoonlijk studie. Foeroe sma, ala di den man leisi, no ben kisi a leri fa foe studeri. Studie 7 nanga 8 foe a Handleiding gi a Theokrasia Diniwroko-Skoro boekoe e gi foeroe rai di kan jepi joe, so taki joe man foe leri a studenti den sani di a abi fanowdoe.
3 Sori a studenti a waarde foe studeri: Joe kan sori a studenti joe studie boekoe pe joe ben marki noso poti strepi na ondro edewortoe nanga pisi lin. Sori en taki te a e loekoe frafra den pisi di marki, dati kan meki en memre den prakseri di a sa man foe taki nanga en eigi wortoe. Na so fasi a no sa kori ensrefi foe leisi wan heri pisi ini a boekoe te a e gi piki na tapoe den aksi. Boen leri na a penti disi sa jepi en foe gi warti komentaar baka ten na gemeente konmakandra. Den komentaar foe en sa sori dati a abi warderi gi a materiaal di den sa loekoe èn a sa sori o boen a e froestan dati.
4 Leri en foe gebroiki bijbel: A studenti moesoe leri fa foe feni den bijbeltekst di den e kari ini a studiemateriaal. Te a man doe disi boen, a sa froestan moro boen taki a de troetroe wan bijbelstudenti. Ala di ini a bigin a studenti sa moesoe meki gebroiki foe a lijst foe den bijbelboekoe di de na fesisei foe a bijbel, a moesoe kisi a deki-ati foe kon sabi boen fa ala den 66 bijbelboekoe e waka a wan baka a trawan. Te a e soekoe èn e leisi wan bijbeltekst, jepi en foe kon sabi a pisi di e horibaka gi a penti di den e taki foe dati ini a paragraaf di a e ondrosoekoe èn taki a no e go na a pisi di no abi langalanga foe doe nanga a studie foe a momenti dati.
5 Te a studenti e go na fesi, gi en a deki-ati foe leisi bijbel foe a bigin te na a kaba. Poti krakti na tapoe taki a heri bijbel de a Wortoe foe Gado di skrifi nanga jepi foe santa jeje èn taki troe kresten moesoe kisi njanjan foe en na jeje fasi.—Mat. 4:4; 2 Tim. 3:16, 17.
6 Meki a studenti kon sabi tra theokrasia verwijsboekoe: Te a studenti go nofo na fesi, a kan bigin gebroiki tra theokrasia verwijsboekoe. Nanga a koni foe si sani, gi en deki-ati foe soekoe tra bodoi ini den poeblikâsi foe a Genootschap di a sa kon sabi te a e go na gemeente konmakandra. Leri en fa foe gebroiki den spesroetoe sani foe a Njoen Grontapoevertaling, so leki „Bijbelwortoe Index”. Te a e bigin tjari en eigi theokrasia boekoe kon makandra, sori en fa foe gebroiki a Comprehensive Concordance, Taki-go-taki-kon nanga jepi foe den Boekoe foe bijbel, na Index èn Hulp tot begrip van de bijbel.
7 Efoe wi e leri bijbelstudenti fa foe sreka densrefi gi a bijbelstudie foe den, wi sa jepi den foe go doro foe go na fesi ini waarheid leki bekwaam bijbelstudenti, srefi baka te a persoonlijk oso-bijbelstudie foe den kon na wan kaba.