’Doe ala san joe man’
1 Di wi ben gi wisrefi abra na Jehovah, wi ben pramisi foe gi en den moro boen sani di wi abi. Foe dati ede, na apostel Petrus ben gi den fosi jarihondro kresten a deki-ati foe doe ala san den man foe de seiker foe a posisi di den abi na fesi Jehovah (2 Petr. 1:10). Troetroe wi wani doe ala san wi man foe plisi Jehovah na ini a dini di wi e dini en na ini a ten disi. San disi wani taki? Te a matifasi di wi abi nanga Jehovah e kon moro boen èn wi e prakseri dipi foe ala sani di a doe gi wi, dan wi ati e boeweigi wi ala ten foe doe ala san wi man na ini en diniwroko. Wi wani doe wi diniwroko moro boen, èn pe a kan, wi wani doe moro na ini wi diniwroko.—Ps. 34:8; 2 Tim. 2:15.
2 Wan jongoe brada di ben wani foe doe moro na ini a diniwroko ben si taki wan doronomo studie foe Gado Wortoe ben bigi a warderi di a ben abi gi Jehovah èn a ben gi en wan moro bigi faja. Disi ben boeweigi en foe aksi foe go na ini a pionierwroko. Wan sisa di ben feni taki a ben de moeilek foe taki nanga freimdesma, ben oefen wan toe foe den pristeri na ini a Redeneren-boekoe èn heri esi a ben bigin abi moro boen bakapisi na ini en diniwroko. A ben man hori wan bijbelstudie nanga wan trowpaar di ben kon teki a waarheid.
3 Prisiri nanga san joe kan doe: Wan toe foe wi e ondrofeni moeilek situwâsi soleki wan swaki gosontoe, gens foe famiriman, pôtifasi, noso mi-no-ke fasi na ini a gebied. Foeroe tra problema di de wan ala dei sani na ini den lasti dei disi kan gens a diniwroko foe wi (Luk. 21:34, foetoewortoe; 2 Tim. 3:1). Disi wani taki dati wi no libi akroederi a gi di wi gi wisrefi abra na Jehovah? No te wi e dini en nanga ala san wi man.
4 A no de wan koni sani foe kroetoe wisrefi na tapoe gron foe san tra sma man e doe. Na presi foe dati, den Boekoe foe bijbel e gi wi deki-ati foe „meki ibri sma boeweisi san na en eigi wroko”. Foe gi wisrefi dorodoro na a fasi fa wisrefi man, e plisi Jehovah èn e gi wi „reide foe prisiri”.—Gal. 6:4; Kol. 3:23, 24.
5 Meki wi poti prakseri na tapoe den wortoe foe Petrus foe ’doe ala san wi man, so taki te foe kaba, Gado kan feni taki wi de sondro flaka èn sondro doti èn na ini vrede’ (2 Petr. 3:14). A jeje dati sa meki wi firi seiker èn a sa gi wi a korostoe firi di Jehovah wawan kan gi.—Ps. 4:8.