Go na skoro baka
1 Na ini a moen oktober, den jongoe sma foe wi e kisi foe doe nanga a njoen skoro jari. Den kan froewakti wan toe prisiri sani, ma wan toe sani de toe, di kan tjari broko-ede kon. Foeroe jongoewan sa kisi tra leriman, sa bigin nanga wan njoen leri programa èn sa abi krosibei demakandra nanga studenti di den no sabi. Den jongoe sma foe wi wani wroko makandra nanga den edeman foe a skoro èn den wani sori switifasi gi den kompe studenti foe den, ma den jongoe sma foe wi moesoe hori na prakseri taki den moesoe tan de na ai gi ala sani di kan de takroe gi den na jeje fasi. — 1 Kor. 15:33.
2 Wan bigi broko-ede gi pikin nanga jongoewan foe Kotoigi, na foe wai pasi gi a porifasi di e kon foe grontapoe, di abi foeroe krakti tapoe a leri sistema na foeroe kondre ini a ten disi. Jongoe nanga owroe kresten moesoe abi deki-ati foe weigri foe teki den markitiki nanga a fasi foe denki foe grontapoe di e kon foe den moreel afersi foe grontapoe èn den kresten moesoe ’tan de na ai’ foe di den e soekoe rai nanga tiri foe a Wortoe foe Jehovah (Ps. 119:9). Papa nanga mama di e broko den ede, moesoe foe kisi boen bodoi foe sabi san de ini a leri programa, so taki den kan gi den pikin foe den rai di fiti. Efoe den sani di den e leri na skoro noso na tra presi, no e kroederi nanga a santafasi nanga a soifrifasi di Jehovah e aksi foe den foetoeboi foe en, dan den moesoe wai pasi gi den sani dati. — 1 Petr. 1:15, 16.
3 Wán sani di e pasa foeroe toe, na taki den sa kisi foe doe nanga afersi di abi na ini nationalistisch fesa, a njan di sma e njan prisiri foe fesadei, den sport aktiviteit, noso den sociaal demakandra. A brochure Jehovah’s Getuigen en de school (Jehovah Kotoigi nanga a skoro) e jepi jongoe kresten ini den afersi disi. Te papa noso mama foe jongoe pikin, e teki a bosroiti foe sori den skoromeester noso den skoromisi a brochure disi, dan den kan basi den situwâsi di kan tjari serjoesoe problema kon, noso sorgoe taki den problema disi no e kon tron serjoesoe problema. Den kan tjari kon na krin taki disi sa jepi a skoromeester noso den skoromisi foe froestan foe san ede Jehovah Kotoigi e froekisi foe no teki prati ini wan toe foe den aktiviteit. Te den e meki a skoromeester noso a skoromisi kon sabi den bodoi disi, dan dati kan jepi foeroe foe sori taki den wani wroko makandra.
4 Moro fara, a ben sa de wan boen sani gi kresten studenti foe tjari wan eigi eksemplaar foe a School-brochure (Skoro-brochure) go makandra nanga den tra materiaal di den e tjari go na skoro. Foeroetron okasi e kon foe gi kotoigi na tra studenti di e poti aksi, te den studenti noso tra sma e poti prakseri na tapoe a bribi foe wi. Alaten den pikin foe Kotoigi moesoe tjari nanga den toe, a Medische richtlijn/Ontheffing („Broedoe”-karta) noso na Identiteitskaart (Identiteit-karta) di abi den moro njoen bodoi na ini èn di toe kotoigi ben poti den nen na ondro èn a sma srefi poti en nen toe. Den wan di e gi jesi na a froemane disi, seiker sa de leki a ’koniwan di si taki rampoe e kon èn baka dati e go foe kibri ensrefi’. — Odo 22:3.