Wi moesoe go na sma ibritron baka
1 Joe ben handri na wan boen fasi a fosi leisi di wan sma ben taki nanga joe foe a boen njoensoe? Efoe dati no de so, dan joe moesoe de nanga tangi taki Jehovah Kotoigi ben kon na joe ibritron baka, te leki te foe kaba, joe ben teki wan bijbelstudie di den ben pristeri joe. A de boen foe denki foe dati te joe e wroko a gebied di joe kisi, ibritron baka.
2 A libi foe sma e kenki doronomo. Den e kisi foe doe nanga njoen problema noso situwâsi, den e jere foe sani di pasa èn di e gi sma broko-ede na ini a libimakandra noso na ini grontapoe, den e pina foe a go di sani e go na baka na ekonomia sei, noso den e kisi foe doe nanga siki noso dede na ini na osofamiri. Den sani disi ben sa kan meki taki den wani kon sabi foe san ede den nowtoe disi e pasa. Wi moesoe abi a koni foe si krin sortoe sani e meki sma lasi-ati, èn dan wi moesoe piki nanga wan boskopoe di e gi trowstoe.
3 Disi na wan wroko foe froeloesoe sma: Prakseri foe sma di e froeloesoe trawan na wan presi pe wan rampoe ben pasa. Ala di son wan kan soekoe na ini wan kontren pe den no e feni foeroe sma di tan na libi, tokoe den no e doe en moro safrisafri èn den no e stòp foe di den kompe wrokoman e feni moro sma di tan na libi na wan tra presi. A wroko di wi e doe foe froeloesoe sma no kon na wan kaba ete. Ibri jari, wi e feni hondrohondro doesoendoesoen sma di wani pasa „a bigi banawtoe” libilibi. — Openb. 7:9, 14.
4 „Ibriwan sma di e kari a nen foe Jehovah, sa kisi froeloesoe” (Rom. 10:13-15). Den wortoe disi moesoe meki ibriwan foe wi froestan taki a de tranga fanowdoe foe horidoro na ini a preiki di wi e preiki. Sensi wi ben bigin wroko a gebied foe wi dan pikin-nengre gro kon bigi èn now den owroe nofo foe denki serjoesoe gi densrefi foe a tamara foe den èn foe a marki foe a libi. Wi no man sabi soema sa arki te foe kaba (Preik. 11:6). Foeroe sma di ben de gensman fosi, teki a waarheid. A wroko foe wi no de foe kroetoe sma, ma foe tan gi den wan okasi foe jere èn foe kisi froeloesoe foe na owroe grontapoe disi. So leki fa den fosi disipel foe Jesus ben doe, dan wi moesoe go na sma „ibritron baka” èn proeberi foe wiki a belangstelling foe den gi a Kownoekondre boskopoe. — Mat. 10:6, 7.
5 Jehovah e sori taki a abi sari-ati, foe di te now ete na okasi de foe preiki (2 Petr. 3:9). Te wi e gi trawan pasi foe jere a boskopoe ibritron baka, dan wi e poti krakti na tapoe a lobi foe Gado, èn na a fasi disi wi e prèise en.