Yu de srekasreka fu go na skoro?
1. Sortu okasi yu abi te yu o bigin nanga skoro?
1 Efu disi na a fosi yari taki yu de na wan skoro, noso efu yu ben de na a skoro kaba, unu leki yongu Kresten o kisi fu du nanga muilek situwâsi nanga tesi. Ma unu abi moi okasi tu fu gi „kotoigi fu a waarheid” (Yoh. 18:37). Yu de srekasreka fu gi kotoigi na skoro?
2. Na sortu fasi yu de srekasreka kaba fu go na skoro?
2 Yu kisi furu leri fu Yehovah, fu yu papa nanga mama, èn fu a getrow èn koni srafu. Den leri disi na fu yepi yu, so taki sani e waka bun gi yu na ini ibri pisi fu yu libi (Odo 1:8; 6:20; 23:23-25; Ef. 6:1-4; 2 Tim. 3:16, 17). A no de fu taki dati now yu sabi sortu tesi yu kan fruwakti na skoro. Fu di yu sabi san na Gado wani èn fu di yu sabi san yu kan fruwakti na skoro, meki yu kan sreka yusrefi fu gi kotoigi (Odo 22:3). Poti seryusu prakseri na den rai fu Bijbel di skrifi na ini den tu buku di de spesrutu gi yonguwan (Wat jonge mensen vragen — Praktische antwoorden), èn sosrefi den artikel gi yonguwan di e kon doronomo na ini den Ontwaakt!
3. Na sortu fasi yu o man gi kotoigi?
3 Yu abi wan spesrutu kontren fu wroko, èn na so yu e kisi na okasi fu gi kotoigi na furu difrenti fasi. Trawan sa si fa yu e weri krosi èn moi yusrefi na wan fasi di fiti. Den sa si tu taki yu e tyari yusrefi bun èn taki yu e taki na wan lespeki fasi. Boiti dati, den o si taki yu e sori lespeki gi tra pikin nanga den leriman na skoro, den o si taki yu e wroko bun na skoro, èn taki yu abi wan bun marki na ini a libi. Te den e si ala den sani disi, dan kande wan tu fu den o aksi yu: „Fu san ede yu no de leki den tra pikin?” (Mal. 3:18; Yoh. 15:19) Na so yu kan kisi na okasi fu gi kotoigi èn fu fruteri den san yu e bribi (1 Tim. 2:9, 10). A heri yari langa yu o kisi fu du nanga tesi, soleki den fesa fu a kondre noso tra fesadei. Efu den e aksi yu fu san ede yu no e teki prati na den fesa dati, dan yu o taki nomo: „Mi no mag du dati fu di mi na wan Yehovah Kotoigi?” Noso yu o teki na okasi fu gi kotoigi fu yu lobi-ati Tata, Yehovah? Te yu e sreka yusrefi bun èn te yu e aksi Yehovah fu yepi yu, dan yu o de srekasreka fu gi bun kotoigi na leriman, na skoro pikin, èn na trawan.—1 Petr. 3:15.
4. Fu san ede yu kan de seiker taki a skoroyari o waka bun gi yu?
4 Aladi a kan de so taki yu frede pikinso fu go baka na skoro, toku yu kan de seiker taki furu sma di wani taki a skoroyari fu yu waka bun, e horibaka gi yu. Boiti dati, wi e prisiri nanga yu, fu di yu abi na okasi fu gi kotoigi na trawan na skoro. Fu dati ede, teki deki-ati èn de srekasreka fu go na skoro!