Ala ten abi foeroe foe doe

¹ A pipel foe Jehovah na sma di abi foeroe foe doe. Wi abi foeroe froeplekti di abi foe doe nanga wi osofamiri, wi wroko èn skoro. Èn na tapoe ala den sani disi, ala ten “foeroe de foe doe ini a wroko foe Masra” (1 Kor. 15:58). Wi moesoe sreka wisrefi gi den alawiki konmakandra èn wi moesoe fisiti den. Wi e kisi deki-ati foe no meki no wan wiki pasa sondro foe wi abi wan prati na a velddienst. Doronomo wi moesoe poti nofo ten na wan sei foe doe persoonlijk studie nanga bijbelstudie nanga na osofamiri. Owroeman nanga dinari ini a diniwroko abi foeroe toewijzing ini a gemeente. Son ten den e aksi wi foe gi jepi na den wan di abi jepi fanowdoe.

² Son leisi, son wan foe wi kan abi a firi taki wi abi toemoesi foeroe foe doe. Tokoe den wan di alaten e wroko tranga, na den moro kolokoe sma, efoe den abi wan boen balansi èn efoe den e si sani na wan joisti fasi.​—Preik. 3:12, 13.

³ Na apostel Paulus ben de wan sma di ben abi foeroe foe doe. Ala di a ben sorgoe gi den sani di ensrefi ben abi fanowdoe foe di a ben wroko leki wan sma di ben meki tenti, tokoe a ben wroko moro tranga leki den tra apostel. Leki wan evangelie preikiman, a ben wroko sondro foe kon weri, a ben preiki na poebliki èn a ben go oso foe oso, ala di a no ben pasa den frantiwortoe foe en leki wan skapoeman foe na ipi. (Tori. 20:20, 21, 31, 34, 35). Ala di a ben abi wan druk schema, tokoe ala ten Paulus ben de fajafaja foe doe moro ini a diniwroko foe Jehovah.​—Teki gersi Romesma 1:13-15.

⁴ Paulus ben hori en balansi èn wan kolokoe firi ini en ati, foe di a ben froetrow tapoe Jehovah foe gi en krakti. A ben si taki en diniwroko ben abi foeroe boen bakapisi èn dati ben gi satisfaksi (Fil. 4:13). A ben sabi taki Gado no ben o frigiti a wroko foe en (Hebr. 6:10). A prisiri di a ben abi foe jepi trawan foe kon sabi Jehovah, ben gi en krakti (1 Tes. 2:19, 20). A djaranti di a ben abi taki en howpoe di ben gron tapoe bijbel, ben o kon troe, ben poesoe en foe tan wroko tranga.​—Hebr. 6:11.

⁵ Wi moesoe prakseri toe foe den boen bakapisi di e kon foe a wroko di wi e doe. A de di wi de na den alawiki konmakandra èn a abi di wi abi wan prati na den, de foe bow trawan èn foe gi den deki-ati (Hebr. 10:24, 25). Na opregti moeiti di wi e doe foe miti ala sma nanga a boen njoensoe e meki taki a gemeente e go na fesi, foe di a belangstelling foe sma e gro èn njoen sma abi demakandra nanga wi (Joh. 15:8). Te wi e jepi trawan, dan dati e sorgoe taki ini a gemeente wan jeje sa de foe kon moro krosibei foe makandra èn taki wi alamala de neleki wan famiri (Jak. 1:27). Moro fara, neleki Paulus, wi no moesoe frigiti noiti taki efoe wi abi foeroe foe doe ini boen wroko, dan dati e plisi Jehovah Gado srefisrefi. Wi e feni en wan bigi grani foe dini en. Gi wi, no wan betre fasi foe libi de!

⁶ Wan tra boen bakapisi de efoe wi abi foeroe foe doe. Te wi e wroko tranga foe bow wan gosontoe jejefasi foe doe sani tapoe fasti ten, dan a sa gersi leki a ten e go moro esi. Foe di wi sabi taki ibri dei di e pasa wani taki dati wi e kon moro krosibei foe a njoen grontapoe, meki nanga prisiri wi e teki a libi ini san wi abi foeroe foe doe now. Wi e froestan a koni toe foe tan abi foeroe foe doe, èn dati sa meki taki wi no sa abi foeroe ten foe abi wan prati na den wroko di grontapoe e feti na baka èn di de foe soso.​—Ef. 5:15, 16.

⁷ Foe troe, foeroe de foe doe ini a wroko foe Masra. Ma wi kan tan kolokoe, efoe wi e go doro foe froetrow tapoe Jehovah Gado nanga Jesus Krestes, den wan di e gi wi kowroe-ati na ini wi diniwroko èn di e meki taki wi diniwroko abi boen bakapisi.​—Mat. 11:28-30; 1 Joh. 5:3.