Kweki belangstelling na den sma gi a Libi foe têgo-boekoe
1 Te wi e go na den oso foe den sma, dan foeroetron wi e si taki a prakseri foe den de doronomo na tapoe „den sorgoe foe a seti foe sani disi” (Mark. 4:19). Wi e toeka nanga a tjalensi foe kisi a belangstelling foe den, nanga wan pristeri di e meki den go prakseri foe den sani di wi taki. Biginbigin, moro foeroe sma no abi someni belangstelling gi a boskopoe foe wi. Efoe wi kan taki wan sani di sa abi krakti na tapoe a libi foe den, dan kande wi kan wiki pikinso belangstelling ini a Kownoekondre boskopoe. Wan sroto foe bigin den takimakandra, na foe teki wan toe penti foe a Libi foe têgo-boekoe. Den penti disi moesoe hari a prakseri foe den sma. San joe ben sa kan taki?
2 Joe ben kan gebroiki a fasi disi foe bigin:
◼ „Efoe na joe ben abi a makti, sortoe bigi problema di e meki sma pina ini a ten foe wi, joe ben sa wani poti leti opo? [Gi okasi foe piki, èn efoe a fiti, dan agri nanga a sma taki foeroe sma e firi a srefi fasi toe.] Ini a pisiten pe wi doro nojaso, a e gersi taki den tiriman foe grontapoe no man loesoe den toemoesi moeilek problema di de nownow. Ma wán Sma de, di kan èn di sa tjari wan kaba kon na ala den problema di e meki a libisma famiri e pina srefisrefi. Grantangi loekoe san Psalm 145:16 e taki. [Leisi a tekst, èn sori go na den prenki na tapoe bladzijde 11-13.] Paragraaf 14, na tapoe bladzijde 14 e poti na aksi di wi ben taki foe en didjonsro èn a e go moro fara foe aksi: ’Ma oten disi sa pasa?’” Joe moesoe tjari kon na krin, taki a boekoe sa gi piki na tapoe na aksi dati, èn efoe a sma abi belangstelling, dan pristeri a boekoe.
3 Noso joe ben sa kan taki wan sani leki disi:
◼ „Kande joe sabi a lasi-ati di e kon te joe lasi wan lobiwan na ini dede. Kande a de so, taki joe ben sari èn taki joe ben firi dati joe no man doe noti srefisrefi. Kande joe prakseri foe den aksi disi: [Leisi den aksi ini paragraaf 1 na tapoe bladzijde 76.] A no ben sa de wan trowstoe foe kisi piki na tapoe den aksi disi? A kan gi joe deki-ati foe sabi taki bijbel e pristeri wan seiker howpoe gi den wan di dede. [Leisi Johanes 5:28, 29.] A boekoe disi e jepi wi froestan san e pasa nanga den dedewan èn sortoe howpoe de gi a ten di e kon.” Sori sjatoe go na kapitel 8 nanga 20. Efoe a gersi taki na ososma abi belangstelling, dan gi en na okasi foe ondrosoekoe san skrifi ini a boekoe.
4 A kan heri boen taki joe sa toeka nanga okasi foe gi okasi kotoigi. Efoe dati de so, dan joe ben kan taki nanga joe eigi wortoe, wan sani leki disi:
◼ „Nojaso grontapoe lai nanga problema, èn a no de foe taki dati joesrefi abi foe doe nanga den. A de wan sari sani, taki a gersi leki na den sma di no abi a fowtoe foe dati, e njan pina moro foeroe. Joe prakseri taki oiti Gado sa tjari wan kaba kon na ala a njan di sma e njan pina? [Gi okasi foe piki.] Meki mi sori joe san Gado pramisi foe doe gi den wan di e dini en. [Leisi Psalm 37:40 èn baka dati opo a Libi foe têgo-boekoe tapoe bladzijde 99.] A boekoe disi e tjari kon na krin foe san ede Gado gi pasi meki ogridoe de èn fa a sa tjari wan kaba kon na dati.”
5 Efoe joe na wan moro jongoe preikiman, dan joe ben sa kan gebroiki wan pristeri di abi en gron tapoe den prenki di de foe feni na tapoe bladzijde 156-158. Joe ben kan bigin, foe di joe e aksi:
◼ „Joe ben sa wani foe libi ini wan grontapoe so leki a wan disi? [Gi okasi foe piki.] Ibriwan foe den moi prenki disi, abi en gron tapoe wan pramisi di tanapoe na ini Gado Wortoe, bijbel. [Sori na tapoe wan toe tekst foe bijbel, di a boekoe e sori.] A boekoe disi kan jepi joe foe leri moro foe a pramisi foe Gado foe meki a heri grontapoe kon tron wan paradijs. A abi na ini en toe, bodoi di e kibri a libi foe sma, èn a e pai srefisrefi foe teki ten foe leisi en.” — Joh. 17:3.
6 Te joe e pristeri a boekoe, dan hori na prakseri foe meki den arkiman foe joe kon sabi, omeni a boekoe e kostoe.