Jepi trawan foe leri a waarheid
1 Jesus ben kon na grontapoe foe kotoigi foe a waarheid. Foe meki trawan kisi a waarheid nanga jepi foe preiki, Jesus ben leri den disipel foe en foe de leriman. A ben de so overtoigi foe den boen bakapisi foe den disipel, ini a gi leri na trawan, taki a ben kari den ’poebliki leriman’ (Mat. 13:52). A ben teki ibriwan foe den gersi nanga wan koniman di abi wan maksin foe troetroe goedoe, foe pe a kan teki te a wani. Ini a ten disi, den disipel foe Jesus e gebroiki den poeblikâsi foe meki a Kownoekondre-preikiwroko go moro esi. Foe eksempre, foeroe gemeente abi difrenti sortoe brochure di den kan gebroiki foe jepi trawan foe tron disipel. Fa den kan gebroiki den warti wrokosani disi?
2 Foe bigin wan takimakandra di kan meki joe pristeri a brochure „Na Tiri Di Sa Tjari Na Paradijs Kon”, joe ben kan aksi:
◼ „Oiti joe aksi joesrefi, foe san ede den froewakti foe wan seiker tamara de so pikin, ala di libisma e doe so foeroe moeiti? [Gi okasi foe piki.] Bijbel e tjari kon na krin foe san ede so foeroe moeiti di sma doe, ben misi.” Leisi Psalm 146:3, 4. Baka te joe taki-go-taki-kon nanga na ososma foe den tekst disi, dan joe ben kan aksi: „Soema kan gi wi troetroe wan seiker tamara gi wan langa pisiten?” A fasi fa na ososma e piki, kan meki joe bosroiti foe taki foe penti di fiti foe bladzijde 30 noso foe seti sani foe doe so na wan tra ten.
3 Djaso na wan tra fasi fa joe kan gebroiki a brochure disi:
◼ „Foeroe sma e broko den ede nanga den situwâsi di joe e si tapoe den prenki djaso. [Opo bladzijde 22.] Foe di wan Gado foe lobi no ben sa kan hori baka gi boen nanga ogri na a srefi ten, dan san joe e prakseri foe a pramisi foe en di skrifi dja ini Jesaja 11:6-9?” Efoe a sma e gi wan komentaar di e sori taki a abi belangstelling, dan go na bladzijde 29, èn tjari kon na krin san Gado Kownoekondre sa doe.
4 Te joe e pristeri a brochure „Jeje foe den dedewan — Den kan jepi joe noso doe joe ogri? Den de troetroe?”, dan joe ben kan taki:
◼ „Gi foeroe sma a boen foe a libi kon tron noti moro leki soi, froeferi wroko. San joe prakseri, de fanowdoe foe meki a libi moro warti? [Meki na ososma taki san a e prakseri.] Bijbel e sori, taki Gado abi moro boen sani di e wakti wi. Loekoe san a e taki dja na Openbaring 21:4, 5.” Efoe a fiti, dan go moro fara nanga a takimakandra foe penti di skrifi na bladzijde 30 nanga 31 foe a brochure.
5 Te wan moro jongoe preikiman e gebroiki a brochure „Njan Boen Foe Têgo Foe A Libi Na Grontapoe!”, dan a ben kan aksi:
◼ „Joe ben sa wani foe libi ini wan grontapoe paradijs leki disi?” [Sori a fesisei nanga a bakasei foe a brochure, èn gi okasi foe wan komentaar.] Mi nanga mi osofamiri e howpoe foe libi drape troetroe, bika foe san bijbel e taki djaso ini Johanes 17:3.” Efoe joe e si taki a sma abi belangstelling baka di joe leisi a tekst, dan taigi a sma taki joe wani foe libi a brochure gi en foe leisi.
6 Efoe joe e gebroiki tra brochure ini joe diniwroko a moen disi, dan joe kan fiti den inleiding nanga den pristeri foe joe nanga den rai di skrifi na tapoesei. Memre foe hori en sjatoe èn foe taki positief sani di sa wiki a belangstelling foe den ososma.
7 Jehovah gi wi a waarheid kaba. Wi moesoe graboe den okasi hori di de na wi fesi foe prati a waarheid nanga trawan, nanga jepi foe den poeblikâsi èn nanga jepi foe den takimakandra foe wi nanga den sma di wi e miti. Na a fasi disi, wi e sori taki wi de poebliki leriman gi trawan di sa kisi têgo blesi foe dati. — Mat. 28:19, 20.