Fa memre foe na osofamiri e wroko makandra foe abi wan prati doronomo—Na gemeente konmakandra
1 Kresten osofamiri moesoe gi jesi na a komando foe kon makandra na den gemeente konmakandra (Hebr. 10:24, 25). Efoe den e wroko boen makandra, dan alamala kan abi boen bakapisi te den e sreka densrefi gi den konmakandra, èn te den e sreka densrefi foe go fisiti den konmakandra èn abi wan prati na den. Osofamiri situwâsi kan difrenti, ma sani de di wan kresten masra, wan wefi di de na bribi, noso wan papa noso wan mama di de en wawan kan doe, foe gi na osofamiri deki-ati foe doe jeje sani makandra, awansi omeni pikin de na oso, èn awansi o owroe den de.—Odo 1:8.
2 Teki ten foe sreka joesrefi: Memre foe na osofamiri e wroko makandra foe sorgoe taki ibriwan de srekasreka na wan joisti fasi gi den gemeente konmakandra. Foeroe osofamiri e studeri na artikel gi na alawiki Waktitoren-studie makandra. Son wan e sreka densrefi gi a Gemeente Boekoestudie noso den e leisi a bijbel-leisipisi gi a wiki leki osofamiri. A marki de foe abi den moro prenspari penti na ede bifo joe e go na den konmakandra. Na so fasi, ala sma sa kisi moro wini foe den sani di den e jere èn den sa de srekasreka foe abi wan prati te na okasi de.—1 Tim. 4:15.
3 Sreka joesrefi foe abi wan prati: Ibriwan sma na ini na osofamiri moesoe abi na prakseri foe meki a howpoe foe en bekènti na trawan foe di a e gi piki na den konmakandra (Hebr. 10:23). Wan memre foe na osofamiri de di moesoe kisi jepi noso deki-ati foe doe disi? Sortoe jepi ibriwan foe den abi fanowdoe foe sreka densrefi gi den toewijzing na tapoe a Theokrasia Diniwroko-skoro? Wefi e warderi en te den masra foe den abi belangstelling èn kande e kon nanga wan idea gi wan agersitori di fiti noso den e sori den fa foe agersi wan situwâsi boen. Papa nanga mama no moesoe denki taki den moesoe sreka den prati foe den jongoe pikin foe den. Efoe den e doe disi, dan a kan tapoe den pikin foe doe wan sani densrefi fosi. Ma papa nanga mama kan jepi den jongoewan foe den èn arki te den e oefen nanga wan tranga sten.—Ef. 6:4.
4 Orga sani na so wan fasi, taki joe kan de drape: Jongoejongoe kaba, pikin kan kisi leri foe weri den krosi èn de srekasreka foe gowe na den konmakandra na wan fasti ten. Memre foe na osofamiri moesoe wroko makandra te den e sorgoe gi sani di moesoe doe na ini oso so taki den no e kon lati.—Loekoe den rai di gi na ini den boekoe Kolokoe osofamiri, bladzijde 112, nanga Jonge mensen vragen (Jongoe sma e aksi), bladzijde 316, 317.
5 Papa nanga mama nanga pikin kan go prakseri foe den wortoe foe Josua foe owroeten, di ben taki: „Mi nanga mi osofamiri, wi sa dini Jehovah.” Dan abi a fasti bosroiti foe wroko makandra so taki oenoe abi wan prati na gemeente konmakandra dorodoro.—Jos. 24:15.