Go baka pe joe ben feni belangstelling
1 Foeroe foe wi ben abi boen bakapisi foe prati tijdschrift nanga brochure. A de prenspari taki wi e go baka èn proeberi foe wiki a belangstelling moro fara. Den boen bakapisi foe wi te wi e doe dati, sa anga foe o boen wi e sreka wisrefi bifo wi e meki wan gobaka.
2 Prakseri taki moro foeroe jongoesma e broko den ede nanga den srefi sani di e trobi bigisma. Den tijdschrift foe mei foe Ontwaakt! abi artikel di e ondrosoekoe problema foe disiten na a fasi fa jongoesma e si den. Den artikel disi e gi koni foe man si sani di kan jepi den jongoewan, so srefi den papa nanga mama foe den, foe kon sabi sortoe sani de prenspari ini a libi.
3 Efoe joe ben libi na „Ontwaakt!” foe 8 mei na baka, dan kande joe wani foe pristeri ete wan foe di joe e pristeri a tijdschrift foe 22 mei. Joe ben kan taki:
◼ „A lasti tijdschrift di mi ben libi gi joe, ben taki foe artikel di e taki foe a howpoe gi pikin. Den jongoesma foe wi abi foe gro kon bigi ini wan grontapoe di no e gi foeroe howpoe gi a ten di e kon. Foeroe foe den e sori atibron gi den sani na wan fasi foe opo densrefi kontrari trawan. Ma sonwan de di e hori a balansi foe den èn e tan hori densrefi na hei marki. Na artikel disi ini a moro njoen Ontwaakt! e tjari kon na krin fa wan hei kroetoe-oso e hori baka gi a fasi fa wan tini e si sani. Mi e denki taki joe sa warderi san a abi foe taki.”
4 Joe kan bosroiti foe pristeri wan brochure foe di joe e bigin so:
◼ „Mi ben prisiri foe a sjatoe takimakandra di wi ben abi a lasti leisi, di wi ben taki foe a tamara foe a grontapoe disi. Joe kan prakseri fa a libi sa de djaso te Gado e tjari wan kaba kon na ogridoe nanga pina? [Sori a prenki tapoe bladzijde 31 foe a brochure San na a marki foe a libi — Fa joe kan feni en? (Bakratongo)] Loekoe ala den bijbeltekst disi tapoe bladzijde 29 nanga 30 di e taki foe den blesi di a Kownoekondre foe Gado sa tjari kon. [Teki wan foe den tekst, èn leisi en langalanga foe a brochure.] Mi ben sa wani foe libi disi gi joe.”
5 Te joe e go baka, dan kande joe sa kon sabi taki na ososma e kisi en eigi boekoe foe a fasi foe anbegi pe a de na ini èn a e feni taki dati nofo kaba. Joe ben kan taki:
◼ „Awansi sortoe fasi foe anbegi wi abi, foeroe foe den srefi broko-ede abi krakti tapoe wi alamala — ogridoe, kefarlek siki, broko-ede foe a libi kontren — a no so? [Gi okasi foe piki.] Joe e denki taki wan troe loesoe de gi den problema disi? [Leisi 2 Petrus 3:13.] A marki foe den boekoe foe wi skrifi tapoe bladzijde 2 foe A Waktitoren. [Leisi wán noso toe prakserilin di joe ben teki na fesi.] Foeroe sma di no de Jehovah Kotoigi e prisiri foe leisi den poeblikâsi foe wi, bika foe a boskopoe di e gi howpoe di de na ini, di abi en gron tapoe bijbel.” Efoe na ososma e piki na wan boen fasi, froeklari dan fa wi e gi bijbelstudie.
6 Joe ben kan bigin na a fasi disi:
◼ „A lasti leisi di mi ben de djaso, dan wi ben taki foe den sani di wi kan froewakti gi a grontapoe foe wi ini a ten di e kon. Fa joe e prakseri foe den njoensoe disi? [Kari wan toe njoensoe foe no so langa pasa di e gi sma broko-ede.] Te sma e jere foe sosortoe sani, dan a e meki den aksi densrefi san o pasa nanga a grontapoe disi, a no so? Wi e bribi taki den sortoe sani disi e sori taki wi e libi ini ‘den lasti dei’, di ben taki na fesi kaba ini bijbel na 2 Timoteus 3:1-5.” Baka te joe leisi den edepenti, dan joe kan aksi efoe a si sma tapoe san a froeklari dati e fiti. Go doro nanga wan takimakandra foe wan foe den ondro edepenti tapoe bladzijde 255-259 ini a Taki-go-taki-kon boekoe.
7 Efoe wi e sreka wisrefi boen na fesi èn e sori taki troetroe wi wani jepi, dan wi kan abi a froetrow taki den opregti sma sa arki. — Joh. 10:27, 28.