Tjari joesrefi na wan fasi di e fiti a boen njoensoe
1 Leki Kotoigi foe Jehovah wi e angri foe gi a nen foe Jehovah grani. Wi sabi taki a fasi fa wi e tjari wisrefi, fa wi e taki, fa wi e sorgoe gi wisrefi, èn fa wi e weri krosi, abi krakti na tapoe a fasi fa trawan e si a troe anbegi. Disi de spesroetoe so te wi de na den konmakandra foe wi. Wi wani sorgoe taki ala sani di wi e taki èn di wi e doe na den konmakandra e fiti a boen njoensoe èn e gi Jehovah grani.—Fil. 2:4.
2 Foeroe foe den grontapoe markitiki na ini a tori foe weri krosi nanga a sorgoe di sma e sorgoe gi densrefi, no e fiti gi kresten. Disi na wan sani di dinari foe a boen njoensoe moesoe poti finifini prakseri na tapoe. A Waktitoren foe 1 juni 1989, bladzijde 20, ben taki: „A krosi di wi e weri no abi foe de diri krosi, ma a moesoe de krin, a moesoe sori taki wi sabi san e fiti èn a moesoe de bescheide. Den soesoe foe wi moesoe de na ini wan boen kondisi èn moesoe de krin. Na a srefi fasi, na ala den konmakandra, di abi na ini toe a Gemeente Boekoestudie, wi skin moesoe de krin, èn wi moesoe weri krin krosi di e fiti.”
3 A boen gwenti di wi abi foe kon biten na den konmakandra, na wan marki di e sori taki wi e hori trawan na prakseri na wan lobi fasi. Sontron, situwâsi de di wi no ben man si na fesi, di meki wi no man doro biten na wan konmakandra. Ma te wi meki en tron wan gwenti foe doro lati, dan dati kan sori taki wi no abi nofo lespeki gi a santafasi foe den konmakandra èn wi e misi foe froestan a frantiwortoe foe wi foe no poeroe a prakseri foe trawan. Foeroe tron sma di e kon lati e poeroe a prakseri foe trawan èn e meki taki trawan no e kisi ala a winimarki foe a programa. A boen gwenti foe kon biten, e sori taki wi abi lespeki gi a fasi fa ala den sma e denki èn e sori taki wi e hori den belang foe ala den sma di de, na prakseri.
4 Lobi gi den sma di de na wi sei, ben sa moesoe meki wi loekoe boen foe no doe sani di e meki trawan lasi prakseri na den konmakandra. Sjoe sjoe, njan sani, kaw bubblegum, kroiki kroiki papira, èn opo go na toilet foe soso, kan meki trawan poeroe prakseri èn e lagi a lespeki di a presi foe anbegi foe Jehovah moesoe kisi. A no e fiti gi no wan sma foe doe gemeente tori noso hori takimakandra nanga trawan, soso efoe wan toemoesi prenspari sani pasa pe den brada moesoe opo foe den stoeroe. Efoe dati no de so, dan ala sma moesoe sidon èn arki a programa so taki den kan kisi winimarki gi densrefi èn gi den osofamiri foe den. Takroe gwenti no e fiti na ini a Kownoekondre zaal foe di „lobi ... no e doe sani di no e fiti”.—1 Kor. 13:4, 5; Gal. 6:10.
5 A boen fasi fa den pikin foe wi e tjari densrefi na den konmakandra, e gi a nen foe Jehovah grani nanga prèise toe. A de toemoesi prenspari taki papa nanga mama hori den pikin boen na ai. Pikin moesoe kisi a deki-ati foe arki èn foe teki prati. Foeroe papa nanga mama di abi jongoe pikin, e froekisi foe sidon na wan presi pe den kan opo makriki èn pe den kan sorgoe gi den fanowdoe foe den jongoe pikin sondro foe meki trawan lasi foeroe prakseri.
6 Paulus ben froemane: „Tjari oensrefi tapoe wan fasi di fiti a boen njoensoe” (Fil. 1:27). So boen, meki wi doe moeiti foe sori boen maniri èn foe hori trawan na prakseri te wi e fisiti den konmakandra. Efoe ala sma wroko makandra, dan dati sa meki taki „wi e gi makandra deki-ati . . . ibriwan nanga a jepi foe a bribi foe makandra”.—Rom. 1:12.