Froestan san den sani di e pasa now wani taki
1 „A prenki foe den sani di wi e si na a grontapoe disi e kenki” (1 Kor. 7:31). Disi de foe si ini den sani di e pasa now èn di e kenki esi-esi. San disi makandra nanga ala sani di e pasa ini Jehovah en organisâsi, wani taki gi joesrefi?—Luk. 21:28.
2 Den kontroe foe den bijbel profeititori ini a twenti jarihondro disi e poti krakti a tapoe taki a de troe dati na heri gadolowsoe seti foe sani de na ini den lasti dei foe en (Mat. 24:3-14; Luk. 21:7-11). Jesus ben taki dati ’a geslakti disi no sa gowe kwetikweti bifo ala den sani feni presi’ (Luk. 21:32). Joe e froestan san disi wani taki gi den sma na ini joe gebied di no teki a sei foe Jehovah ete? Efoe joe e froestan disi, dan fa disi e wroko tapoe joe velddienst?—Luk. 21:34-36.
3 Jepi trawan now di ten de ete foe dati: Jesus ben taigi den disipel foe en foe gebroiki boen situwâsi foe meki a boen njoensoe bekènti (Joh. 9:4). Na apostel Paulus ben gi na srefi froemane dati di a ben gi den brada na ini Kolose na deki-ati „foe go doro foe waka ini koni ini a tori foe den wan di de na dorosei, bai na joisti ten gi joesrefi”—Kol. 4:5.
4 Sonwan ben arki na a froemane foe a apostel foe bai na ten èn den ben tron gewoon pionier. Foeroe jongoe sma teki na gewoon pionierdienst tapoe den, ala di den e go na skoro ete èn den abi heri boen bakapisi ini disi. Jongoewan di e go na skoro kan bai na joisti ten foe jepi kompe skoromati foe kon froestan den sani di e pasa now ini a ten disi èn foe meki den kon sabi a toemoesi moi howpoe gi na tamara ondro Gado kownoekondre—Pred. 12:1.
5 Ini november wi kan meki wan boen gebroiki foe wi ten ini a velddienst foe di wi e pristeri na tijdschrift Ontwaakt! na ibri okasi. A poeblikâsi disi e gi sma wan boen loekoe ini san den sani di e pasa now wani taki troetroe. Pristeri a tijdschrift na sma di e sori belangstelling te joe e miti den ini joe oso-foe-oso wroko. Teki na bosroiti foe pristeri en na skorokompe ofoe na sma tapoe joe wroko. Poti a prakseri tapoe den tori di sma di joe sabi, spesroetoe sa feni en wan moi sani foe sabi moro foe en. Na Ontwaakt! foe 8 oktober 1991 abi leki eksempel artikel foe na meshandri foe pikin na a sei foe seks. Disi na wan tori di foeroe sma e broko-ede nanga en.
6 Fa joe kan gebroiki a Tori foe takimakandra di wi e gebroiki now? Baka te joe taki soema na joe, joe ben sa kan aksi na ososma: „Foe san-ede joe e denki taki wi abi foe doe nanga someni situwâsi, di no e meki wi froewakti kon troe ini a ten disi?” Baka te a piki, joe ben sa kan taki moro fara: „Bijbel e taki dati gi foeroe sma a libi de sondro wan tamara èn a no e meki na froewakti foe den kon troe. Loekoe san den e taki djaso na ini Preikiman 2:17. [Leisi] Joe e agri nanga san skrifi djaso? [Gi okasi foe piki]. San joe denki ben sa kan de wan trowstoe gi wan sma di abi foe doe nanga foeroe problema? [Gi okasi foe piki.] Djaso wan tekst de di e gi wi wan positief loekoe tapoe a libi. [Leisi Psalm 37:39, 40.] Foe dati-ede meki Jehovah Kotoigi e gi sma deki-ati foe teki bijbel leri. Teki foe eksempel a tori disi na ini a moro njoen Ontwaakt! foe wi.” Pristeri baka dati wan abonnement noso efoe den no wani dati, den loesoe tijdschrift.
7 Tweifri no de taki disi na den moro span ten foe dini Jehovah. Meki a de so taki disi e boeweigi wi foe meki wan boen gebroiki foe den okasi a moen disi, foe jepi moro opregti sma foe si san den sani di e pasa now wani taki troetroe.