A pionierwroko—Gebroiki wi ten na wan koni fasi!
1 ’Mi abi someni sani foe doe kaba! A ben sa de wan koni sani troetroe te mi e bigin nanga a pionierwroko na a ten disi? Disi na san wan sisa ben prakseri di a ben arki wan owroeman di de wan pionier, e hori wan lezing na wan kring konmakandra, èn a lezing ben nen: „Go doro fajafaja nanga a pionier diniwroko.” Wan jongoe brada di ben sidon na mindri a srefi poebliki ben prakseri: ’Fa a takiman e meki presi gi a pionierwroko? Mi a no wan owroeman, ma mi libi foeroe nanga someni wroko kaba!’
2 Di na owroeman ben taki moro fara foe den blesi foe a pionierwroko, a ben abi wan takimakandra nanga difrenti pionier foe a kring di ben froeteri sortoe sani den ben moesoe kenki so taki den ben kan doe a pionierwroko, èn fa Jehovah ben blesi den troetroe gi den moeiti di den meki. Wan ben malengri, wan ben abi wan trowpatna di no de na bribi, èn wan no ben doe en grontapoe wroko moro, ma a moni di a ben kisi ben de nofo gi den sani di a ben abi fanowdoe. Di den brada nanga sisa di ben sidon na mindri a poebliki ben jere fa den pionier disi ben abi boen bakapisi nanga a jepi foe Jehovah, dan den ben bigin ondrosoekoe a denki èn a situwâsi foe den, ete wan leisi. Wi e kari joe foe doe a srefi sani, spesroetoe foe di den joeroe di den pionier moesoe doro kon saka now, èn a moro makriki gi moro foeroe preikiman foe a boen njoensoe foe doro den joeroe disi.
3 Wi sabi taki Jehovah na a Kriaman nanga na Universeel Soeverein, èn taki wi e libi foe di En wani dati (Dan. 4:17; Tori. 17:28). Wi e si krin taki Jehovah e gebroiki wán organisâsi nomo. A de wan grani gi wi foe dini na wan loyaal fasi nanga na organisâsi disi, èn wi e horibaka gi a „getrow èn koni srafoe” foe di wi e gi kotoigi foe a Kownoekondre bifo a kaba e kon (Mat. 24:45; 25:40; 1 Petr. 2:9). Foe di wi de fara na ini „den lasti dei” kaba, meki wi e froestan taki wi no abi foeroe ten moro foe preiki (2 Tim. 3:1). Na a srefi ten, wi moesoe sorgoe wi osofamiri na materia sei (1 Tim. 5:8). A sori leki a moni di sma e kisi now no sari foe man bai den srefi sani di den ben bai fosi. Kande a gosontoe foe wi no de so boen leki fa a ben de fosi. Èn efoe wi de eerlijk dan wi wani abi pikinso ten gi wisrefi èn wi wani bai wan toe sani gi wisrefi (Preik. 3:12, 13). So boen, wi kan aksi wisrefi efoe a ben sa de wan koni sani troetroe foe teki a kari foe go doe a pionierwroko.
4 Wi alamala abi a frantiwortoe foe ondrosoekoe a situwâsi foe wi finifini èn foe bosroiti efoe wi kan doe a pionierwroko (Rom. 14:12; Gal. 6:5). A e gi wi deki-ati foe si taki moro sma e gi jesi na a kari foe go doe a pionierwroko. Ala di druk nanga problema de na ini den lasti dei disi, tokoe a dienstbericht di tjari kon na doro na ini a Jaarboek 1999 e sori, taki pikinmoro 700.000 sma foe Jehovah pipel na heri grontapoe e go doro fajafaja foe doe a pionierwroko. Awansi den moesoe dini na ini moeilek ekonomia situwâsi, awansi den no abi vervoer, awansi den e ondrofeni problema nanga a gosontoe foe den, noso den e kisi foe doe nanga tra sortoe druk nanga problema, tokoe den brada nanga sisa disi no e kon weri foe doe san boen, èn wi e prèise den foe disi (Gal. 6:9). Jehovah aksi den foe tesi en, èn den doe disi toe (Mal. 3:10). Den e firi taki den gebroiki a ten nanga den goedoe foe den na wan koni fasi te den e doe a pionierwroko, èn taki Jehovah blesi den troetroe foe di den ben kon kenki wan toe sani di ben de fanowdoe so taki den ben kan go doe a pionierwroko èn tan doe en.
5 Pionier e kisi blesi: Wan sisa na Kameroen di abi wan jongoe oemapikin, e froeteri: „Sensi mi oemapikin gebore, a ben go makandra nanga mi na ini a diniwroko ala ten. Srefi bifo a ben leri foe waka, mi ben tjari en na tapoe mi baka, foe di mi ben tai en steifisteifi nanga wan pisi krosi. Wan mamanten na ini a diniwroko, mi ben stòp na sei pasi na wan pikin tenti pe sma e seri sani. Mi pikin ben gowe libi mi, ala di a ben teki wan toe tijdschrift nanga en di a ben poeroe na ini mi tas. A ben waka go na wan tra pikin tenti pe sma e seri sani di ben de krosibei. Ala di a no ben man taki foeroe, tokoe a ben hari a prakseri foe wan oema, èn a ben pristeri wan tijdschrift. Na oema ben froewondroe srefisrefi foe si so wan jongoe pikin abi wan prati na a wroko disi. A ben teki a tijdschrift nanga wan bijbelstudie wantewante!”
6 Wan owroeman na Zambia di de wan osofamiri edeman èn di abi wan foeroeten grontapoe wroko ben teki a kari gi moro jepipionier, èn a ben bosroiti foe doe a jepi-pionierwroko, ala di a ben abi foeroe foe doe. A ben wani poti wan eksempre gi a gemeente èn gi en osofamiri. Son leisi a ben poti en wagi na sei pasi èn a ben prei A sroto gi wan kolokoe osofamiri na tapoe cassette èn a ben kari den sma di ben waka pasa foe kon arki san ben leisi nanga tranga sten. Na so fasi, a ben man prati 16 Osofamiri-boekoe nanga 13 Sabi-boekoe, èn a ben bigin toe bijbelstudie.
7 Wan toemoesi moi pionier jeje ben de foe si toe na Zimbabwe, a kondre sei Zambia. Na ini april 1998, wan gemeente nanga 117 preikiman ben skrifi taki den ben abi 70 jepipionier nanga 9 gewoon pionier. Wan tra gemeente nanga 94 preikiman ben abi 58 jepipionier. Wan trawan nanga 126 preikiman, ben skrifi taki 58 sma ben teki a bosroiti foe doe a jepi-pionierwroko makandra nanga den 4 gewoon pionier. A dienstjari di pasa ben de wan toemoesi boen jari na Zimbabwe. Ala di den brada drape ben abi foeroe foe doe nanga den osofamiri afersi, nanga sani di de foe doe na ini a gemeente, èn nanga a bow foe a bijkantoro, tokoe den ben gebroiki a ten foe den na wan koni fasi gi a diniwroko.
8 Pionier e froestan taki, te den wani bigin nanga a pionierwroko èn horidoro dan dati no e anga foe den eigi krakti. Den na den fosiwan foe taki dati ala san den man doe, den e doe bika den e „bow na tapoe a krakti di Gado e gi” (1 Petr. 4:11). A bribi foe den e meki taki den kan go doro nanga a diniwroko foe den dei foe dei. Na presi taki den e soekoe den eigi boen nomo, dan pionier di abi boen bakapisi e froestan taki „foeroe strei” de fanowdoe efoe den wani go doro fajafaja, ma a bakapisi de taki den e kisi foeroe blesi.—1 Tes. 2:2.
9 Na eksempre foe Paulus e gi wi deki-ati foe waka na en baka: Bijbel e froeteri wi foe den bakapisi di Paulus ben abi na ini a diniwroko èn a boen jepi di a ben gi someni sma. Tokoe, efoe wán sma ben abi toemoesi foeroe wroko, dan Paulus ben de a sma dati. A ben horidoro ala di den ben froefolgoe en èn a ben kisi problema na skin sei, so taki a ben man preiki a boen njoensoe èn gi den gemeente krakti. A ben moesoe froedrage wan serjoesoe problema nanga en gosontoe toe (2 Kor. 11:21-29; 12:7-10). A ben abi a fasti bosroiti foe gebroiki a ten di a ben abi na wan koni fasi. A ben erken taki a ben doe ala en wroko nanga a jepi foe Jehovah (Fil. 4:13). No wan foe den sma di Paulus ben jepi ben sa kan abi reide foe taki dati a ten nanga a moeiti di a ben gi na a diniwroko foe Jehovah, ben de lasi ten noso taki a ben kan gebroiki en na wan moro boen fasi. Ija, na ini a ten disi wi e kisi winimarki ete foe di Paulus ben gebroiki a ten foe en na wan koni fasi! Fa wi e warderi a rai di a ben gi nanga jepi foe Gado en santa jeje, foe jepi wi foe ondrosoekoe san na den moro prenspari sani na ini wi libi èn hori fasti na a waarheid na ini den moeilek ten disi!
10 Now leki noiti bifo, ’a ten di tan abra foe preiki a boen njoensoe kon sjatoe’ (1 Kor. 7:29; Mat. 24:14). Foe dati ede, a fiti foe aksi wisrefi: ’Efoe mi libi ben sa kon na wan kaba tamara sondro taki mi ben froewakti dati, dan mi ben sa man taigi Jehovah tide taki mi gebroiki mi ten na wan koni fasi?’ (Jak. 4:14) Foe san ede joe no e taki nanga Jehovah na ini begi nownow, èn gi en a djaranti taki joe wani gebroiki joe ten na wan koni fasi foe di joe na wan foe den Kotoigi foe en? (Ps. 90:12) Begi Jehovah foe a kan jepi joe foe meki joe libi kon moro makriki. Srefi efoe joe ben taki dati joe no ben man pionier, dan a de so taki now joe e si dati joe kan fiti a pionierwroko na ini joe libi?
11 Doe ala san joe man doe na ini joe situwâsi: Wi kan froestan taki, a no ala sma di wani dati kan poti 70 joeroe wan moen na wan sei foe de wan gewoon pionier foe a situwâsi ede di den de na ini. Ma foeroe preikiman e seti sani na so wan fasi taki den kan gi 50 joeroe wan moen na a diniwroko leki jepipionier, someni tron leki den kan noso doronomo. Efoe a situwâsi foe joe de so, taki joe no kan doe a jepi-pionierwroko noso a gewoon pionierwroko now, dan no lasi-ati. Go doro foe begi efoe joe situwâsi kan kenki. Na a srefi ten, efoe joe no kan kenki sani kwetikweti, dan a de wan trowstoe foe sabi taki joe e plisi Jehovah nanga san joe man doe nanga joe heri sili na ini en diniwroko (Mat. 13:23). A e si taki joe e tanapoe kánkan na en sei èn taki joe e meki moeiti foe de wan getrow preikiman di no e meki no wan moen pasa sondro foe soekoe wan okasi foe gi kotoigi. Kande joe kan go na fesi foe di joe e meki a koni foe joe foe gi kotoigi, kon boen dorodoro, ala di joe e span joesrefi foe kon de wan moro boen preikiman èn leriman foe a boen njoensoe.—1 Tim. 4:16.
12 Nanga „Jehovah en bigi dei di e gi frede” so krosibei, dan wi moesoe gebroiki a ten di tan abra na wan koni fasi, efoe wi wani kaba a wroko di wi kisi foe doe (Joèl 2:31). Satan sabi taki en ten sjatoe, en leki noiti bifo, a e proeberi ala san a man foe meki a libi foe wi kon moro frekti èn foe meki en moeilek gi wi foe poti prakseri na tapoe den troetroe prenspari sani (Fil. 1:10; Openb. 12:12). Noiti no denki taki Gado no e teki notisi foe joe. Jehovah man jepi joe foe meki joe libi kon de moro makriki, so taki joe kan doe ala san joe man foe doe na ini a diniwroko (Ps. 145:16). Ma kolokoe taki foeroe sma di e loekoe a situwâsi foe den ete wan leisi, e si taki den kan doe a jepi-pionierwroko noso a gewoon pionierwroko. Ija, den pionier abi foeroe satisfaksi foe di den e gebroiki a ten foe den na wan koni fasi. Joe sa de wan foe den?