Meki Wi ’¡Taki Syatu San Wi Wani Taki!’
1 Oiti a ben de so, taki wan ososma kon na mindri a pristeri fu yu di yu ben sreka bun na fesi, èn a ben e taki: „San yu wani? ¡Taki syatu san yu wani taki!” San wi kan leri fu so wan ondrofeni?
2 Na ini a ten disi furu sma no abi pasensi. Den wani sabi suma na wi èn fu san ede wi kon. Te den kon sabi taki wi kon fu taki fu Bijbel nanga den, dan kande den no sa wani arki. Furu sma no feni en prenspari fu leisi Bijbel èn fu taki fu yeye sani. Fa wi kan overtoigi den sortu ososma disi taki den musu teki wan tu miniti fu taki Bijbel tori nanga wi?
3 San E Wroko Moro Bun: A sroto na fu sori na ososma taki Bijbel e gi trutru lusu fu den problema di a e broko en ede nanga den èn yu musu du disi ini so weiniki wortu leki a kan. Den pristeri di abi a moro bun bakapisi abi wan spesrutu aksi na ini fu meki na ososma go prakseri, èn wan tekst di e gi piki na tapu na aksi di e kon baka dati. Yu kan abi prisiri efu yu e pruberi wan tu fu den rai di e kon now. Den meki fu yepi wi fu kon esi-esi tapu a tori èn fu ’taki syatu san wi wani taki’, ala di wi e wiki a belangstelling fu na ososma.
4 Na ini kontren pe furutron sma e taki dati den no abi belangstelling, poti wan aksi di abi fu du nanga densrefi:
◼ „Te wi e kon moro krosibei fu a tra milenium, dan ¿yu e denki taki sani o kon moro bun noso yu e tweifri na dati? [Gi okasi fu piki.] Bijbel ben taki na fesi fu den bruya situwâsi di wi e si na ini a ten disi èn so srefi san a bakapisi sa de.” Leisi 2 Timoteus 3:1, 2, 5 nanga Odo 2:21, 22.
◼ „Sma e broko den ede furu nanga afersi fu a gosontu fu den na ini a kondre disi. ¿Yu sabi taki Gado pramisi fu lusu ala den problema di abi fu du nanga a gosontu fu têgo?” Leisi Openbaring 21:3, 4.
◼„Fa yu denki taki wi libimakandra ben sa abi wini te ibriwan sma di e libi dya e poti Bijbel gronprakseri na ini den libi?” Leisi Mateus 22:37-39.
5 Fu di wi kisi a komando fu preiki a bun nyunsu fu a Kownukondre, dan pe disi kan wi musu poti prakseri na san a Kownukondre sa du. Yu ben sa kan taki:
◼ „¿Yu sabi taki Bijbel, a moro owru buku na grontapu, ben taki na fesi dati wan tiri sa de gi heri grontapu?” Leisi Danièl 2:44.
◼ „Fa yu e prakseri taki sani ben o de efu Yesus ben o tiri grontapu?” Leisi Psalm 72:7, 8.
6 Na ini kontren pe sma de ini wan relisi, yu ben kan pruberi wan fu den inleiding disi:
◼ „Furu sma e ondrofeni taki tra sma e desko den fu di den na umasma noso mansma, fu relisi ede noso fu a kloru fu den skin ede. ¿Fa yu denki taki Gado e feni a krutu fu tra sma na so wan fasi?” Leisi Tori fu den Apostel 10:34, 35.
◼ „Wi sabi taki Yesus Krestes ben du furu wondru na ini en ten. ¿Efu yu ben sa kan aksi en fu du ete wan wondru, sortuwan yu ben o wani a du?” Leisi Psalm 72:12-14, 16.
7 Efu na ososma e draidrai fu opo a doro, yu ben sa kan begin a takimakandra nanga disi:
◼ „Na ini a ten disi furu sma kon weri fu yere fu problema. Den wani yere fa problema o lusu. Tweifri no de taki yu wani yere fa den problema o lusu. Ma pe wi kan feni trutru lusu gi den problema fu wi?” Gi okasi fu piki. Leisi 2 Timoteus 3:16, 17.
8 Fu San Ede Yu No E Pruberi En? Nofotron wan makriki, syatu aksi na ala san de fanowdu fu wiki a belangstelling fu na ososma. Wan uma, di ben gens kotoigi fositen ben kari tu sisa kon na ini en oso, baka di wan fu den ben poti na aksi: „¿Yu sabi san na a Kownukondre di yu e begi fu dati na ini a Wi Tata Begi?” Na aksi ben wiki a belangstelling fu na uma èn a ben teki wan bijbelstudie. ¡Now a de wan futuboi fu Yehovah di gi ensrefi abra kaba!
9 Te yu e taki nanga wan ososma, gebroiki opregti wortu. Taki komoto fu yu ati. Kande sma sa handri moro bun te den abi na overtoigi taki wi e sori trutru belangstelling gi den.—Tori. 2:46, 47.
10 A wroko fu preiki a bun nyunsu na wan tyalensi na ini a ten disi. Son ososma no e frutrow freimde sma. Trawan abi wan libi pe den abi furu fu du èn no abi ten fu tra sani. Toku wi kan de seiker taki furu sma de fu feni ete di warti a bun nyunsu (Mat. 10:11). A muiti di wi e du fu suku den, kande sa abi moro bun bakapisi te wi e hori den pristeri fu wi syatu èn te wi e ’¡taki syatu san wi wani taki!’