Fa den sa jere, efoe wi no e go baka na den?
1 „Fa . . . den sa jere sondro foe wan sma preiki gi den?” (Rom. 10:14) Na so a de, fa den sa froestan san a waarheid wani taki, efoe wi no e go baka na den nanga boen bakapisi? Ibri sani di wi ben kan taki nanga na ososma foe a Kownoekondre boskopoe, e froedini wan gobaka. A moen disi wi man go baka kande, foe go doro nanga wi fosi takimakandra, nanga moro bijbel prakseri foe iniwan sortoe brochure di wi ben libi na baka, èn dati kan tjari wi heri boen na wan bijbelstudie.
2 Efoe joe ben libi a brochure „Na Tiri Di Sa Tjari Na Paradijs Kon” na baka, dan joe ben kan bigin joe takimakandra di sa tjari joe na wan bijbelstudie, na a fasi disi. Ala di joe e sori tapoe bladzijde 31 foe a brochure, joe ben kan aksi:
◼ „Joe ben sa wani foe libi ini wan grontapoe pe wan seiker tamara de wan djaranti gi joe nanga joe osofamiri? [Gi okasi foe piki. Baka dati, go na bladzijde 24 nanga 25.] Wi alamala e angri foe disi, ala di foeroe sma no e bribi taki a kan. Gi Gado, di e pramisi wi disi leki wan sani di de seiker, a no de wan sani di no kan.” Leisi Jesaja 2:4 so leki fa a skrifi na bladzijde 24, noso leisi en ini joe bijbel. Go doro foe tjari kon na krin, taki nownow kaba sma de na heri grontapoe di e ondrofeni a prisiri nanga a vrede foe a jeje, di e kon nanga wan seiker howpoe foe a tamara. Taki makandra foe Johanes 17:3 nanga bladzijde 30 foe a brochure, èn baka dati froeklari fa wan studie foe a brochure, kan jepi na ososma foe leri moro. Efoe a sma abi belangstelling, dan seti sani foe tjari wan gobaka so esi leki a kan, foe go moro fara nanga a takimandra.
3 Te joe e go baka, baka di joe libi a brochure „Jeje foe den dedewan — Den kan jepi joe noso doe joe ogri? Den de troetroe?” na baka, dan kande wan sani leki disi sa abi boen bakapisi:
◼ „Na mi fosi fisiti, wi ben taki makandra foe na aksi: Wan Gado de di e broko en ede nanga wi? Joe e prakseri taki Gado e broko en ede nofo nanga wi, so taki a sa tjari wan kaba kon na njanpina nanga ogridoe? [Baka te a sma piki, dan go na bladzijde 28 nanga 29, èn go moro fara.] Gado pramisi kaba foe poeroe na ogri grontapoe disi, èn poti wan njoenwan ini en presi pe boen sma sa libi na tapoe, di sa man foe libi ini vrede nanga makandra. [Leisi Psalm 37:9, 10.] Joe nanga mi kan njanboen toe foe a libi ini a njoen grontapoe dati, efoe wi e bribi bijbel èn e fiti a rai foe en ini wi libi.” Taki foe a fasi fa wi e seti sani foe jepi sma stoeka bijbel.
4 Te joe e tjari wan gobaka, baka di joe libi a brochure „Zie! Ik maak alle dingen nieuw” („Loekoe! Mi e meki ala sani kon njoen”) na baka, dan joe ben kan bigin foe di joe e sori a prenki na fesisei èn baka dati poti na aksi:
◼ „Fa joe prakseri taki a ben sa de foe libi ini wan volmaakti grontapoe? [Meki na ososma gi komentaar.] San joe e si na a prenki disi, a no soso wan sani di sma kan prakseri foe dati wawan; a abi en fondamenti tapoe bijbel pramisi di de seiker. [Leisi Openbaring 21:4 nanga Psalm 37:11, 29.] Mi ben sa wani tjari kon na krin fa joe nanga joe osofamiri kan njanboen foe den blesi disi.” Efoe na ososma e sori belangstelling, dan go doro nanga a takimakandra, èn pristeri en wan bijbelstudie.
5 Te wi e feni opregti sma di e soekoe a waarheid, dan wi e sori troe lobi, foe di wi e go baka foe jepi den handri ini akroederi nanga san den jere. Wi e gebroiki den santa troe tori di wi kisi, gi a têgo blesi foe wisrefi nanga denwan di e arki. — 1 Tim. 4:16.