De wan eksempre ini taki èn ini a fasi fa joe e tjari joesrefi
1 Na apostel Paulus ben froemane Timoteus foe tron wan eksempre ini taki èn ini a fasi fa a e tjari ensrefi (1 Tim. 4:12). So srefi wi moesoe sori taki wi de wan eksempre ini taki èn ini a fasi fa wi e tjari wisrefi, spesroetoe te wi e teki prati na ini a diniwroko, bika te wi e doe dati, dan dati kan bepaal efoe wi doro na ati foe den sma di wi miti efoe no doro na ati.
2 Wi moesoe sori ala fasi foe boen maniri, so srefi a hori di wi e hori sma na prakseri, switifasi, manirifasi nanga takt. Te wi e sori den eigifasi disi, dan wi e sori taki wi sabi fa den sani di wi e doe abi krakti tapoe den firi foe tra sma. Wi kan teki den boen maniri na ini a diniwroko gersi spesrei, di e gebroiki foe gi njanjan tesi. Sondro spesrei, gosontoe njanjan kan tesi leki a no abi sowtoe èn a no switi. Te wi no sori boen maniri ini a fasi fa wi e handri nanga tra sma, dan a kan abi wan srefi sortoe bakapisi. — Kol. 4:6.
3 De wan eksempre ini taki: Wan switi lafoe nanga wan waran odi na prenspari sani te wi e pristeri a boen njoensoe. Te wi e poti waranfasi nanga opregtifasi leki spesrei ini den biginwortoe foe wi, dan wi e meki na ososma sabi taki wi abi troetroe belangstelling gi en. Arki boen te a sma e taki èn sori lespeki di fiti gi a fasi fa a e prakseri foe sani. Te joe e taki, doe dati nanga takt èn na wan switi fasi. — Teki gersi Tori foe den Apostel 6:8.
4 Son tron wi e miti wan sma di kande no abi switi fasi èn di kaksi srefi. Fa wi moesoe handri na tapoe dati? Petrus ben gi wi tranga foe taki na wan fasi di e sori „wan safri fasi èn . . . dipi lespeki” (1 Petr. 3:15; Rom. 12:17, 18). Jesus ben taki dati efoe wan ososma e weigri na wan grofoe fasi foe teki a Kownoekondre boskopoe, dan wi moesoe ’seki a doti poeroe [gewoon] na wi foetoe’ (Mat. 10:14). Te wi sori maniri di de wan eksempre na ondro den sortoe situwâsi dati, dan te foe kaba a kan safoe na ati foe a gensman.
5 De wan eksempre ini a fasi fa joe e tjari joesrefi: Foe preiki a boen njoensoe na druk strati èn na poebliki presi e aksi taki wi hori tra sma firi na prakseri, noiti taki tranga noso dwengi sma èn taki wi no tanapoe na pasi taki sma no kan waka pasa. Te wi de na ini den oso foe sma di abi belangstelling, dan wi moesoe tan abi boen manirifasi èn tjari wisrefi leki fisitiman di abi switi fasi, èn sori warderi taki den ontfanga wi na den oso. Iniwan pikin di kon nanga wi, moesoe sori lespeki gi na ososma nanga den sani foe en èn moesoe abi maniri èn arki boen te wi e taki nanga a sma. Efoe pikin sori tranga-ede, dan dati sa libi wan prakseri na baka di no boen. — Odo 29:15.
6 A fasi fa wi sori wisrefi moesoe meki a de krin gi tra sma taki wi na bedinari foe a Wortoe foe Gado. Ini a fasi fa wi e weri krosi èn e sorgoe gi wi skin, wi no moesoe de sjabisjabi noso nanga wiwiri di no kan efoe noso nanga krosi di e hari sma prakseri toemoesi èn nanga prodo di pasa marki. A fasi fa wi sori wisrefi moesoe warti a boen njoensoe ala ten. (Teki gersi Filipisma 1:27.) Te wi poti prakseri boen tapoe a fasi fa wi sori wisrefi èn tapoe den sani di wi abi na wi, dan wi no sa gi tra sma wan reide foe naki foetoe noso feni fowtoe na a diniwroko foe wi (2 Kor. 6:3, 4). A de di wi de wan eksempre ini taki èn ini a fasi fa wi e tjari wisrefi, e poti tra eigifasi go na a Kownoekondre boskopoe di e hari sma kon, èn disi e tjari grani kon gi Jehovah. — 1 Petr. 2:12.