Schema gi na osofamiri—A deitekst
1 Lobi-ati papa nanga mama e meki tranga muiti ibri dei fu gi den pikin fu den bun nyanyan. Ma a de moro prenspari srefi fu gi den pikin yeye nyanyan di komoto fu Gado Wortu (Mat. 4:4). Wan fasi fa yu kan yepi yu pikin fu kon lobi yeye nyanyan èn fu „gro kon kisi frulusu”, na te yu e teki ten ibri dei fu luku a deitekst nanga a komentaar makandra leki osofamiri (1 Petr. 2:2). Pe yu kan poti a deitekst na tapu a schema fu na osofamiri?
2 Te unu e nyan: Efu yu e bigin a dei nanga wan takimakandra fu a deitekst, dan dati kan yepi na osofamiri fu yu fu prakseri fu Yehovah a heri dei (Ps. 16:8). Wan mama ben bosroiti fu leisi èn taki makandra nanga a boi fu en fu a deitekst nanga a komentaar, aladi a boi ben e nyan na mamanten. A mama ben bosroiti sosrefi fu begi makandra nanga a boi, bifo a go na skoro. Disi ben tranga a boi fu tanapu kánkan te sma ben e dwengi en fu sori lobi gi en kondre, te a ben musu kakafutu gi hurudu, èn te a ben musu gi kotoigi nanga deki-ati na studenti, skoromisi, noso skoromeester. Aladi a boi ben de a wan-enkri Kotoigi na skoro, toku noiti a no ben firi taki a ben de en wawan.
3 Efu unu no man abi wan takimakandra fu a deitekst na mamanten, dan unu leki osofamiri kan luku a deitekst moro lati, kande na a brekten nyanyan. Na a ten dati, son osofamiri e taki sosrefi fu den sani di den ondrofeni na ini a preikiwroko èn fu den moi tori di densrefi ben leisi na ini Bijbel. Furu fu den e memre taki den okasi di den ben e sidon taki makandra te den ben e nyan, na wan fu den moro prisiri okasi di den ben abi makandra leki osofamiri.
4 Na neti: Son osofamiri feni taki a moro bun gi den fu luku a deitekst bifo den e go sribi na neti. Disi kan de wan bun okasi sosrefi fu begi makandra. Te den pikin fu yu e yere ibri dei fa yu e taki fu Yehovah èn fa yu e begi en, dan A e kon tron wan trutru sma gi den.
5 Meki a de so, taki Yehovah blesi den muiti di yu e du fu poti a waarheid go dipi na ini na ati fu yu pikin, fu di yu e gebroiki a pikin buku Ondrosuku den Buku fu Bijbel ala dei, na wan bun fasi.