Bijbelstudie di e meki sma tron disipel
1 „San e tapoe mi foe teki dopoe?” na eunuch foe Etiopia ben aksi, baka di Filipus „ben meki a boen njoensoe foe Jesus bekènti gi en” (Tori 8:27-39). Na ini a kefal foe na eunuch, a ben abi wan lobi kaba gi den sani di Gado ben meki sma skrifi nanga en santa jeje, èn baka di a ben kisi jepi na jejefasi foe Filipus, a ben de klariklari foe tron wan disipel. Ma a no ala sma abi na overtoigi taki den moesoe ondrosoekoe den Boekoe foe bijbel gi densrefi.
2 Kolokoe taki na organisâsi foe Jehovah gi a njoen brochure, Een boek voor alle mensen (Wan boekoe gi ala sma), foe gi sma deki-ati foe ondrosoekoe a boskopoe foe bijbel gi a ten foe wi. A bodoi na ini a brochure moesoe hari opregti sma di kisi skoro kande, ma di no sabi foeroe foe bijbel. A heri moi wrokosani disi meki foe boeweigi sma foe go ondrosoekoe bijbel.
3 Te joe e bigin wan bijbelstudie, a ben sa de wan jepi gi joe foe loekoe den heri boen rai di tjari kon na doro na ini na inlegvel foe Wi Kownoekondre Dienst foe juni 1996, di e taki fa wi kan hori wan studie na ini a Sabi-boekoe na wan fasi di e tjari boen bakapisi. Te a studie e waka kaba, loekoe dan efoe a studenti e go na fesi so taki joe kan si na tapoe sortoe kontren joe moesoe poti moro prakseri. Gi a studenti deki-ati foe sreka en lès na fesi, èn foe soekoe den tekst. Den komentaar di a e gi nanga en eigi wortoe kan sori na opregti warderi di a abi gi waarheid. Den sma di e go na fesi moro esi, na den sma di e leisi den poeblikâsi foe a Genootschap toe èn di e fisiti den gemeente konmakandra doronomo. Gi a studenti deki-ati foe gebroiki okasi foe taki nanga tra sma foe den sani di a e leri. Sori en na wan switi fasi san a moesoe doe foe go na fesi na jejefasi. Wi no moesoe studeri foe ala ten nanga sma di no wani teki wan bosroiti. Den studenti moesoe teki fesi foe leri, den moesoe teki wan fasti bosroiti gi a waarheid, èn den moesoe gro te leki den gi densrefi abra na Gado èn teki dopoe.
4 Moro leki wán studie e hori na ini son osofamiri, foe di difrenti memre foe na osofamiri abi aparti studie. Ma, a ben sa moro boen na ini wan toe kefal te a heri osofamiri e studeri makandra, foe di a ben sa tjari na osofamiri kon na wán na jejefasi.
5 A komando foe Jesus na taki wi moesoe meki disipel (Mat. 28:19). Foe man doe dati, wi moesoe hori bijbelstudie di e jepi den studenti foe gro te leki den kan poti na aksi: „San e tapoe mi foe teki dopoe?”