Gebroiki den tijdschrift foe prati a waarheid
1 Ini a libimakandra foe disiten, reklame di no e gi troe tori, bidrigi politik pramisi, nanga falsi internationaal froeklari moro foeroe ben swaki a waarde foe bodoi di de troe èn di gron tapoe troe tori. A Waktitoren nanga Ontwaakt! de aparti na a fasi dati den wawan e meki a waarheid foe Gado Kownoekondre bekènti, èn e tjari kon na krin san ala sma moesoe doe foe njanboen foe den têgo blesi di a sa tjari kon.
2 Ini wán kondre wan ambtenari foe a „ministeria foe voorlichting” di ben abi warderi gi a waarde foe den toe tijdschrift disi, ben gi jepi nanga prisiri foe man kisi primisi foe prati den. A ben taki: „Mi e si A Waktitoren leki wan foe den moro boen tijdschrift; mi breiti srefisrefi foe jepi.” A de a grani foe wi foe jepi trawan foe di wi e prati den tijdschrift disi di kan gi sabi di e gi libi (Joh. 17:3). Fa joe sa pristeri den warti tijdschrift disi ini april? Kande den rai di e kon now sa de wan jepi gi joe.
3 Efoe joe e pristeri den bigin artikel ini a „Waktitoren” foe 15 mei, dan joe ben kan taki:
◼ „Wi e taki nanga sma foe a boekoe di seri moro foeroe leki iniwan tra boekoe na heri grontapoe. Joe sabi sortoe boekoe na dati? [Gi okasi foe piki.] Wi e taki foe bijbel. Wan toemoesi boen reide moesoe de foe san ede someni sma bai bijbel. A reide de foe feni ini 2 Timoteus 3:16.” Baka te joe leisi a tekst, poti krakti dan na tapoe penti di fiti, ini wan foe den artikel.
4 Noso baka wan sjatoe inleiding, joe ben kan taki wan sani leki disi:
◼ „Kande joe ben si taki ini den jari di no so langa pasa, sma na heri grontapoe e broko den ede moro nanga moro nanga den problema di pikin e ondrofeni. Sortoe problema di pikin abi èn di joe e broko joe ede nanga den, joe e si ini joe birti?” Gi okasi foe piki. Taki foe wan toe foe den serjoesoe problema di pikin e ondrofeni na heri grontapoe, so leki fa den taki foe den ini den bigin artikel foe na Ontwaakt! foe 8 mei, èn poti prakseri tapoe a loesoe di a Kownoekondre foe Gado e gi.
5 Ini joe raport pe joe skrifi den gobaka, kande joe abi wan lijst foe denwan di ben sori pikinso belangstelling ini a bigin, ma joe no ben abi boen bakapisi foe den. Kande joe no e firi wan fanowdoe foe tan go baka foe di den sma ben arki pikinso nomo. Ma kande joe man gebroiki a lijst disi foe bigin wan tijdschrift route. Te joe si wan artikel foe san joe e denki taki a sa hari a prakseri foe wan bepaalde sma, sorgoe taki joe fisiti a sma dati èn pristeri a tijdschrift.
6 A gi foe kotoigi na okasi: Disi na wan toemoesi boen fasi foe wiki belangstelling gi den tijdschrift. Foe sori na wan koni fasi den kafti foe den tijdschrift di e hari sma ai esi-esi, nofo kande foe bigin wan takimakandra. Wan sisa ben poti wan toe tijdschrift na tapoe en tafra so taki kompe-wrokoman ben kan si den te den e waka pasa; a ben man prati foeroe. Sorgoe taki joe tjari wan toe eksemplaar nanga joe, èn bigin foe pristeri den a moen disi te joe e go bai sani na wenkri, te joe e go na skoro, e rèi ini bus, noso te joe e miti tra sma na tra presi.
7 Nanga a jepi foe A Waktitoren nanga Ontwaakt!, wi ben feni piki tapoe prenspari aksi di abi foe doe nanga Jehovah nanga na anbegi foe en. Wi wani gebroiki den tijdschrift disi na ala fasi di wi kan, foe jepi trawan foe kon sabi „Jehovah, a Gado foe waarheid”. — Ps. 31:5.