Meki a boen njoensoe foe wan moro boen sani bekènti
1 Wán hondro tinaseibi jari langa A Waktitoren dini leki wan fetiman gi bijbel waarheid. Nownow 18.950.000 eksemplaar foe ibri tijdschrift e druk na ini 125 tongo. So srefi Ontwaakt! horibaka gi a Wortoe foe Gado langa ten kaba, èn now 15.730.000 eksemplaar e prati na ala sei na ini 80 tongo. — Teki gersi Kolosesma 1:23.
2 Den tijdschrift e sorgoe gi den sani di wi abi fanowdoe na jejefasi: Miljoenmiljoen opregti sma kisi wini foe A Waktitoren nanga Ontwaakt!, foe di den tijdschrift e jepi foe sorgoe gi den sani di den sma abi fanowdoe na jejefasi. Den artikel di e kon na doro, e bow a bribi. Foe eksempre, na ini A Waktitoren foe 1 februari 1996 wi ben studeri sani di ben taki foe a fanowdoe di de foe froetrow tapoe Jehovah nanga en Wortoe. A Waktitoren foe 1 maart 1996 ben gi wi a deki-ati foe abi foeroe foe doe na ini a diniwroko foe Jehovah èn foe tan froewakti en. A ben gi foeroe deki-ati di wi ben studeri a profeititori foe Sefanja finifini! Dan wi ben abi a takimakandra, di e tranga a bribi, foe a loyaalfasi foe kresten na ini A Waktitoren foe 1 maart 1996. Na eksemplaar foe 1 mei 1996 ben poti krakti na tapoe o prenspari a de foe leisi èn foe studeri Gado Wortoe doronomo. Den artikel disi jepi foe meki wi froestan Gado Wortoe moro boen, èn a warderi foe wi gi en Kownoekondre gro.
3 Boiti dati, den tijdschrift disi abi praktis artikel di e kon biten, èn di e sori a fasi fa Gado wani foe wi tjari wisrefi, sani di abi foe doe nanga boen gwenti nanga wet foe kresten, èn tra tori di de toemoesi prenspari. Den e taki na wan serjoesoe fasi foe troetroe afersi di abi krakti na tapoe wi libi. Leki wan bakapisi foe dati, wi e njan boen foe wan moro hei fasi foe libi nownow, ala di wi e wakti a kontroe foe den pramisi foe Gado gi sani di de moro boen srefi na ini a ten di e kon. — Jes. 48:17; 1 Tim. 6:19.
4 Wan sjatoe overzicht fa sani skrifi tapoe bladzijde 4 foe ibri uitgave foe Ontwaakt! e gi wi wan boen reide foe rikomanderi a tijdschrift disi leki wan toemoesi boen sani gi ala sma na ala presi foe leisi, jongoewan èn so srefi owroewan. Drape a e taki: „Ontwaakt! de foe leri a heri osofamiri. A e sori fa foe kakafoetoe gi den problema na ini a ten disi. A e froeteri njoensoe, a e taki foe sma na ini foeroe kondre, a e ondrosoekoe relisi èn sabidensi. Ma a e doe moro. A no e ondrosoekoe sani frafra nomo èn a e sori san den sani di e pasa nownowde wani taki troetroe, ma tokoe ala ten a e tan neutraal na politiek sei èn a no e hei a wan ras moro wan trawan. Moro prenspari, a tijdschrift disi e bow froetrow tapoe a pramisi foe a Mekiman gi wan njoen grontapoe di sa abi vrede nanga seikerfasi, di sa kon djonsro na ini a presi foe na ogri èn broeja disiten seti foe sani.”
5 Prati den tijdschrift nanga tra sma: Lobi foe prati A Waktitoren nanga Ontwaakt! (Teki gersi 1 Timoteus 6:18.) Tjari eksemplaar nanga joe, so taki joe kan pristeri den gi ibri sma di joe sa miti (Preiki. 11:6). Wi alamala, so srefi jongoe preikiman nanga preikiman di njoen ete, kan abi wan dorodoro prati foe den tijdschrift na ini a moen disi, foe di wi sa gebroiki sjatoe pristeri di gron tapoe den artikel di doro biten na ini den moro njoen uitgave. Kon sabi heri boen san skrifi na ini, èn pristeri den na wan opregti fasi èn nanga overtoigi.
6 A Waktitoren nanga Ontwaakt! abi bodoi di ibri sma abi fanowdoe. Foe prati den de wan foe den moro boen fasi fa wi kan jepi tra sma foe leri sabi a boen njoensoe taki heri esi wan moro boen sani sa kon!