Go baka na sma pe joe ben libi tijdschrift nanga brochure na baka
1 Jesus ben gi den bakaman foe en deki-ati foe wroko nanga a marki foe meki disipel (Mat. 28:19). Dati wani taki moro leki foe libi boekoe na baka nomo; wi wani jepi sma foe gro na jeje fasi. Foe doe dati, dan wi moesoe go baka foe gi moro jepi na denwan di e sori belangstelling.
2 Efoe joe ben poti krakti na tapoe wan artikel ini wan foe den tijdschrift na a fosi fisiti foe joe, dan a ben sa boen foe taki makandra foe a srefi tori te joe go baka:
◼ „Di mi ben fisiti joe a lasti leisi, dan mi ben poti joe prakseri na tapoe wan artikel ini A Waktitoren (noso Ontwaakt!) di ben jepi wi foe froestan foe san ede a de fanowdoe foe ondrosoekoe bijbel. A marki foe Gado foe wan moro boen tamara gi a libisma famiri, abi foeroe foe doe nanga a Kownoekondre tiri foe en. Mika 4:3, 4 e skrifi foe a pramisi foe En, taki a Kownoekondre disi sa tjari wan kaba kon na ala orlokoe.” Baka te joe leisi a tekst, pristeri dan a „Loekoe!”-brochure, èn sori en a prenki tapoe a kafti. Loekoe a fosi paragraaf nanga den tekst di skrifi ini a paragraaf dati, èn sori taki Mika 4:3, 4 na wán foe den. Meki mofo gi wan gobaka foe go doro nanga a takimakandra foe paragraaf 2.
3 Efoe a gersi taki na ososma abi pikinso belangstelling nomo noso taki a no abi ten foe taki makandra, dan joe kan bosroiti foe meki en tron joe tijdschrift route:
◼ „Foe di joe ben sori belangstelling gi den tijdschrift di mi ben libi gi joe na baka, dan mi ben prakseri taki joe ben sa prisiri nanga den njoen eksemplaar. Mi e denki taki joe sa abi spesroetoe belangstelling gi na artikel disi.” Sori go na wan artikel di joe e denki taki a sa hari en prakseri. Aksi en efoe joe kan kon baka nanga den tra eksemplaar.
4 Efoe na ososma ben leisi den tijdschrift èn ben sori warderi gi den, dan joe kan bosroiti foe pristeri wan abonnement:
◼ „Foe di a sori taki joe e njanboen foe A Waktitoren, mi ben breiti foe tjari den moro njoen tijdschrift gi joe te den e kon na doro. Efoe joe ben sa wani, dan mi kan sreka sani foe meki den seni A Waktitoren gi joe doronomo nanga jepi foe post, so taki joe kan de seiker foe kisi ibri eksemplaar.” Efoe na ososma wani, dan joe kan taki dati a bijdrage na Sƒ 50,- gi wan jari.
5 Efoe joe ben libi wan brochure na baka, ma joe no ben abi na okasi foe demo fa wi e hori wan studie, dan joe kan meki plan foe doe dati te joe e go baka.
Foe eksempre, efoe joe ben libi a „Tiri”-brochure na baka, aksi na ososma dan foe go teki en eksemplaar èn taki:
◼ „Loekoe san bladzijde 3 e taigi wi foe a thema foe a boskopoe di Jesus ben preiki di a ben de na grontapoe.” Baka dati, taki sjatoe foe a bodoi tapoe bladzijde 3. Aksi na ososma san en e denki a moesoe doe foe kon sabi moro. Taki dan: „A de prenspari taki wi e froestan foe san ede wi abi Gado Kownoekondre so tranga fanowdoe. Mi ben sa wani foe kon baka èn foe taki makandra foe san ede wi moesoe loekoe na Gado Kownoekondre leki a wan-enkri howpoe foe wi.”
6 Wi abi difrenti sortoe brochure. Soekoe moi penti ini a wán di joe wani gebroiki. A sa jepi joe foe gi opregti sma deki-ati foe leri moro foe den sani di Jesus ben gi leki komando. — Mat. 28:20.