¡Poti Prakseri na a Wortu fu Yehovah Ibri Dei!
1 Ibri dei e tyari nyun tyalensi kon gi a bribi fu yu. Kande wan man noso wan uma fu grontapu di yu sabi, e tan dwengi yu fu meki mofo nanga en fu go koiri nanga en. A leriman fu yu wani taki yu musu feti na baka wan grontapu wroko, noso a basi fu yu wani taki yu musu wroko moro langa. Kande a gosontu fu yu e go na baka. Ala di den problema disi kan miti yu iniwan ten, toku yu no de yu wawan. Yehovah de srekasreka fu gi yu a koni di de fanowdu fu feti nanga den problema disi. A luku di yu e luku a bijbeltekst nanga den komentaar na ini Ondrosuku den Buku fu Bijbel, na wan fasi fa yu kan teki a Wortu fu Yehovah na ini yu doronomo. ¿Yu e nyan bun fu a moi sani disi di seti?
2 Yepi De: Yesaya 30:20 e fruteri taki Yehovah na a „Gran Leriman” di a pipel fu Gado kan go na en fu suku yepi. A e gi yu yoisti san yu abi fanowdu fu feti nanga den tyalensi di e kon na tapu a bribi fu yu. Fa? A vers di e kon now e fruklari: „Un eigi yesi sa yere wan wortu na un baka di e taki: ’Disi na a pasi. Waka na tapu.’” Na ini a ten disi, Yehovah e seni a „wortu” fu en kon nanga yepi fu den Buku fu Bijbel èn nanga den publikâsi fu ’a getrow srafu’ (Mat. 24:45). Soso na ini den Waktitoren artikel wawan di pasa kaba èn di, te yu e luku en bun, e taki fu ala pisi fu a libi fu wan Kresten, yu kan feni bun furu koni. A luku di yu e luku den artikel baka di kari na ini Ondrosuku den Buku fu Bijbel, e yepi yu fu kon sabi wan heri ipi sani di abi bun furu waarde ini a feti di yu e feti nanga ala sortu problema.—Yes. 48:17.
3 Poti Ten na wan Sei gi Dati: Ala di den mamanten ben de wan ten di wán mama ben abi furu fu du, toku a ben meki en wan prenspari sani fu leisi a tekst nanga komentaar èn taki fu den nanga a manpikin fu en, ala di a boi ben nyan a mamanten-nyanyan fu en. Den wortu disi nanga den begi ben de den lasti wortu di a boi ben yere ibri mamanten fosi a ben go na skoro. Den ben gi en krakti fu kakafutu gi a kori di sma ben wani kori en fu abi seks, den ben gi en krakti fu abi a fasti bosroiti fu no abi noti fu du nanga nationalisme, èn fu gi studenti nanga leriman kotoigi na wan deki-ati fasi. Ala di a ben de a wan-enkri Kotoigi na skoro, toku a no ben firi taki a ben de en wawan.
4 Frutrow tapu Yehovah nanga a Wortu fu en fu sori yu a pasi èn fu tiri yu. Efu yu sa du disi, dan Yehovah sa de wan trutru sma gi yu, leki wan mati di yu e frutrow. ¡Suku Yehovah ibri dei! Meki a de so, taki den ai fu yu e tron „ai di sa si a Gran Leriman”, makandra nanga milyunmilyun tra sma na heri grontapu di e luku a Wortu fu Gado ala dei.