Den pikin fu yu de srekasreka fu go na skoro baka?
1 Tra mun den kresten yonguwan sa go na skoro baka. Disi kan tyari wan marki fu prisiri èn kande pikinso ongorostu fasi. Den inisei firi disi e kon fu den okasi nanga tyalensi di o miti den. Son yonguwan o miti nanga nyun skoromati nanga skoromeistri. Kresten yonguwan e frustan so srefi taki ibri nyun skoro yari e go makandra nanga tesi tapu den bribi, soifri-retifasi èn lobi gi Yehovah. Yonguwan na ini a gemeente, unu de srekasreka fu go na skoro baka? Ppa nanga mma, fa unu kan tranga den pikin fu unu gi den tesi di e kon?
KOBROIKI A SKORO-BROCHURE
2 Na ini 1985 den ben gi a Skoro-brochure spesrutu gi kresten ppa nanga mma nanga den pikin fu den di e go na skoro. A brochure disi abi leki marki fu tyari den beibri overtoigi nanga handrifasi fu Yehovah Kotoigi kon a krin gi skoro meistri nanga skoro edeman, fu di den disi abi krakti tapu son wan fu den skoro activiteit. A e gi so srefi bodoi ini a tori fu a wán fasi fu prakseri di Yehovah Kotoigi abi ini a tori fu a krin fasi fu tyari den srefi.
3 Gi furu yonguwan a brochure disi sori taki a de wan trutru kibri. Wan ppa ofu mma di de wan Kotoigi, ben kon sabi fu eksenpre taki den skoropikin ben sa kisi seks lés fu sma di ben de bekenti fu den yayo libi. Nanga yepi fu a brochure a mma ben kan tyari den beibri gron fu na agri di a no ben agri nanga dati èn a ben man fu tyari kenki di fiti na ini na programa fu en umapikin.
4 Bifo skoro bigin, dan a ppa nanga mma kan tranga a yeye nanga na ati fu den pikin fu den fu di den e teki a ten fu meki a memre fu den pikin fu den kon fres baka nanga a inibere fu a brochure. Ppa nanga mma kan hori na spesrutu libiyari, klas nanga skoro fu den pikin na prakseri te den e teki pisi-tori fu a brochure di ben sa kan de tumusi bun na ini a yari (Odo 14:15; 22:3). Taki someni tron baka nanga yu pikin fu den situwâsi di a kan miti èn meki a si fa a materiaal di tyari kon a doro kan de bun fu meki ’reti pasi gi en futu’.—Hebr. 12:13.
5 Ppa nanga mma kan du furu fu yepi den pikin fu den ’fu krin den srefi gi ibriwan sma’ di e aksi den san na den eigi prakseri nanga howpu (1 Petr. 3:15). Na ini son kofal a ppa ofu mma e feni en kande moro bun fu den srefi go taki nanga a skoro meistri. Son ppa nanga mma e meki plan fu fisiti a skoro doronomo, fu di dati kan meki taki den nanga a skoro meistri kan frustan den srefi bun. So wan persoonlijk belangstelling e tranga so srefi a banti a mindri a ppa ofu mma nanga a pikin. Son ppa nanga mma arki na a rai fu teki a ten, pe den e kisi pasi fu dati, fu den srefi de na den takimakandra di a skoromeistri e hori nanga a klas. Sontron na a fasi disi fosi a ppa ofu mma e kon sabi trutru nanga sortu situwâsi nanga spesrutu druk den pikin fu wi e miti aladei. —1 Petr. 3:8.
DE IBRI DEI WAN KOTOIGI
6 Wan yongu Kotoigi na ini Colorado ben aksi en skorojufrow fu yepi en nanga den muilek wortu di a ben miti ibri dei te a ben leisi a brochure Ondrusuku den Buku aladei. Wan dei a ben kon si taki a brochure ben gwe. Bakaten a ben kon sabi taki na en skorojufrow ben ’leni’ en, na dei di a ben komoto moro fruku fu skoro fu di a ben siki. A no ben wani misi a leisi fu a tekst. Disi ben meki a ben kisi en eigi buku fu Ondrusuku den Buku aladei.
7 A de tru taki a nyun skoro yari e tyari momenti fu ongorostufasi nanga frede kon. Ma wan positief luku makandra nanga wan fayafaya sreka sa yepi ppa nanga mma èn den yonguwan, ’fu tranga a yeye fu den fu du wroko’ a skoro yari di e kon, so taki Yehovah kisi grani. —1 Petr. 1:13.