Preiki na ini wan grontapu di e kenki doronomo
1 O fa sani kan kenki so esi-esi! Wantronso wan bigi rampu leki wan gronseki noso wan frudu, problema na ekonomia sei, bruya na politiek sei, noso wan bigi rampu di de na telefisi noso koranti, kan tron wan tori di furu sma e taki fu en. Ma heri esi baka dati sma kan poti prakseri na tra sani (Tori. 17:21; 1 Kor. 7:31). Fa wi kan hari a prakseri fu sma, so taki wi kan prati a Kownukondre boskopu nanga den na ini a grontapu disi di e kenki doronomo?
2 Kon si krin nanga san tra sma e broko den ede: Wán fasi fu hari a prakseri fu sma na fu taki fu sani di pasa no solanga ete. Fu gi den arkiman a deki-ati fu denki seryusu fu a nen di den ben abi na Gado, dan wan leisi Yesus ben taki fu wan rampu di sma ben abi na prakseri ete (Luk. 13:1-5). Na a srefi fasi, te wi e tyari a bun nyunsu gi sma, dan wi musu taki fu wan nyunsu di den sma na ini a kontren fu wi, abi na prakseri. Ma te wi taki fu den tori disi, wi musu luku bun fu no teki sei te wi e taki fu politiek noso fu problema na ini a libimakandra.—Yoh. 17:16.
3 Fa wi kan kon sabi san sma abi na prakseri nownow? Kande a moro bun fasi fu kon leri sabi dati na fu poti wan aksi èn fu arki san den e taki (Mat. 12:34). Te wi e broko wi ede nanga sma, dan wi sa kon sabi fa den e denki èn na wan koni fasi wi kan poti moro aksi fu kon sabi moro fu den. Wan sani di wan ososma taki onfruwakti kan tyari kon na krin nanga sortu sani furu sma na ini a kontren dati e broko den ede, èn dati kan gi wi na okasi fu gi kotoigi.
4 Sreka gi wan takimakandra: Te yu e sreka yusrefi fu go du a preikiwroko na ini wan grontapu di e kenki doronomo, dan wi kan gebroiki a brochure Fa foe bigin èn go doro nanga bijbel takimakandra. Bun rai fa yu kan gebroiki disiten tori na ini a takimakandra fu yu, de fu feni na tapu bladzijde 5, na ondro den ede-prakseri „takroedoe/de sondro kefar” èn na ondro „sani di no pasa so langa ete” na tapu bladzijde 6. Den srefi sortu tori de fu feni tu na ini Wi Kownukondre Dienst fu september 2000 na tapu bladzijde 4. Te yu e sreka yu takimakandra, dan yu musu de klariklari fu gebroiki wan bijbeltekst di fiti.
5 Te wi e hori den sani na prakseri nanga san sma na ini wi kontren e broko den ede doronomo, dan a de fanowdu fu fiti a takimakandra fu a bun nyunsu na a sani dati. Na so wan fasi wi sa taki nanga sma fu sani di abi bigi krakti tapu a libi fu den. Nanga dati wi e yepi moro furu sma fu kon leri sabi a Wan di no e kenki den fasi nanga markitiki fu en.—Yak. 1:17.