’Bow joe osofamiri kon tranga’
1 Sondro tweifri, na ini ala koeltoeroe na heri grontapoe na osofamiri libi e broko. A grontapoe foe Satan abi prisiri pasa marki na ini bedrigifasi nanga hoeroedoe (1 Joh. 5:19). Disi e poti krakti na tapoe a tranga fanowdoe gi wi foe ’bow wi osofamiri kon tranga’ èn foe leri trawan fa den kan doe a srefi gi di foe den.—Odo 24:3, 27.
2 Bijbel gronprakseri na wan kibri: A sroto gi troe kolokoe na ini na osofamiri de foe feni na ini a libi di wi e libi akroederi bijbel gronprakseri. Den krakti waarheid disi abi wini gi ibri memre foe na osofamiri na tapoe ala kontren foe a libi. Na osofamiri di e libi akroederi den waarheid disi, sa de kolokoe èn sa abi a vrede foe Gado.—Teki gersi Jesaja 32:17, 18.
3 Den gronprakseri di kan jepi wi foe bow wi osofamiri kon tranga skrifi sjatoe na ini a njoen boekoe A sroto gi wan kolokoe osofamiri. Ibri kapitel e tapoe nanga wan leriboksoe di de wan jepi, èn di e poti krakti na tapoe den gronprakseri di memre foe na osofamiri moesoe hori na prakseri. Foeroe foe den boksoe disi e bigin nanga na aksi: „Fa den bijbel gronprakseri disi kan jepi . . . ?” Disi e meki sma poti prakseri na tapoe den prakseri foe Gado so taki wi e froestan a denki foe En na ini a tori di wi e taki foe en.—Jes. 48:17.
4 Kon sabi a boekoe. Leri foe feni den gronprakseri di kan de wan jepi te difrenti problema e opo ede kon. A boekoe e taki foe tori soleki disi: san wan sma moesoe loekoe te a abi wan sma na prakseri di kan tron en trowpatna (kapitel 2), sortoe prenspari sroto e jepi meki wan trowlibi tan kolokoe (kapitel 3), fa papa nanga mama kan kweki den tini foe den kon tron bigisma nanga firi foe frantiwortoe èn nanga frede gi Gado (kapitel 6), fa foe kibri na osofamiri gi krakti di e tjari pori kon (kapitel 8), gronprakseri foe jepi papa noso mama di de wawan foe kisi boen bakapisi (kapitel 9), jepi na jejefasi gi den osofamiri di abi foe doe nanga a dringi di sma e dringi sopi pasa marki èn ogri di e doe nanga tranga na ini osofamiri (kapitel 12), san foe doe te den trowbanti de foe broko (kapitel 13), san sma kan doe foe gi papa nanga mama di kon owroe, grani (kapitel 15), èn fa foe meki wan têgo tamara, kon de wan seiker sani gi na osofamiri foe wan sma (kapitel 16).
5 Gebroiki a njoen boekoe heri boen: Efoe joe no doe dati ete, foe san ede joe no e studeri a Kolokoe osofamiri-boekoe makandra leki wan osofamiri? So srefi, te joe osofamiri e kisi foe doe nanga njoen problema noso moeilijk situwâsi, loekoe den kapitel na ini a boekoe baka di e taki foe den sani disi èn loekoe na ondro begi fa joe kan fiti a rai na ini joe libi. Boiti dati, meki foeroe ten fri gi a velddienst na ini maart, so taki joe kan doe tranga moeiti foe libi A sroto gi wan kolokoe osofamiri na baka gi someni sma leki a kan.
6 Osofamiri di e gi densrefi na ini a dini foe Gado sa kon tranga na jejefasi, èn kon abi wànfasi na jejefasi èn sa de srekasreka heri boen foe kakafoetoe gi den sani di Satan e soetoe go na den tapoe (1 Tim. 4:7, 8; 1 Petr. 5:8, 9). Wi de nanga tangi srefisrefi taki wi abi rai di komoto foe a Sma di seti na osofamiri!