Gebroiki Sani Di No Pasa So Langa Ete fu Hari Sma Prakseri
1 Yu ben sa wani abi bun idea doronomo di e meki taki yu diniwroko no e kon soi? Yu ben sa wani abi bun idea doronomo di e meki taki yu kan hari sma prakseri fu arki a Bijbel boskopu? Dan gebroiki den sani di e pasa na ini grontapu èn na ini yu birti fu bigin takimakandra. Yu ben sa kan poti prakseri na sani di no pasa so langa ete na ini yu birti èn na ini yu kondre noso na ini dorosei kondre. Den sani disi e kenki doronomo (1 Kor. 7:31). Luku den eksempre di e kon now.
2 Sma e broko den ede trutru nanga ekonomia problema èn so srefi fa fu pai gi den sani di den abi fanowdu na ini a libi. So bun, yu ben sa kan taki:
◼ „Yu yere nyunsu bari taki, agen [kari a nen fu a sani] kon moro diri?” Noso yu kan taki fu a feni di sma no man feni wroko, efu wan wrokope ben abi fu seni furu wrokoman gowe. Akruderi a fasi fa yu wani go moro fara nanga a takimakandra, yu ben kan aksi tu: „Oiti yu aksi yusrefi fu san ede a de so wan muilek sani fu frudini nofo moni?” noso, „Yu denki taki a sa tan wan muilek sani ala ten, fu frudini nofo moni fu tan na libi?”
3 Wan tra sani fu san yu kan taki na nyunsu fu ogri di sma e du nanga tranga, soleki ogri di feni presi na ini osofamiri noso na mindri skoro pikin, di tyari furu sari kon. Yu ben kan aksi:
◼ „Yu ben leisi na ini koranti taki [kari a sani di ben pasa na ini a libimakandra]?” Dan yu kan aksi: „Fu san ede yu e denki taki sma e du someni ogri nanga tranga na grontapu?” noso, „Yu e denki taki oiti wan ten sa kon pe wi no o frede moro?”
4 Nyunsu fu bigi frudu di pori someni sani, gronseki, noso dyugudyugu na ini difrenti pisi fu grontapu, na sani di kan yepi tu fu hari sma prakseri. Yu ben sa kan aksi fu eksempre:
◼ „Na Gado na a sma di de frantwortu gi [kari a rampu]?” Noso yu ben kan sori go na a dyugudyugu di no pasa so langa ete èn yu ben kan taki: „Efu ibriwan sma wani taki vrede musu de, dan fu san ede meki a de so muilek fu tyari vrede kon na grontapu?”
5 Tan luku sortuwan fu den sani di no pasa so langa ete, yu kan teki fu bigin takimakandra. Wan tu eksempre di kan yepi yu de fu feni ondro „Sani Di No Pasa So Langa Ete”, tapu bladzijde 5, 6 fu a brochure Fa foe bigin èn go doro nanga bijbel takimakandra. Ma sorgu taki yu no e teki sma sei na ini afersi di abi fu du nanga politiek noso problema na ini a libimakandra. Na presi fu dati, poti prakseri na Bijbel èn na Gado Kownukondre leki a wan-enkri sani di man tyari wan trutru lusu gi den problema fu a libisma famiri.