Dinari ini a diniwroko e doe boen wroko
1 „Den sori taki den na man di e wroko tranga troetroe èn a bribi foe den de foe si na Kownoekondre diniwroko di den e doe fajafaja èn foe di den e jepi trawan foe kon kisi wan tranga bribi.” Na so Georganiseerd om onze bediening te volbrengen (Orga foe doe wi diniwroko) e taki na tapoe bladzijde 57, foe dinari ini a diniwroko. Foe troe, na eksempre na jeje fasi di den dinari foe wi ini a diniwroko e gi, warti foe wi waka na baka dati. Efoe wi e wroko makandra nanga den èn nanga den owroeman, dan wi „e meki a skin gro so taki a e bow ensrefi na ini lobi”.—Ef. 4:16.
2 Dinari ini a diniwroko abi wan prenspari ròl ini a gemeente. Prakseri foe ala den boen wroko di den e doe! Den e sorgoe gi moni afersi, den poeblikâsi, den tijdschrift, den abonnement, èn den gebied; den e dini leki jepiman; e sorgoe gi a geluid; èn den e jepi foe sorgoe gi a Kownoekondre zaal. Den abi prati na a Theokrasia Diniwroko skoro èn na a Diniwroko-konmakandra. Son wan foe den kan hori poeblikitaki srefi noso hori wan toe foe den gemeente konmakandra. Neleki pisi foe a skin, na so dinari ini a diniwroko e doe wroko di wi abi fanowdoe.—1 Kor. 12:12-26.
3 Te trawan e si taki dinari ini a diniwroko e wroko leki wán man makandra nanga den owroeman foe di den de wan pisi foe wán skin foe dinari, èn taki den abi lespeki gi makandra èn e froestan makandra, dan dati e gi den deki-ati foe doe a srefi sani (Kol. 2:19). Foe di den e doe den frantiwortoe foe den na wan getrow fasi ibri wiki baka, èn foe di den e sori taki den e teki notisi foe trawan, dan den e jepi foe meki a jejefasi foe a gemeente gro.
4 San wi kan doe foe sori taki wi e warderi den dinari ini a diniwroko di e wroko tranga? Wi moesoe sabi sortoe wroko den kisi foe doe èn sori taki wi de klariklari foe wroko makandra nanga den te den e aksi dati foe wi. Nanga wortoe noso nanga sani di wi e doe, wi kan meki den kon sabi taki wi e warderi a wroko foe den (Odo 15:23). Den wan di e wroko tranga foe a boen foe wi, e froedini en taki wi e sori dati wi e erken den troetroe.—1 Tes. 5:12, 13.
5 A Wortoe foe Gado e sori san na a ròl nanga den markitiki gi dinari ini a diniwroko (1 Tim. 3:8-10, 12, 13). A boen santa diniwroko di den e doe de prenspari foe meki sani waka boen ini a gemeente. Den man disi e froedini en taki wi e tan gi den deki-ati, foe di den alamala abi „foeroe foe doe na ini a wroko foe Masra”.—1 Kor. 15:58.