Libisma Kan Lasi Den Libi!
1 Bijbel e tyari a wani fu Gado kon na krin „taki ala sortu sma musu kisi frulusu”. Ma, a tru so srefi taki a libi fu den milyardmilyard sma na grontapu e anga fu a fasi fa den e denki fu Yehovah Gado èn fu a Kownukondre fu en nanga yepi fu Yesus Krestes. Sma kan abi wan yoisti fasi fu denki soso te den abi „soifri sabi fu waarheid” (1 Tim. 2:3, 4). Ala di wi e warskow sma taki heri esi Gado sa puru ala ogridu na grontapu so taki a kan opo a pasi gi en nyun grontapu fu retidu, toku wi kisi a komando so srefi fu du wan tumusi prenspari wroko di e kibri libi.—Mat. 24:14; 28:19, 20; Rom. 10:13-15.
2 Fu San Ede a Wroko Prenspari So? Yesus ben gi sma a warskow taki wan „bigi banawtu sa de, soleki fa no ben pasa ete fu sensi a bigin fu grontapu” (Mat. 24:21). A bigi banawtu dati sa doro en heimarki na Armagedon (Openb. 16:16). Den ipi-ipi sma di sa kisi pori efu den no e gi yesi na a bun nyunsu na so srefi den famiriman fu wi di no de na bribi, birtisma, wrokokompe, skoromati, nanga sma di wi sabi bun. Ma wi wani fu yepi „ala sortu sma” soleki fa Gado e du dati. A sori en lobi gi a heri libisma famiri na grontapu fu di a gi en Manpikin, Yesus Krestes, leki wan lusu-paiman gi ala sma (Yoh. 3:16). Wi musu meki muiti fayafaya fu gi ala sma wan kari fu lon go na a kibripresi fu Yehovah. Te wi e du a preikiwroko dorodoro, dan dati sa meki taki wi no e kisi brudu-paiman.—Esek. 33:1-7; 1 Kor. 9:16.
3 San Na a Marki fu Wi? A Wortu fu Gado e poti krakti na tapu o prenspari a preikiwroko de. Soleki fa na apostel Paulus e sori, dan „a lobi di Krestes abi e pusu wi” fu libi akruderi a pasi fu Gado (2 Kor. 5:14). Na tapu fu dati, A Waktitoren furutron e poti krakti tapu a plekti di wi abi fu preiki. Doronomo Wi Kownukondre Dienst e sori wi fa fu du a preikiwroko. Den owruman e orga a wroko èn den e gi wi deki-ati fu teki prati na en. Tra preikiman e aksi wi fu teki prati na a preikiwroko makandra nanga den. Wi e yere furu sani di abi fu du nanga a sreka di wi musu sreka den pristeri fu wi, a pristeri di wi musu pristeri tijdschrift nanga tra publikâsi, a tyari di wi musu tyari gobaka, a hori di wi musu hori bijbelstudie, èn a gebroiki di wi musu gebroiki ibri okasi fu gi kotoigi. Ala den sani disi e yepi wi fu doro a marki fu kibri sma libi.—1 Kor. 9:22, 23; Ef. 1:13.