Yu e kisi wini fu Ondrosuku den buku fu Bijbel ala dei?

Yu abi a gwenti fu leisi a deitekst nanga a komentaar na ini Ondrosuku den Buku fu Bijbel ala dei, fu kon moro krosibei na Yehovah? Efu dati no de so, dan kande yu kan pruberi fu du dati. Furu sma e luku a tekst fruku mamanten so taki heri dei den kan prakseri san den leisi (Yos 1:8; Ps 119:97). Ma fa yu kan kisi moro wini fu a Bijbeltekst? Leisi den tra tekst lontu a vers disi fu kon sabi moro fu a tori. Luku efu yu sabi wan Bijbel tori di e tyari a gronprakseri kon na krin di abi fu du nanga a tekst. Baka dati, luku fa yu kan gebroiki a gronprakseri dati na ini yu aladei libi. Te yu e gi yesi na Gado Wortu te yu e teki bosroiti, dan yu o sabi san fu du èn yu libi o waka bun.​—Ps 119:105.

Betel famiri na heri grontapu gwenti luku a deitekst baka te den nyan den mamanten nyanyan. Na ini den yari di pasa, furu fu den takimakandra disi ben de fu feni tapu JW Broadcasting^® na SPESRUTU PROGRAMA NANGA KONMAKANDRA. O ten ben de a lasti leisi di yu arki den? Kande wan tu fu den sani di yu o yere na soifri san yu abi fanowdu. Fu eksempre, fa a tori fu Lot e yepi yu te yu musu teki bosroiti?

LUKU A FELEM NO LOBI GRONTAPU (1YO 2:15). BAKA DATI, PIKI DEN AKSI DISI:

• Fu sortu Bijbel gronprakseri a deitekst disi e taki?

• Fa a tori fu Lot e leri wi taki wi no musu lobi grontapu noso den sani fu grontapu?​—Ge 13:12; 14:12; 19:3, 12, 13, 24-26

• Fa wi kan sori taki wi lobi Yehovah èn taki wi no lobi grontapu noso den sani fu grontapu?