Jepi trawan foe abi warderi gi a waarde foe wi poeblikâsi
1 „A wortoe foe Gado abi libi èn abi krakti” (Heb. 4:12). Foe di den poeblikâsi foe wi, di gron tapoe bijbel, e jepi sma foe njanboen foe a krakti foe a Wortoe foe Gado, wi e gebroiki den foe wiki belangstelling gi bijbel te wi e doe okasi preiki noso te wi e go oso-foe-oso.
2 Boekoepristeri gi januari na ibri boekoe di abi 192 bladzijde èn di druk tapoe papira di kon geri noso di kon lasi kloroe noso iniwan di tjari kon na doro bifo 1980. Efoe den boekoe disi de foe kisi ini joe gemeente, sreka joe pristeri foe a Kownoekondre boskopoe tapoe so wan fasi, taki joe tjari a sma prakseri go na wan spesroetoe penti ini a boekoe di joe e gebroiki. Fa joe kan doe disi?
3 Fa foe sreka joesrefi na fesi: Foe bigin, poeroe wan sani di skrifi ini a boekoe di joe e gebroiki, di kande sa doro na ati foe opregti sma ini joe gebied. Baka dati, prakseri foe wan sani di pasa no so langa kaba, noso foe wan tori di ala sma e taki foe en, di joe ben sa kan taki sjatoe foe dati nanga na ososma, bifo joe poti en prakseri tapoe a sani di joe teki, di skrifi ini a boekoe. Kande wan tekst de di den kari noso di den skrifi poti, di joe ben sa kan leisi komoto na bijbel noso langalanga komoto na a boekoe, foe horibaka gi den sani di joe taki. Efoe a sma abi opregti belangstelling, dan joe sa kan pristeri a boekoe. Awansi fa a no fa, proeberi foe libi wan aksi noso wan prakseri gi en na baka, di joe kan gebroiki leki gron foe wan gobaka.
4 Foeroe gemeente abi wan toe eksemplari ete foe Den jongoe jari foe joe — Meki den abi boen bakapisi èn Arki a bigi leriman. Efoe den boekoe disi de foe kisi, foe san ede joe no e sreka na fesi foe kan abi takimakandra nanga jongoesma di joe e miti ini a gebied? Gi den deki-ati foe leisi wan foe den boen poeblikâsi disi. Efoe joe e pristeri A waarheid di e tjari joe go na têgo libi, joe kan gebroiki a fasi di den skrifi foe en na tapoesei, èn sreka joe srefi na fesi foe taki makandra foe iniwan prenspari bijbel leri di den e taki foe den ini a toemoesi boen jepi foe bijbelstudie disi.
5 Pristeri A soekoe di libisma e soekoe Gado: Kande joe man bigin wan takimakandra foe di joe e poti prakseri tapoe wan tori ini njoensoe di e tjari a doe di relisi abi foe doe nanga grontapoe afersi, noso na tra fasi e sori a krakti di relisi abi tapoe a libi foe sma.
Baka dati, poti wan aksi leki disi:
◼ „Fa joe e denki taki Gado e si den relisi sistema di abi krakti tapoe grontapoe afersi ini a ten disi? (Gi okasi foe piki.) A sa froewondroe joe foe kon sabi taki den gron leri foe ala den relisi disi de pikinmoro a srefi, èn dati den de kontrari srefisrefi foe den leri foe bijbel?” Efoe na ososma wani foe arki, sori en a lijst foe den tori di de na ini a boekoe èn froeklari sjatoe taki, tapoe sma di lobi relisi èn tapoe sma di no lobi relisi, a abi bigi krakti tapoe den libi. Tjari kon na krin taki a kan njanboen foe a sabi di a e kon sabi foe san ede a soekoe di libisma e soekoe Gado ben tjari sma go na tapoe so meni pasi èn no leri den fa foe kon sabi a troe relisi.
6 Sontron a sa fiti moro foe pristeri tijdschrift noso wan traktaat. Wi abi ala reide foe prisiri èn foe de fajafaja foe gi trawan deki-ati foe leisi den poeblikâsi disi, so taki den kan de srekasreka foe ondrofeni a krakti foe a wortoe foe Gado ini den libi, foe di den e waka baka den markitiki foe en.